Yleisradio searvvai davviriikkalaš sámegiel tv-ođđasiidda jagi 2002 álggus. Norgga riikkaradio NRK ja Ruoŧa televišuvdna SVT ledje álggahan oktasaš TV-ođđasiid sámegillii čakčat 2001. Álggos TV-ođđasat ledje árgabeivviid logi minuhta viđa geardde vahkus. Jagi 2002 álggu rájes golmma riikka oktasaš tv-ođđasiid sáddenáigi lea árgabeivviid 15 minuhta viđa geardde vahkus. Tv-ođasdoaimma várás Yleisradio lea skáhppon Anárii videorusttegiid. YLE Sámi radio oaččui moadde virggi tv-ođđasiid buvttádemi várás. Ođđasiid lassin Suomas eai leat eará bistevaš sámegiel tv-sáddagat. YLE sádde riikkakanálain muhtimin guhkit prográmmaid sámegillii, maid dávjá leat buvttadan juogo NRK dahje SVT. NRK Sámi radio dan sadjái buvttada tv-prográmmaid sullii 20 diimmu jagis NRK tv-sáddagiidda. Eanaš dáid sáddagiin leat mánáid- ja nuoraidprográmmat, áiggeguovdilis magasiinnat ja tv-dokumentárat. Maiddái Ruoŧa TV:s lea sámegielat doaimmahus Gironis. Dat buvttada magasiidna- ja mánáidprográmmaid sullii logi diimmu jagis SVT riikkasáddagiidda. ***