The Bahá'í Community of the Marshall Islands




Yokwe!
Jar an Bahá’í
Naan ko Retino
Jeje ko an Bahá’í
Jar
Mour im Mij
Monono eo ilo Jerbal
Katak Ko Nan Kamulal
Kemlele kin Tomak ko
Contact Us


Visit
The Bahá'í World
Jar an Bahá’í

JAR IN JIBAN

JAR IN JIBAN

O Kwe eo im Turin mejen ej unjen ao kabun, im aibuijuij eo An ej jikin ao kone, im ijo Jikin ej menin in ao kotobar. Nebar E ej ao kejatdrikdrik, wonake eo An ej karejera, im yokwe eo An ej unjen mour eo ao, ao kwalok kake E ej menin ao jokane, An ebake io ej konan eo ao, im an bed ibba ej konan im kotobar eo ao elab tata. Ij oware Yuk, bwe Kwon jab drebij jen io men ko im Kwar kalikari nan dri kelet ro Am ilubiljin ro dri jilkam. Letok nan io bareinwot men ko romman an lalin im lal eo ej itok. Kwe ilo mol Kwoj King in armij otemjij. Ebar ejelok Anij Ijelokim, Eo Dri jolok bwid indreo, Eo ejelok jonan An jouij.

Bahá’u’lláh

Ao Anij, Eo ij kabun im kautiej E, ao King, Eo buruo eaikuiji ! Loo, ta emaron kwalok ainikien kamolol ko ao nan Yuk? Iar jerata im jol, Kwar karuj io, iar einwot juon eo emij, Kwar kemour io kin dren kwojarjar eo Am ejelok jemlokin im emoj an tor tok jen Naan in tiriamo eo Am elab.

Dri onake Eo ekwojarkar! Aolep menin komanman rar walok jen kejramon eo Am; jab drebij ir jen dren ko drenin jouij eo Am, ak jen lomoto in tiriamo eo Am. Ij badrikdrik im kajitok Ibbam nan jiban io ilo aolep ien im ilo aolep wewen ko, im bukot jen lan in tiriamo eo Am konan eo Am jen etto. Kwe ilo mol Iroij in jouij im Utiej tata an ailin in iroij eo ejelok jemlokin

Bahá’u’lláh

JIBAN KIN MENIN MELEJON KO

Ewor ke bar juon Dri jolok aban ko ijelokin Anij? Jen ba: Nebar Anij! E Ej Anij! Aolep rej Dri jelkan, im aolep rej bed kin Kilan!

Báb

O Iroij! Kwoj Dri jolok aolep menin buromoj, im Dri namejlan aolep menin aban. Kwe Eo Kwoj Dri jolok buromoj im kanemkwoj ro dri kamokoko, im Dri lomor an aolep armij. O Iroij! Letok anemkwoj kin tiriamo eo Am, im bwine io ilubljin dri jerbal ro Am im emoj air bok lomor.

Báb

AJRI IM JODRIKDRIK

O Iroij! Komman bwe ajri rein ren menin edrok ko reweppen. Komman bwe ren edrok im wonmanlok ilo jikin kallib in Bujen eo Am, im lelok nan ir mour kaal im aibuijuij jen dren ko rej wotlok tok jen koro ko ilo Abha Kingdom.

O Kwe Iroij in jouij! Na ij juon ajri edrik wot, kautiej io ilo ao drelon waj ilo ailin eo. Na armij in lalin, komman bwe in bok mour in lan; na ij jen lalin, komman bwe in bed ilo jikin eo ilan; dri jerata, komman bwe in romak lok; na menin komanman wot, letok jitob ioo, im komman bwe in kokkalen menin jeramon ko Am ejelok jemlokier.

Kwe Kwokajur, Eo eobrak kin yokwe.

‘Abdu’l-Bahá

O Anij! Kojelalokjen ajri rein. Ajri rein rej ine in jikin kallib in wijki eo Am, ut ko ilo melaj eo Am, rose ko in jikin kallib eo Am. Komman bwe Am wit en wotlok ioier, komman bwe Al in Mol eo en romak ioier kin yokwe eo Am.

