Сапраўдны партазан, як вядома, зьяўлаецца калі захоча альбо калі мусіць - так ці інакш гэты момант прадбачыць цяжка. Амаль год пасьля выхаду першага нумару часопісу
pARTisan, зьявіўся яго й другі нумар. Новы нумар засяроджваецца на тэме культура і дэмакратыя; як выглядае роля і сытуацыя культуры ў дэмакратычным сьвеце. Як і ў першым, таксама і ў новым нумары
pARTisana шмат разнагалосных гіпотэзаў ды непаўторных здымак. Аматары сучаснага мастацтва знойдуць у ім некалькі сапраўдных рарытэтаў.
Часопіс pARTisan, якога рэдактарам зьяўляецца прэзыдэнт менскае Асацыяцыі Сучаснага Мастацтва Артур Клінаў, прысьвечаны пытаньням сучаснага інтэлектуальнага й культурнага жыцьця Беларусі. У першым нумары знайшліся між іншым цікавыя матэрыялы пра найважнейшыя падзеі ў беларускім сучасным мастацтве на працягу апошняга дзесяцігодзьдзя, унікальныя фатаграфіі ды размовы зь вядучымі дзеячамі беларускай культуры. У лістападзе 2003 выйдзе чарговы нумар часопісу.
