Etahi Inoi

He whakarapopototanga enei mai i nga inoi me nga tuhituhi a Bahá'u'lláh, te Báb raua ko 'Abdu'l-Bahá.

E tino tapu ana te wahi, te whare, te kainga, te taone, te ngakau, te maunga, te pringa, te ana, te awaawa, te whenua, te moana, te motu, me te raorao, a i nga wahi katoa e whakahuatia ake ana e whakakororiatia ana te ingoa o te Atua.
Bahá'u'lláh

Karakia Poto (Short Obligatory Prayer)

(me Matua inoi ia ra, ia ra)

Mo nga ra katoa, me inoingia i waenganui i te Tuhoetanga o te ra atu ki te tonga o te ra.

E toku Atua nau ahau i hanga kia mohio, a kia koropiko atu ki a Koe. I tenei wa e whakapuaki ana ahau i toku ngoikoretanga, a, ki Tou kaha, ki toku poharatanga, a, ki Tou oranga.
Kahore he Atua i tua atu i a Koe anake, te Kaiawhina, te Oranga Mutunga Kore.

Bahá'u'lláh

Hei whakamama i nga uauatanga (Remover of Difficulties)

Kahore he mea, he tangata ranei e taea ana e ia te whakamama ake i nga uauatanga i tua atu i a Koe e te Atua. E whakanui ana ahau i Tou ingoa e te Atua. Ko matou katoa o pononga, a, e u ana matou ki o tohutphu, hiahia katoa.
Te Báb

Mo Te Ata

Kua maranga nei ahau e toku Atua, ki raro i Tou maru, a, mau ahau e tiaki pai mai kia noho mai au ki raro o araitanga, i o manaakitanga. Whakakahangia mai Tou maramatanga ki roto ki taku hinengaro, whatumanawa hoki, kia rite tona maramatanga penei me te rama, mutunga kore hei arai atu i nga rauhanga katoa.
Bahá'u'lláh

Waenganui Po

Ki a koe e rapu nei i te pono! Mena koe e hiahia ana ki te kite i Tona maramatanga me koropiko atu, me inoi atu, me tuku atu i tou reo ki a Ia i te waenganui po, me ki: E te Atua kua anga ke atu taku mata ki Tou aroaro, a, kua ruku ke atu ahau ki te moana o Tou aroha. E te Atua whakamaramatia taku pouritanga ki Tou rama, a, whakakoangia ahau ki te waina o To aroha. E te Atua tukua ahau kia rongo i Tou reo, a, whakatuwheratia aku kanohi ki nga tatau o te rangi kia kite ahau i te maramatanga o Tou kororia, kia whakawhirinaki atu au ki Tou ataahuatanga. Ko Koe hoki te Kaihomai te Ringamaka te Aroha te Muru-i-te-hara.
'Abdu'l-Bahá

Mo te murunga Hara

E te Atua tohu ko koe hoki te whakamaru i a matou o pononga. Ko Koe e mohio ana ki nga mea katoa, kahore he mea huna e ngaro i a Koe. Ko Koe hoki te kaha me te mana. He hunga hara katoa matou, engari, ko Koe te murunga hara, te Atua tohu atawhai hoki. E te Atua kaua e titiro mai ki o matou hara, engari, tukuna mai ki a matou tau i hiahia ai. He nui a matou hara, he hoki, engari, he nui te moana o Tou arohanoa. He taimaha Tou matou ngoikoretanga, Engari, e marama mai ana Tou taunaki, awhina hoki. No reira, whakakaungaia mai, whakakahangia matou. Awhinatia mai matou ki roto i nga mea e tika ana ki a Koe. Whakamaramatia o matou ngakau, tukuna o matou kanohi kia kite, o matou taringa kia whakarongo. Whakaarangia te hunga mate, whakaorangia te hunga e mauiui ana, e turoro ana. Tukuna mai Tou rangatiratanga ki runga ki te hunga rawakore, pohara hoki, atawhaitia te huna mohoao. Atawhaitia mai matou i roto i Tou kingitanga, a, whakamaramatia mai matou ki Tou rama arataki. Ko Koe hoki te Aroha, te humarie, te Atawhai.
'Abdu'l-Bahá