Komman bwe Kituom en kemourur ir bwe ren maron katak, edrok im wonmanlok im bed ilo aibujuij otem aibuijuij. Kwe Dri letok. Kwe Dri tiriamo.

'Abdu'l-Bahá

RO DRI MIJ

O ao Anij! O Kwe Ri-jolok bwid ko, ri-letok menin lelok ko, ri-jolok aban ko!

Ij akwelapIbam kin eo emoj an jolok nuknuk eo an kaniek im botoktok im wonlonwaj non lal eo an jitob.

O ao Iroj! Kareoik ir jen bwid ko air, jolok burumij ko air im ukot ir jen bed ilo marok non meram. Koman bwe ren drelok jikin kalib in monono eo am, kareoik ir kin den eo ereo im ereo, koman bwe ren maron in lo romak ko Am ion tol eo eutiej tata.

'Abdu'l-Bahá

ELLOK JEN MEN KO AN MOUR IN

Jiban io, O ao Anij, bwe in bed ebake Yuk, im jokwe iloan melan ko ilo oror eo Am, bwe ilo ao etolok jen Kwe ekkoman bwe ao en maron jako. Komman bwe in bed im kakije ilo ailurlur in ba ko bein tiriamo eo Am, bwe kijeek in ao jenelok jen Kwe emoj an tile im kaonlok buruo. Kebak waj io nan river in mour, bwe ao eurur kin an maro im jab kakije in bukot Yuk. Ao jan, O ao Anij, ej kwalok kin jonan an buruo entan im buromoj, im drenin kemjalal retorlok jen meja ilo ao kwalok jonan yokwe eo ao nan Yuk.

Ij owar Yuk, kin nebar eo Kwoj nebar Yuk kake im kin aibuijuij eo Kwoj kaibuijuij aurok eo Am make kake, komman bwe kemin mottan ro otemjij im emoj air kile Yuk im kamol kajur im utiej potata eo Am ilo ran ko Am. Jiban kim bwe kemin idrak, O ao Anij, jen adin bein tiriamo dren ko drenin jouij im yokwe eo Am, bwe kemin maron meloklok jabrewot ak Kwe wot, im boub wot kin Kwe. Kwo-kajur nan komman ta eo Kwo-konan. Ebar ejelok Anij Ijelokim, Dri maron, Dri Jiban ilo ien ban, Eo ej bed kin E make.

Eaibuijuij Etam, O Kwe eo Kwoj King in king ro otemjij.

Bahá’u’lláh

O Iroij! Ilo Kwe ij bukot kejbarok eo Am, im nan aolepen kokkale ko Am ij aje waj buruo.

O Iroij! Mekarta ilo ien ao itoitak ak ilo ao bed ijo jiku, im ilo ao boub ak ilo ao jerbal, ij likit aolepen ao like ilo Kwe.

Letok nan io bareinwot jiban eo Am elab bwe in maron mour im anemkoj jen jabrewot, O Kwe Eo ejelok jonan Am tiriamo!

Letok nan io kij eo ao, O Iroij, ekkar nan Am konan, im komman bwe en bo buruo kin jabrewot men otemjij emoj Am karok nan io.

Aolep maron rej Am ekkar nan Ankilam.

Báb

O Anij, ao Anij! Kwoj ao Kejatdrikdrik im ao Jitenburu, ao Kotobar eo Eutiej tata im ao Konan! Ilo etta im buru emol ij jar nan Yuk bwe Kwon likit io bwe in juon kokkalen yokwe eo Am eutiej ilo lal eo Am, juon lamp in jelalokjen eo Am ilubiljin menin komanman ko Am, im juon flag in jeramon eo ekwojarjar ilo ailin eo Am.

Kobaik waj io ibben dri jerbal ro Am im emoj air kojenlok ir jen men otemjij ak Kwe wot, emoj air kareoik ir jen men wan ko an lalin, im emoj air rolok jen ainikien kabo im lomnak ko rewan.

