The Bahá'í Community of the Marshall Islands




Yokwe!
Jar an Bahá’í
Naan ko Retino
Jeje ko an Bahá’í
Jar
Mour im Mij
Monono eo ilo Jerbal
Katak Ko Nan Kamulal
Kemlele kin Tomak ko
Contact Us


Visit
The Bahá'í World
Mour inm Mij (Ruhi Buk 1)

“Im kio, ikijen kajitok eo am kin jitob eo an juon armij im wewen an mour elkin mij. Kwon jela mol eo bwe jitob eo, elkin an jebel lok jen enbwin eo, enaj wonmanlok wot mae ien ej tobaraklok im ber iman mejen Anij, ilo wewen eo ukoktak ko an ebeben otemjij , ak ukoktak im wewen ko an lalin rejamin jelete. Enaj ber toon wot an Ailin eo an Anij, Utiej eo An, im Kajur potata eo An naj ber. Enaj kwalok im kalikar kokale ko an Anij, kadkad ko An, im naj kallikar tiriamo im jeramon eo An.” Bahá’u’lláh

*****

“Kwon jela bwe aolep lojilni ko rej ronjake, elane rerreo im jab ronjake men ko renana, rej aikuij, ilo aolep ien otemjej im ilo jabrewot jikin, ren ronjake ainikien eo ej konono kin naan kein rekwojarjar: ‘Emol, kemij an Anij, im non E kim naj jeblak.’ Ittino eo ilo mij an armij im ilo len an jeblak ejain kar allikar, im nan kio jejab melele kaki. Kin jimwe eo an Anij! Elane renaj kar allikar, remaron kar komon mijak im lelnon non kij - remaron in jeklok im jako, ak ro jet remaron in obrak kin monono im konan bwe ren mij, im naj jar im akwelap, kin konan eo ejelok jemlokin, non Anij eo emol- Eo eutiej kin aibuijuij eo An- – non komakajkaj lok jemlokin mour eo air ion lal.

“Mij ej lelok non aolep dri tomak ro cup in mour eo. Ej letok lanlin, im ej dri boktok monono. Ej boktok menin letok an mour indreo.

“ Non ro emoj air edjone len wijke in mour ion lal, eo im ej kile juon wot eo emol an Anij, Eo eaibuijbuij utiej eo An, mour eo air elkin mour in lalin ej einwot bwe Kemij jab maron komeleleiki. Jelelokjen eo ilo men in ebed wot iben Anij, Eo Ej Iroij in aolep lal.” Bahá’u’lláh

*****

“Unin an Anij komanman armij bwe ren maron jela kin Dri komanman eo an im maron bed Iturin, im naj wewen eo drein. Ilo menin kotobar in eweppen tata, mejen kajik in im eutiej tata, aolep Buk ko rekwojarjar im Jeje ko reaurok im rej itok jen lan rej kwalok im kalikar menin. Eo emoj an kile Jorantak in tel eo An jen lan im tobrak lok ilo melan eo an ekwojarjar emoj an kebak lok Anij im bed Iturin, juon Bed eo ej Paradise eo emol, eo einwot jikin bed ko reutiej tata ilan im ej juon wanjonok wot...Eo ear likjab jen an kile E emoj an kotton lok e make im bed ijo ettolok ilo an burumij, juon jenolok eo ejelok jabrewot ie im eobrak kin kijek. Enaj jemlok eo an in, mene bed eo an ion lal in ej juon bed eo eutiej im ej bed ion throne ko reutiej tata.” Bahá’u’lláh

*****

“ Jinoin mour an armij ej ijino lojien jinen. Ijin ear bok maron im kajur ko im bok nememe in armij. Maron im kajur ko eaikuji non mour in lalin ej buki jen an mour iloan lojien jinen, ej juon mour eo edrik belakin. Ilo lalin eaikuj mej ko mejen; ko ear buki jen mour eo ilojien jinen. Eaikuiji lojilnin; ko ear buki jen lojien jinen im keboje nan an mour ion lalin. Kajur ko eaikuiji nan an mour ilo lalin ear buki jen lal eo ilojien jinen.