Te Hunga Tamariki

E te Atua whakatupungia tenei mokai ki roto i te uma o Tou atawhai, a, whangai i a ia ki te waiu o Tou atawhai. Whakatongia tenei kakano ki te mara o Tou arohanoa, a, awhina i a ia ki te tomairangi o Tou atawhai. Meinga ia hei mokai o Tou kingitanga a, arataki i a ia ki Tou aotapu. Ko Koe hoki te Kaha, te Humarie, te Kaihomai i nga mea katoa, te tino Atua.
'Abdu'l-Bahá

Te Inoi Kia Awhinatia

E inoi atu ana ahau ki a koe e toku Atua kaha! Kaua ahau e tukua kia whakawaia, engari arahinatia ahau ki tau mana tohu. Ko koe tonu te Atua, te Atua kaha rawa, te Atua tohu. E kore e taea e wai atu ki te whakakore i au hiahia katoa.
Te Báb

Mo Te Whakaora I Te Tinana I Te Wairua

Ko Tou Ingoa hei oranga moku, e toku Atua, ko te maumahara ki a Koe toku rongoa, oranga. Ko taku tumanako kia tata atu au ki a Koe, ko taku aroha ki a Koe hei hoa moku. Ko Tou tohu ki ahau hei oranga moku i tenei ao, a, i tera ao. Ko Koe hoki te Atua tohu, te Atua matau, te Atua mohio.
Bahá'u'lláh

Mo Te Kotahitanga

E Toku Atua! E Toku Atua! Whakakotahitia nga ngakau o au pononga. Whakahuratia kia ratou Tou tikanga nui kia mau tonu i au whakahau a kia noho tuturu i Tou Ture. E te Atua, kaua ratou e whakarerea atu, engari, arahinatia a ratou hikoitanga ki te maramatanga o Tou whakaaro nui. Kia hari ai a ratou ngakau ki Tou aroha. He pono koa, ko Koe hoki To ratou kaiawhina me To ratou Ariki.
Bahá'u'lláh

Mo te Arataki I Ou Haeranga Katoa

E te Atua, toku Atua! Ahakoa kua wehe mai au i toku kainga, e pupuri tonu ana ahau i te taura o Tou arohanoa, a, kua tukuna atu ahau ki raro i Tou maru, atawhai hoki. Tukuna noiho e Koe i te rangi o Tou atawhai me ou manakitanga, kia ahei ai ahau te hoki rangimarie ki te kainga. E titiro atu ana ahau mau e matau ana i te nui o taku aroha ki a Koe.
Bahá'u'lláh

Mo Te Hunga Mate

E toku Atua! Te Kai muru i nga hara, te Kai tuku taonga mai, te Kai arai i nga mamae katoa. E inoi kaha ana ahau ki a Koe kia muru Koe i nga hara katoa o te hunga kua wehe atu nei i tenei ao, kua tae mai atu nei ratou ki te ao wairua. E toku Atua! Murua o ratou hara, whakamamangia o ratou pouri, a, whakamaramatia to ratou pouritanga. Meinga o ratou pouri, a, whakamaramatia to ratou pouritanga. Meinga ratou kia tomo atu ki Tou mara o te koa, horoia ratou ki te wai tapu, a, tukuna ratou kia kite i ou mana i runga i Tou maunga teitei tapu rawa atu.
'Abdu'l-Bahá

Te Tohu Wairua

E te Atua, whakahoutia whakakoatia toku wairua. Whakapaingia toku ngakau. Tukua mai Tou maramatanga ki ahau. Ka tukua katoatia ahau ki roto ki ou ringaringa. Ko Koe hoki toku kaiarahi, piringa pakaha. E kore ano ahau e rongo i te pouri, i te pamamae; ka koa tonu ahau. E te Atua! E kore ano ahau e manukanuka, e kore ano ahau e pehia ranei e te raruraru. Kua kore ano ahau e aro ake ki nga mahi whakahou o tenei ao. E te Atua! Kei ko noa atu tou aroha mai ki ahau, i toku ake aroha ki ahau ano. Ka tapae atu nei i ahau ki raro i o parirau mo ake tonu atu.
'Abdu'l-Bahá

Mo Te Moana-Nui-A-Kiwa

Ko Koe te Atua tapu te manamutunga kore. Ko Koe toku Atua aroha. Homai i te kaha e taea ai e matou nga raruraru katoa o te Ao, homai ano hoki kia matou te kaha kia rite ano hoki ki nga ngaru o te Moana-nui-a-Kiwa kia tae katoa a matou mahi ataahua ki nga takutai o te uru me te rawhiti.
'Abdu'l-Bahá