Komman bwe buruo en obrak kin monono jen jitob in kejramon jen ailin eo Am, im keromak lok meja nan ao loe dri jiban ro rejab mwijkok air wonlaltak jen ailin kajur im aibuijuij potata eo Am.

Kwe, ilo mol, Kwokajur potata, Kwoaibuijuij potata im Kwokajur otem kajur.

’Abdu’l-Bahá

JAR IN JOTA

Ekijkan ao maron kiki, O Anij, ao Anij, elane mej ko mejen ro rej on kake Yuk rej ruj wot kin air bed etto lok jen Kwe; im ekijkan ao maron Bábu im kakije ak jitob an ro rej yokwe Yuk reburomij ilo air bed ettolok jen Turum?

Emoj ao ajewaj, O ao Iroij, jitob eo ao im aolepa nan tu-anbijmaron in maron im kejbarok eo Am, im ij Bábu ion bito kin kajur eo Am, im jerkak lontak ekkar nan Ankilam im Am konan. Kwe, ilo mol, Dri kejbarok, Dri wonake, Eo ekajur potata, Eo ejelok jonan an kajur.

Kin kajur eo Am! Ejelok bar juon men inaj, ilo ien ao kiki ak ilo ien ao ruj, ak men eo wot kwoj konan. Na ij Am dri jerbal im ij likit io ilubdren Beim. Kwon jouij im jiban io bwe in maron kadriwoj lok melu in monono in jouij eo Am. Enin, ilo mol, ej kejatdrikdrik eo ao im an ro jet im rej monono ilo air bed ebake Yuk. Neber Yuk, O Iroij in lal otemjelok!

Bahá’u’lláh

BAMLE (FAMILY)

Ij oware jolok bwid eo Am, O ao Anij, im kajitok kin jolok bwid ilo wewen eo Kwoknan bwe dri jerbal ro Am ren jede Ibbam kake. Ij oware Yuk bwe Kwon jeerlok jerawiwi ko am ekkar nan Am Iroij, im jolok ao bwid, an jino im jema, im ro ilo lomnak eo Am bwe emoj air drelone waj imon yokwe eo Am ilo wewen eo ejejet im ekkar nan Kajur potata eo Am ellalok jen men otemjij im ejjejet nan aibuijuij in Kajur eo Am ilan.

O ao Anij! Emoj Am kakajur jitob eo ao bwe en kajitok jiban jen Yuk, ejelok bar juon inaj kir nane ijelokin wot Kwe. Kwo utiej im aibuijuij; ij nebar Yuk toon wot Am kallikar Yuk nan io, im oware Yuk bwe Kwon jolok ao bwid, einwot ke iar likjab jen ao jela kin Yuk, im jab etetal ilo ial in yokwe eo Am.

Báb

BIN ILO BUJEN EO

Kabin bunten ne ko neem, O Iroij, ilo ial eo Am im kakajur buruem ilo am kibilie nan Kwe. Ukot waj mej ko mejem nan aibuijuij in juon-wot eo Am, im kamononoik einbwinim kin kokkalen juon-wot eo Am jen lan. Kebelbel enbwinim kin nuknuk in jouij eo Am, im jolok jen mejem men ko rej binej kin jerawiwi, im letok nan kim kab in jouij eo Am; bwe aurok ilo aolep men in komanman ren al im nebar Yuk iman utiej im kajur eo Am. Innem Kwon kalikar Yuk, O Iroij, kin tiriamo in naan eo Am im itino in bed eo Am, im bwe kin jar eo ekwojarjar en kokajur jitob ko am— juon jar eo emoj an le ilonin naan ko im leta ko im ellalok ilonin ainikien syllable ko im ainikien ko—bwe aolep men otemjij ren onlok im ejelok mokta jen an walok meram eo Am.

Iroij! Errein dri jerbal ro rej bed wot ilo air bin ilo Bujen im Kallimur eo Am, im rej jirok bin ilo air drebij katak eo Am im rebij torerein nuknuk in kajur im utiej eo Am. Jiban ir, O Iroij, kin jouij eo Am im kabin ir kin kajur eo Am im kakajur ir ilo air kiblie nan Kwe.

