Xilka ugu muhimsan Golaha shcabaka ee KMG ah marka la soo gaabiyo waxaa la oran waa inuu diyaariyo dastuur dadka qancin kara, tiro koob guud iyo inuu dadwaynaha u diyaariyo sidii ay doorasho xor ah u geli lahaayeen.

Taas waxaa barbarsocda oo laga doonayaa inay gutaan xilka maalmeedkooda oo ay ugu horayso inay qofka caadiga ah ee Somaliga ah ay caqligiisa kusso celiyaan baahida iyo dhibaatada kala dambaynta loo qabo.

Waxaad mooddaa in golaha shacabka ee KMG ah uu mashquul ku yahay hawl maalmeedka dawladda, ka qayb galka shirarka uu madaxweynuhu qabanayo. Golaha oo ah kan ugu awoodda sareeya dalka ayaad moodaa inuu gabayo xilkiisa. Maalmahaan wixii ka soo baxayey oo eedayn ah ee dusha ka saarayeen xukuumadda ma moodid inay garowsasho ku leeyihiin.

Guddoomiyaha golaha Shacabku waa xubin muhim ah oo mar walba la socota sida ay xukuumaddu u socoto, walina lama gaarin waqtigii eedaha lagu sugi lahaa goloyaasha ee waxaa lagu jiraa gurmad aan kala har lahyn. sidaas darteed, guddoomiyuhu waa inuu garawsado inuu talo joogta ah siiyo xukuumadda iyo madaxwaynaha oo uu waqti fara badan ku bixiyo la joogistiisa. taas ayaa ka haboon waqtigaan inay golahu eedeeyaan xukuumadda aan salka adag lahayn ee ay iyaguba ka midka yihiin.

Ma difaacayo wixii gef ah ee dalka laga galo, waxaanse difaacayaa in xilka qof walba saaran uusan waqtigaan la beegsan shirar gole oo waqtiga ay dhici doonaan aan la garan karin iyadoo lagu jiro gurmad dab demis ah.

Waqtiga u harsan golaha shacabka sida ii muuqata ma ah mid ku filan hawsha laga doonayo in ay qabtaan, sanadkii koowaad ayaa dhamaad ah, welina hawlahoodii kuwii ugu horreeyey dadwaynaha looma soo bandhigin. Waxaa iga talo ah, inuu golaha shcabku yeesho Web Site[bogg] gaar ah oo macluumaadka uu ku uruursado, dadwaynuhuna ay kala xiriiraan.

Aqoon yahanada Somalida ee leh awoodda aqooneed iyo kartiyeed waa inay ku caawiyaan golaha Mailing List joogto ah oo lagula xiriiro golaha maadaama waqtiga dhow ay guda geli doonaan diyaarinta dastuurka, talo fara badanna looga baahan doono dadwaynaha Soamliyeed. Aad ayaan u soo dhawayn lahaa haddii tiknolajidda uu goluhu ka faa'iidaysto.

Qore C/Laahi Xassan Cali

Qoraaga Kala Xidhiidh.
abhali@yahoo.com

Posted June 22, 2001

Waxaa Lagu Daabacay SomaliTalk.com