Zur Startseite von Radio Bremen Zur ARD
         
 
         
 
Der Monatsrückblick auf Latein
      Nuntii Latini mensis Septembris 2005
 
    AudioAuscultandi facultas
     

 

  Factionum victricium clades
Electionibus parlamenti Germaniae praemature habitis Rubrorum et Viridium coalitio Gerhard Schröder cancellarii repulsam accepit. Attamen aemulae eius Angela Merkel Democratae Christianae non contigit, ut sua et Liberalium factionibus solis nisa posset gubernacula civitatis obtinere. Rerum politicarum periti existimant per aliquot septimanas in suspenso futurum, quis denique cancellarii munere fungi possit.
  Praesidia de territorio Gazae deducta
Avi Koshavi cohortium praefectus territorium Gazae per duodequadraginta annos obsessum postremus militum Israelianorum reliquit. Quem discessum myriades Palaestinensium celebraverunt; Mahmoud Abbas, eorum praesidens, declaravit hunc diem memoriae maxime esse dignum.

cohortium praefectus – Brigadegeneral – brigadier
myriades – zehntausende – tens of thousands
  Orae Civitatum Unitarum Americae vastatae
Typhon ille maximus Katrina vocatus Alabamam, Mississippi, Louisianam civitates Americae septentrionalis devastavit. Timor est, ne complura milia hominum vitas amiserint, plus milione tecto careant. Novum Aurelianum urbs maximam partem inundata atque diruta est. Administratio per aliquot dies munere functa non est. Tardus George Bush Civitatum Unitarum praesidens hominibus typhone illo afflictis ampla subsidia praebitum iri pronuntiavit.
Vix quattuor septimanis post novus typhon Rita nominatus regiones maritimas Louisianae et Texas civitatum vastavit. Cum autem tres dimidiaque miliones hominum a magistratibus moniti in tempore in loca tutiora fugerant, nulla fere mors deploranda erat. At nonnulla loca inundata sunt, in iis denuo partes quaedam urbis Novi Aureliani.

typhon – Hurrikan – hurricane
Novum Aurelianum – New Orleans
  Simon Wiesenthal mortuus
Simon Wiesenthal e Galicia ortus, illius genocidii Iudaeorum superstes idemque antisemitismi et discriminationis quorumcumque gentium oppugnator acerrimus, anno vitae nonagesimo septimo decessit. Huius familia tota inter tyrannidem illam Nationalium Socialistarum pessimam interfecta erat, ipse diversis concentrationis campis superfuit. Post bellum mundanum secundum summo studio effecit, ut plus mille eorum, qui inter illam tyrannidem facinora immania commiserant, comprehenderentur et poenas darent.
  Cum dignitate otium
Necopinato Henning Scherf civium Bremensium magister declaravit se munere abdicaturum. Se id consilium privatis de causis cepisse in conventu Socialium Democratarum Bremensium dixit. Ille per viginti septem annos senatui Bremensi intererat, per hos decem annos rei publicae Bremae praeerat coalitione Democratarum Socialium et Christianorum nisus.
  Eruditio Germanorum adhuc mediocris
Germanos, quamquam eruditionem iuvenum meliorem effecerint, tamen in ea re etiam nunc a nationibus industria potentioribus superari e studiis virorum doctorum Ordinis Cooperationis Oeconomicae (OECD) apparet. Numerum enim eorum, qui studia litterarum absolverint, in Germania adhuc exiguum esse affirmant.
  Regina ventorum
In oppido Cuxhaven ventirota erigi incepta est, qua est nulla umquam fortior facta. Exspectatur hanc ventirotam altitudine plus quam centum septuaginta metrorum tantam vim electricam generaturam esse, quanta quindecim milibus fere hominum usui sit. Consilium est, ut hoc opus iam anno exeunte paratum sit.
  Villa rustica ordinatro detecta
Vir Parmensis interretis studiosissimus domi ad ordinatrum sedens novo programmate nomine Google Earth, quod satellitibus caelestibus nititur, villam rusticam Romanam detexit. In explorando, qualis esset patriae ex alto aspectus ad Sorbolo vicum in solo miram quandam formam conspexit. Et invenerunt archaeologi statim de ea re certiores facti ibi fundamenta villae antiquae.

interrete – Internet
ordinatrum - Computer
  QUID SIT FUTURUM: Sic itur ad astra
. Libra die somnique pares ubi fecerit horas
. et medium luci atque umbris iam dividit orbem…
. [Verg.Georg. I 208 f.],
sidus hominibus amicum caelum ornat. Qui Libra sidere natus est, ad librandum inclinatur; itaque iustitiam ei propriam esse constat. Si quae controversia oritur, non potest esse ullius partis studiosus, quod sciat esse aliquid iuris in utraque ratione. Homo tali iustitia imbutus comitate atque concordia indiget Venere auctore. Nemo deis carior est et ingenio abundantior, in primis Musarum donis.
Vergilius poeta, Librarius illustris, suam naturam hilarem esse demonstravit iam hora, qua genitus est [Suet. De Poetis, Verg. 4]:
. Ferunt infantem, ut sit editus, neque vagisse et adeo
. miti vultu fuisse, ut haud dubiam spem prosperioris
. geniturae iam tum daret.