Kwe Dri jolok bwid im Dri jouij.

‘Abdu’l-Bahá

O Anij in tiriamo! Lewoj kamolol nan Kwe bwe Kwar karuj im kemour io. Emoj am letok meja bwe in lolokjen im letok lojilnu bwe in ronlokjen, im tel io nan ailin eo Am im kwalok nan io ial eo Am. Emoj Am kwalok nan io ial eo ejimwe im komman bwe in drelone wan lomor eo. O Anij! Komman bwe in bin im kajur. Kejbarok io jen melejon ko rekajur im kejbarok im wonake io ilo jikin likibejnak ilo Bujen im Kallimur eo Am. Kwe Dri lolokjen. Kwe Dri ronjake.

O Kwe Anij in tiriamo. Letok nan io juon buru eo im, einwot juon kilaj, emaron romak kin meram in yokwe eo Am, im likit ioo lomnak ko romman renaj ukot lalin nan juon jikin kallib in rose kin tor tok in kejramon ko jen lan.

Kwoj Dri yokwe, Dri tiriamo. Kwe Anij in letok jeramon elab.

‘Abdu’l-Bahá

JAR IN KEMOUR

Et eo Etam ej menin kemour io, O ao Anij, im ao kemejmej Yuk ej menin kejmour io, ebake Yuk ej ao kejatdrikdrik, im yokwe eo ao nan Yuk ej motta. Tiriamo eo Am nan io ej menin kemour im kejmour io ilo lalin im ilo lal eo ej itok. Kwe, ilo mol, Kwobrak kin menin jeramon, Eo ejelalokjen, Eo Dri meletlet otem meletlet.

Bahá’u’lláh

ARMIJ OTEMJIJ

O Kwe Iroij in jouij, Kwe Eo Kwojouij im maron! Kimij Drijilkam im emoj am koonwaj im bed iumin kejbarok eo Am. Kalimjek kim kin Mejam ejouij. Koromak mej ko mejam, karonlokjen lojilinim, im letok jelalokjen im yokwe nan buruom. Komman bwe jitob ko am ren monono im lanlin kin naan ko Am. O Iroij! kalikar nan kim ial eo nan ailin eo Am im kemour kim kin menwan Jitob Kwojarjar. Kejramon kin mour indreo im letok nan kim utiej eo ejelok jemlokin. Kobaik armij otemjij im kemram lok lalin an armij. Komman bwe kimin lor ial eo Am, kijorore tok ainemon eo Am im kabukot menin ittino ko ilo ailin eo Am. O Anij! Kobaik kimwoj im kobaik burom kin juon kotan eo eban jako. Emol, Kwe Dri letok, Kwe Dri jouij im Kwe Dri Maron tata.

’Abdu’l-Bahá

MARE

Kwoaibuijuij, O ao Anij! Emol, dri jerbal rein Am rej kobatok iumin ailurlur in tiriamo eo Am im rej kobatok kin jouij im tiriamo eo Am. O Iroij! Jiban ilo lal in Am im ailin eo Am im lelok nan ir men ko remmon jen jouij im yokwe eo Am. O Iroij! kabin ir ilo air jerbal nan Yuk im jiban ir ilo air jerbal nan Yuk. Komman bwe ren kokkale ko kokkalen Et eo Etam ilo lal eo Am im kejbarok ir kin kejramon ko Am rejamin jemlok ilo lalin im ilo lal eo ej itok . O Iroij! Rej oware ailin in tiriamo eo Am im kajitok jiban jen jikin eo Am ej make wot. Emol, rej mare ekkar nan kakien eo Am. Kommane bwe ren kokkale ko kokkalen ainemon im mour in ibbben dron nan jemlokin mour. Emol, Kwokajur Potata, Kwomonmon, im Dri maron potata!

