Санаа алдалт

Манайхан их сонирхолтой хүмүүс. Толгойтой бүхэн дэлхийн алдартай фирмийн хувцас өмсч, хамгийн хамгийн тодотголтой бараа бүтээгдэхүүнээс сонгон хэрэглэдэг гээч. Дэлхийн нэг номерийн барааны савангаас өгсүүлээд л хамгийн сайн, гайхамшигт оогоор шүдээ угаана. Бас болоогүй ээ, бүгд л дэлхийн шилдэг загвар өмсөгчдийн хэрэглэдэг чимэглэлээр гоёж, ориг сүрчиг үнэртүүлэхийг нь яана. Ингээд бодохоор манайх шиг баян ард түмэн хаана байна.

Муушаал

Ядуу буурай орны нэрийг зүүж, гадаадын өндөр хөгжилтэй орнуудаас тусламж дэмжлэг авах дээрээ тулахаар манайх шиг ядуу ард түмэнтэй улс харин байхгүй шүү. Эрхэм түшээд маань энд тэндээс буцалтгүй тусламж авахдаа л буурай хөгжилтэй, ядруухан амьдралаа санадаг хэрнээ ард түмэн нь ядуу, тарчиг байгааг мартаад л байгаа юм. Аргагүй дээ, телевизийн сурталчилгааг үзээд суухаар нүд орой дээрээ гарч байгаа юм чинь. Дэлхийн жишигт нийцсэн гар нүүрийн саван, өндөр технологиор бүтээгдсэн ариун цэврийн цаас, жинхэнэ монгол хүний арьсанд зориулсан энгэсэг, дэлхийд хүлээн зөвшөөрөгдсөн нэг номерийн оонууд, хамгийн хямд тэгсэн хэрнээ хамгийн чанартай нүүрний будаг, шилдэг шилдэг моделуудын хэрэглэдэг шампунь, хамгийн алдартай Jorgio Armani, Max Mara, Cristian Dior, Coco Channel -йин хувцаснууд.

Үнэнийг хэлэхэд шилдэг бүхнээс залхаж байна. Энэ бүгдээс болоод манай оронд чанаргүй бараа, муу бүтээгдэхүүн байхгүй боллоо. Одоо бүр нэг номерийн Фм радио, шилдэг телевизийн суваг, хамгийн олон захиалагатай сонин, хамгийн өндөр хурдтай интернэт. Бүгд шилдэг, саак юм чинь би алийг нь сонгох болж байна аа. Эмгэнэлтэй ч юм шиг, инээдтэй ч юм шиг. Инээгээд байх ч юу байхав дээ. Ийм хангалуун нийгэмд амьдарч байгаагаа сонсох таатай л даа. Гэхдээ энэ бүхэн бидэнд ямар хэрэгтэй юм бэ? Яахав дээ, үнэтэй хувцас өмсөө л биз. Гэлээ гээд Монгол ядуугаараа дуудуулсан хэвээрээ л байна. Танай орон ядуу учраас чиний өмссөн хувцас хулхи. Миний нэг найз 200,000 төгрөгийн цалинтай хэрнээ Playboy-ын зүүлт авсан гэвэл би лав эргэлзэнэ. Ямар нэг зүйл хийж дээ гэсэн сэжиг төрнө биз дээ. Хаана амьдарч байгаа билээ дээ бид чинь.
Бүх зүйлийг хувилчихаж чаддаг Хятадтай хиллэн оршиж байж энэ мэтийн элдэв сурталчилгаанд итгэж, хуурамч бараа, хулхи брэндээр гоёод яах ч юм билээ. Жаахан өөдрөгөөр бодоод манайхыг ядуу буурай орон учраас үнэтэй хувцсаа талын талын тал үнээр нь худалддаг том пүүсүүдэд баярлах нь зүйтэй байх. Хятад гэснээс бидний хэрэглэж байгаа бүх зүйлсийн 90 хувь нь хятад гэж итгэлтэй хэлмээр байна. Худлаа гэж хэлэх хүн байхгүй л болов уу. Үг дуугүй л толгой дохино. Харин сайн чанарын нүүрний будаг, биеийн тос хэрэглэж байгаа эмэгтэйчүүд ээ, Монголоос худалдаж авсан үнэтэй бүтээгдэхүүнээ сайн хараад байгаарай. e үсэгтэй байгаа. Энийг нөгөө наймаачид чинь е витамин гээд л хэнэг ч үгүй тайлбарлаж орхино. Өөрсдийнхөө таамгаар л танд рекламдана шүү дээ. Харамсалтай нь е тэмдэгт нь ямар ч төрлийн витамин, амин дэмийн орц бус ядуу буурай орнуудад импортолдог доод зэрэглэлийн барааны тэмдэгт байгаа юм. За тэгээд энийг уншлаа гээд будаг шунхаа хаяна гэж байхгүй биз дээ. Зүгээр л нэг номерийн хэрэглээтэй гэдэгтээ нэг их битгий итгээрэй л гэж хэлэх гэсэн юм.

Сайшаал

Гадаадад бүх зүйл сайхан байдаг гэсэн ойлголт хаа сайгүй. Хаа сайгүй тархсан мэдээллээс харахад л ойлгомжтиой. Гадаадад ажиллахаар хөл алдан гүйцгээж буй монголчууд сайн сайхны төлөө л хийж чадах зүйлээрээ тэмцэж байгаа нь тэр. Үнэндээ Америк, Канадад байгаа монголчууд үнэн дийлчихсэн амьдарч байгааг би нүдээрээ үзсэн. Манай сайдуудын унаж амжаагүй машиныг хөлөглөж, гадаадын кинон дээр гардаг байшинд амьдарна. Сайхан мэдээ байгаа биз. Харамсалтай нь тэд Монголд, эх орондоо ингэж амьдарч чадахгүй байна. Уг нь монгол хүмүүсийн оюуны цар хүрээ хийгээд хөдөлмөрийн чадавхийг гайхуулж байгаа үзүүлэлт хаана ч өндөрт бичигддэг. Харин манайхны талаарх мэдээлэл алт олборлогч нинжа, нүүрсний хулгай болоод танк гэгдэх муу усны сувгаар оромж хийсэн хүүхдүүд.