“Kin menin ilo lalin eaikuj keboje make non mour eo tok elik. Men ko eaikuji non mour eo Ilan ej aikuj in buki ilalin. Einwot an keboj e ilo lal eo ilojien jinen im bok kajur ko eaikuiji nan an maron mour ilo lalin, ej bareinwot aikuiji kajur ko nan an mour ilo mour eo tokelik ko eaikuj buki ilo mour in ilalin.” 'Abdu'l-Bahá

*****

“Edro eo elab an juon armij ilo Rainin ej non an bok koj eo an ilo an ibieb tok tiriamo eo im emoj an Anij lutok ion. En ejelok juon armij, bareinwot, en lale jonan dretan eo emaron boke. Jet remaron bok kin jonan dretan eo an lobdren bein juon armij, jet remaron bok kin jonan dretan eo an juon cup, ak jet remaron bok kin jonan dretan eo an juon gallon.” Bahá’u’lláh

*****

“Kwar kajitok Ibba kin wewen jitob. Emol, kwon jela bwe jitob ej juon kokkolan Anij, juon dreka eaurok jen lan, eo, mol eo an ejelok juon dri meletlet emelele kake, im itino eo an ejelok meletlet, bareinwot ejejet tata(acute), emaron komeleleiki. Ej men eo kein kajuon moktata ilubljin aolep menin komanman otemjij ej kallikar weppen eo an Dri komanman eo an, ej men eo moktata nan kile aibuijuij eo An, nan drebij mol eo An, im nan bunbadrikdrik im kabun nan E. Elane enaj mol nan Anij, enaj kwalok meram eo An, im enaj, eliktata, jeblak nan Ibben. Elane enaj likjab, bareinwot, ilo an mol nan Dri komanman eo an, enaj erom dri kamokoko an konan im mom ko an lalin, im enaj, eliktata, rumulok ilo mour in konan im mom ko ejelok tokjeier..” Bahá’u’lláh

*****

“Komij einwot bao ej ekeke, kin ba ko bein kajur kin kejatrikrik im monono elab, ibelakin lan ko ejelok jemlokier, mae ien, ekule im aikuij bok kijen, ej rol tok non dren im bwirij ilo lal in, im, elkin an lokjak kin konan ko an, ej kile bwe emojno non an bar jino kelok non melan ko ilan ear itok jeni. Bao eo emojno kin aolep men ko reddo rej jon ba ko bein, bao en, ej dri amnak an jikin ko ilan, ej kio aikuij in bukot jikin an jokwe ion binal. Kin menin, O Ao dri jerbal, jab katton ba ko beimi kin bwidej in mour in jebwebwe im konan ko rewan, im jab katton i kin bwidej in mour in ebanban im kijrat, bwe en jab aban ami ekeke ilo lan ko lan in jelelokjen eo Ao.” Bahá’u’lláh

*****

“ Elkin komanman e lalin im aolep men otemjej rej jokwe im makitkit ion, Ear, kin jerbal im kajur eo An ejelok jonan im jen Konan in kajur botata eo An, kelet bwe en lelok non armij juon maron eo ejenelok non air jela kin E im yokwe E – juon maron eo jej aikuij kile bwe ej kemour im ej unleplep in aolep menin komanman otemjij…Ilo iolaplap in aolep menin komanman ko An Ear likit meram in juon ian et ko Etan, im koman bwe en bok aibuijbuij in juon ian kadkad ko Kadkadin. Botab, ion komanman eo an armij Ear komaat aolep meram in Et ko Etan im aolep kadkad ko Kadkadin, im koman bwe en juon kilaj (mirror) eo ej kwalok E. Ian aolep menin komanman otemjej, Ear kile im kejenelok armij im lelok non e juon jeraman eo ej bed non indreo.” Bahá’u’lláh