‘Abdu’l-Bahá

JAR IN KWELOK KO

O ao Anij! O ao Anij! Emol, dri jerbal rein Am rej oktak waj nan Kwe, bukot jiban jen ailin in tiriamo eo Am. Emol, Am kwojarjar emoj an kinor waj ir im emoj air urur kin kijeek in yokwe eo Am, bukot kejramon jen ailin eo Am ekabwilonlon, ilo air kejetdrikdrik bwe renaj bed ilo ailin eo Am ilan. Emol, elab air kijoror in bok kejramon eo ej itok jen Kwe, ilo air konan bok meran jen al in mol. O Iroij! Komman bwe ren lamp ko reromak, kokkale ko kokkalen tiriamo, wijki ko eobrak leier im iju ko reromak. Komman bwe ren jutaklontak im bok kunaier ilo jerbal eo Am im koba waj Ibbam ilo korak in yokwe eo Am, ilo air kijoror in bok meram in kejramon eo Am. O Iroij! Komman bwe ren kokkalen tel, flag ko an ailin eo Am ejelok jemlokin, no ko noon lomalo in tiriamo eo Am, glass ko glass in meram in utiej potata eo Am.

Emol, Kwe Dri jouij. Emol, Kwe Dri tiriamo. Emol, Kwoaurok, Eo Jitenburu.

’Abdu’l-Bahá

JAR IN JIBON

O ao Anij im ao Master! Na ij dri jelkam im nejin dri jelkam. Emoj ao ruj tok jen ion kinio ilo jimarokin rainin einwot an Iju Ran in juon wot eo Am moj an romak tok jen jorantak in konan eo Am, im emoj an romak ion aolepen lal, ekkar nan ta eo emoj je im kakien kake ilo Buk ko Am.

Nebar Yuk, O ao Iroij, einwot am rujtok iumin meram in jelalokjen eo Am. Jilikinlaltak iom, bareinwot, O ao Anij, ta eo enaj kemaron kim bwe kemin ellok jen jabrewot ak Kwe wot, im jolok jabrewot men otmejij ijelokin wot Kwe. Kallikar nan io, bareinwot, im nan ro otemjij im rebake io, im ro nuku, man im kora jimor, kin men ko remmon ilo mour in im ilo mour eo tokelik. Kejbarok kim, bareinwot, kin kejbarok eo Am ejamin likjab, O Kwe eo Jitenburu an men in komanman otemjij im Konan eo an lan im lal, jen ro im Kwar kalikar ir bwe rej Dri Jerawiwi, im rej kabo armij otemjij. Kwokajur nan kommane ta eo Kwokonan. Emol, Kwe Dri Maron, Dri Jiban ilo ien uota, Eo Ej Bed kin E make.

Kejramon, O Iroij ao Anij, Eo im Kwar likit Ion aolepen Title ko Am remon tata, im ilo E Kwar kejbel emmon jen nana, im jiban kim bwe kemin kommane ta eo Kwokonan. Kejramon, bareinwot, O ao Anij, Ro im rej Naan im Leta ko Am, im ro im emoj air oktak im rewaj nan Yuk, im ronjake kir eo Am.

Emol, Kwoj Iroij im King an armij otemjij, im maron ion aolep men otemjij.

Bahá’u’lláh

JAR EO EKADU

(SHORT OBLIGATORY PRAYER)

Jar kake juon allen ilo 24 awa otemjij, ilo raeleb

Ij kamol, O ao Anij, bwe Kwar kommane io bwe in jela kin Yuk im kabun nan Yuk. Ij kwalok, ilo ien in, ao mojno im Am kajur, ao jeramol im Am jeramon. Ejelok bar Anij Ijelokim, Eo ej jiban ilo ien uota, Eo ej mour kin E make.

Bahá’u’lláh

*****

O Kwe Eo Anij erreo im ejellok jonan An kajur! O Kwe ao Iroij ejoij! Letok non kim kajur eo Enaj kemaron kim non am jutak bin jen menin kabo Ko an lal in, im letok non kim Maron eo enaj komone noon kotobar ko am, Einwot ito Lometo in Pacific in, Non air tobraklok ion kabbe ko ilo Rear im Relik. (‘Abdu’l-Bahá)


Copyright 1999, The Bahá'í Community of the Marshall Islands