Quam prosperiorem genituram poeta praedicit omnibus benignis hominibus puero modo nato canens [Verg. Ecl. 4, 60-63]:

. Incipe, parve puer, risu cognoscere matrem:
. matri longa decem tulerunt fastidia menses.
. Incipe, parve puer: qui non risere parenti,
. nec deus hunc mensa, dea nec dignata cubili est.


  NOTABILIA: Romani ad Rhenum, Nicrum, Danuvium flumina
In Badenia-Virtemberga series exhibitionum, quibus tempus imperii Romani illustratur, Stuttgardiae continuatur. Ibi enim spectari cognoscive potest, quas reliquias Romanas saeculorum primi, secundi, tertii archaeologi his quinquaginta annis invenerint quaeque ex his rebus collegerint. Inter alia de illis temporibus proponuntur haec: quales ad gentes Romani venerint expugnatores, qualia circumiacentia fuerint, quae fuerint religiones, quomodo vitae actae, res gestae, mercaturae factae, res militares habitae sint.Plura de hac exhibitione inveniuntur in interreti sub hac inscriptione:
www.imperium-romanum-2005.de

Roms Provinzen an Neckar, Rhein und Donau
[1.10.2005 – 8.1.2006]
Kunstgebäude Stuttgart
Schlossplatz 2
70173 Stuttgart

  XENIUM: Hereditate M. Tullii Ciceronis discipuli totius Europae sociantur
Quotannis mense Maio per nonnullos dies caput Latinitatis summo in monte invenitur: Arpini in oppidulo, i.e. loco natali M.Tullii Ciceronis, ubi ex viginti quinque annis Certamen Ciceronianum Arpinas habetur, quod est certamen Europaeum linguae Latinae.
Ad hoc discipuli discipulaeque ultimarum paenultimarumque classium Gymnasiorum invitantur, qui libenter litteras Latinas legunt et bene convertere possunt. Et adeunt quotannis sescenti fere discipuli discipulaeque ex universa Europa Arpinum, ut scientiam linguae Latinae probent. Proba enim scripta quinque horarum absolvenda est, i.e. capitulum aliquod Ciceronianum in patrium sermonem vertendum et explicandum est.
Qui optime verterunt, palmis in foro sollemniter assignatis et laudem summam et praemia magnifica ferunt. Attamen non solum victoribus, sed omnibus, qui intersunt, certamen est quoddam unicum, quoniam sermonibus numerosis iuvenum amicitiae inter nationes iunguntur ac programma culturale varium omnes labores probae scriptae compensat. Excursiones enim iucundae suscipiuntur, exempli gratia ad monasterium Casinense ordinis Benedicti. Praeterea iucundum: Solum viaticum impendendum est, cum hospitium victusque gratia largitorum gratis praebeantur.
Plura invenies in interretiali pagina certaminis:
www.certamenciceronianum.it


Hoc XENIUM debemus Christian Lüchow,
discipulo gymnasii Hyffertiani Warburgensis,
qui hoc anno certamini interfuit.


       
    LinkDeutsche Version
       
  Download und Podcast
      Die neusten Latein-Nachrichten als MP3-Download:
    MP3(Bitte Geduld, Angebot wird aktualisiert)
      Adresse für das Podcast-Abonnement:
      http://www.radiobremen.de/podcast/latein/
      Kopieren Sie einfach die (graue) Adresse und fügen Sie sie dann in Ihr Podcast-Programm ein.
     
    ArchivArchiv
     
    DruckversionDruckversion
 
Info
Das Übersetzerteam:  Dr. Franz Hartmann,  Kurt Hille, Dr. Heinrich Fliedner, York Grüninger,  Isabella Grüninger, Volker Lütjens, Hannelore Zöllner
     
Link Das Übersetzerteam:
Volker Lütjens, Dr. Heinrich Fliedner, Kurt Hille, Dr. Franz Hartmann, Hannelore Zöllner, Isabella Grüninger und York Grüninger (v.l.) gehören zu unserer Latein-Redaktion und sind alle Lehrer.
 
     
Link Latein-Podcast
Podcasting ermöglicht es, Beiträge zeitversetzt am Computer und sogar auch ortsunabhängig mit einem MP3-Player anzuhören. Hierfür laden Sie sich einfach die entsprechende Datei herunter. Die neuesten Latein-Nachrichten als MP3-Download und die Podcast-Adresse finden Sie am Ende dieser Seite.
 
     
Link Buchrezensionen - Librorum Angulus
Bücher in lateinischer Sprache und Buchbeschreibungen auf Latein und Deutsch.
 
     
Link Mit der Latein-Redaktion im Weserstadion
Ein Bericht über Latein im Stadion und ein Kommentar des Spiels Werder Bremen - Bochum von Dr. Franz Hartmann.
 
     
Link Forum
Epistulae lectorum auscultatorumque.
 
     
Link In eigener Sache
Nachrichten in lateinischer Sprache sind doch noch etwas Besonderes.
 
     
Link Archiv
Recherchieren Sie Lateinmeldungen zurück bis in den Oktober 2001.
 
     
 
 
   
  © Radio Bremen
Footer Nachrichten