*****

“Kajur kein, ko Ijuran in jeramon im Unjen tel jen lan emoj likit ilo komanman eo an armij ej, bareinwot, bed im itino ilo e, einwot an meram eo itino ilo juon candle im koon meram ko retino ilo lamp eo. Romak in kajur kein remaron benjak kin konan ko an lal einwot meram in al emaron benjak kin binal im etton ko rej kalbubu im binej kilaj (mirror) eo. Candle im lamp eo rejjab maron in romak jen ir make, einwot an kilaj eo jab maron kareoik e make jen etton ko ie. Ealikar im melele bwe mae ien eo kijeek eo ej bwil ilo lamp eo ejab maron urur, im mae ien eo etton ko naj kareoik jen mejen kilaj eo ejap maron walok al ak kallikar meram in aibuijuij eo an ie.” Bahá’u’lláh

*****

“Aor in jelalokjen eo an Bed eo jen Jinoin ej bed im enaj wonmanlok wot ilo an bed im benjak jen mejen armij. Ejelok jelalokjen an armij enaj maron ebakelok melan eo An ekwojarjar. Jen tiriamo im yokwe eo An, bareinwot, im einwot menin kamol jen yokwe im jouij eo An, emoj an kalikar nan armij otemjij Ijuran in tel ko An jen lan, Kokkale ko in juon wot eo An, im likit jelalokjen eo an Dri kwojarjar rein bwe en einwot jelalokjen eo An make. Jabrewot eo ej kile ir, emoj an kile Anij. Jabrewot eo ej eoron kir eo air, emoj an eoron Kir eo an Anij, im jabrewot eo ej kamol im kile Katak eo air, emoj an kile mol eo an Anij make. Jabrewot eo ej oktak lok jen ir, emoj an oktaklok jen Anij, im jabrewot eo ejab tomak ir, ejab tomak Anij. Kajojo Iaier ej Ial eo an Anij eo im ej kobaik lal in ibben jikin ko ilan, im Jonak eo kin Mol eo An nan kajojo ro otemjij ilo jikin ko ilo lal im ilo lan. Ir Ro rej Dri kannan an Anij ilubiljin armij otemjij, Rej Dri kalikar Mol eo An, im kokkale ko kokkalan Aibuijuij eo An.” Bahá’u’lláh

*****

“Armij ej menin Kokkale eo eutiej(supreme Talisman). Botab elane ejab jejet an bok jelalokjen enaj likjab jen menin emoj jolete kake. Kin juon naan jen lonin Anij ear kir bwe en mour; im bar kin juon naan Ear kwalok nane bwe en jela kin Unjen jelalokjen eo an; im bar kin juon naan elikit bed (station) im mejen kajik (destiny) eo an iumin kajebrok. Kajur Eo Elab ear ba: Armij ej einwot juon jikin eo eobrak kin dreka aurok ko im ejelok jonan air aurok. Jelalokjen wot emaron kwalok menin aurok ko ie im komane bwe armij ren jeramon jeni. Elane juon armij enaj kolmenlokjen kin ta Jeje ko rokwojarjar rar kwalok, im rar wanlaltak jen lan in Konan eo an Anij ekwojarjar, enaj kar kile bwe aolep armij rej einwot juon wot jitob, im bwe kokkale in ej kwalok naan kein ‘Ailin eo ej an Anij’ im naj je ilo buru ko kajojo, im romak in jeramon eo jen Lan, romak in juouij im tiriamo naj maron kitbuji aolep armij.” Bahá’u’lláh

*****

“Ejeraman jitob eo, ilo ien eo ej jebel lok jen enbwin eo, erreo im ekwojarjar jen aolep lomnak ko rewan an armij in lalin. Jitob in ej mour im makitkit ekkar nan Ankilan Dri komanman eo an, im drelone Paradise eo eutiej tata. Ijo, Dri jerbal ro Lan, im rej dri amnak an jikin ko reutiej tata, naj jebole, im Dri kanan ro an Anij, im ro Anij ear kelet ir renaj bukote bwe en motteier. Jitob in enaj konono ibbeier, im jiron ir kin ta ko ear jelmai ilo an kar jibarok ial eo nan Anij, Iroij in aolep lal otemjij.” Bahá’u’lláh

*****

“Jitob an ro rejab tomak(infidels), naj, bareinwot—im Ij kamol menin— ilo ien eo wot rej jolok kitweier renaj kile men ko romman rar likjab jen air kommani, im renaj buromoj kaki, im renaj bunbadrikdrik iman mejen Anij. Renaj etal wot im kommane wewen in ilo ien eo jitob ko air rej jebel jen enbwinier.” Bahá’u’lláh

*****

“Kajojo armij ej aikuij jolok bwid an ro dri jerawiwi, im en jab lo mojno an ro jet, kinke ejelok juon ejela kin jemlok eo an. Elon ien juon dri jerawiwi, ilo ien eo ej mij, eoktak im tomak, im, ilim cup in mour indreo, im walinlok nan Jikin eo ilan! Im ebar lon ien juon dri tomak eo ebin, ilo ien eo jitob eo an ej walinlok, eoktak im wotlok iloan kijeek eo ejelok jemlokin!” Bahá’u’lláh

*****

“Menin ittino ko im armij rejab jela kaki ilo lalin, renaj loi ilo mour eo tokelik, im ijen enaj jela kin aolep men ko rar ittino jen e; kin menin enaj kile im jela kajien armij ro im rar mottan ilo lalin. Ilo ejelok bere, jitob ko rekwojarjar im erreo mejeier im ewor air lolokjen renaj, ilo ailin in meram, jela kin aolep men ko rettino, im renaj bukot jeramon nan kamol mol eo an kajojo jitob ko rellab. Enaj bareinwot allikar air lo Aibuijuij eo an Anij ilo lal en. Renaj bareinwot lo ro jeran Anij, ro mokta lok im ro kio, rej bed ibben dron ilan.” 'Abdu'l-Bahá

*****

“ Men eo eoktak im ej kejenlok armij jen dron enaj allikar ilo ien en rej mij im ilok jen lalin. Oktak in ejab bedbed ion jikin im ien, ak ej bedbed wot ion jitob im ilo lomnak (conscience). Bwe Ailin eo an Anij erreo im ejelok ien kab jikin ie; Ej bar juon lal im bar juon universe. Botab emoj kalimuri jitob ko rekwojarjar bwe renaj mour ibben dron. Komin jela bwe mol, ilo ailin in Lan, jitob ko rej jitenburu (ro dri tomak) renaj kile im jela kajien dron, im bukot bwe ren bed ibben dron, botab ilo mour in jitob. Bareinwot, yokwe eo am nan kar juon armij ilo lalin naj jamin meloklok ilo ailin in Lan. Bareinwot, kwoj jamin meloklok mour eo am im kwar mour kake ilo lalin.” 'Abdu'l-Bahá

*****

“Kom ar, bareinwot, kajitok Ibba kin jokjok im wewen jitob eo elkin an jebel jen enbwin eo. Komin jela bwe, mol, elane jitob eo an armij ear etetal ilo ial ko an Anij, emol, enaj jeblak im koba lok ilo aibuijuij eo an Jitenburu eo an. Kin jejet im jimwe eo an Anij! Enaj bed ilo juon jikin eo ejelok pen emaron je ak loni nan kemeleleiki. Juon jitob eo ear bed wot ilo an tomak ilo Katak eo an Anij, im jutak bin ilo Ial eo An, elkin an wanlinlok, enaj bok juon kajur eo enaj kejramon aolepen lal ko im komanman in Eo Ekajur potata.” Bahá’u’lláh

*****

“O ao dri jerbal! Jab buromoj elane, ilo ran kein ilo mour in lalin, men ko im rejab jejet nan konan ko am emoj an Anij keleti im keboji nan yuk, bwe ran in monono im lanlin, rej bed im kottar yuk. Lal ko, rekwojarjar im aibuijuij ilo mour in jitob, renaj bareinwot alikar iman mejam. Anij emoj an keboj men kein nan kwe, ilo lalin im lal eo tokelik, bwe kwon jeramon jeni, im monono kaki, im bok mottan am kajur im jeramon jeni. Jen kajojo iaier, ejelok bere bwe kwonaj tobari.” Bahá’u’lláh


Copyright 1999, The Bahá'í Community of the Marshall Islands