‘M**r ’n boer’: Minister moet opdok

’n Boer van Bultfontein, Pretoria, wat glo onregmatig deur die polisie gearresteer, aangehou en aangerand is nadat ’n lyk in 2002 op ’n plaas gekry is, moet skadevergoeding van R500 000 kry.

Mnr. Willie Nel (44) en die minister van veiligheid en sekuriteit het gister in ’n skikking op die bedrag ooreengekom.
Dit is ’n bevel van die hooggeregshof in Pretoria gemaak.

Luidens hofstukke is Nel op 3 Desember 2002 deur ene mnr. Bhana, insp. Logan Moonsamy en sers. Tommy Pooko in die Lusthof-hoewegebied, Bultfontein, gearresteer sonder dat enige redelike verdenking vir sy aanhouding bestaan het.

Hy is die daaropvolgende 16 dae aangehou by vier polisiekantore en in ’n huis in Laudium, Pretoria.

Luidens die hofstukke is sy voete aan ’n tafelpoot vasgeboei; hy is op die niere geskop; hy het bloed geürineer; en Pooko het gesê hy (Nel) het nog nie gesien “hoe m**r ek ’n boer nie”.

Volgens Nel is hy op 3 Desember 2002 “ernstig aangerand” deur dié drie. Hy is “vier keer onmiddellik agtereenvolgens met ’n elektriese stroom geskok”.

Hy het op die “kaal sementvloer” in die sel geslaap “terwyl sy hele liggaam geruk het van die pyn”.

Luidens ’n sielkundige verslag wat einde Augustus vanjaar oor Nel opgestel is, het Nel se vrou, Esther (48), verwys na “verskeie arrestasies en sake” wat teen haar en haar man aanhangig gemaak is.

Mnr. Nel het aan die sielkundige gesê: “Ek lê die hele nag wakker...’n mens weet nie wanneer hulle weer kom nie... hulle het selfs met helikopters gekom...”

Volgens die sielkundige het mnr. Nel gesê hy, sy vrou en sy vriend, mnr. Marius Bouwer (nou ’n advokaat), is gearresteer nadat ’n lyk ontdek is.

Luidens die verslag is mnr. Nel beskuldig van voorvalle sedert 2002, waaronder 12 aanklagte van poging tot moord.

Die saak teen hom is finaal op 14 Desember 2005 teruggetrek.

Volgens die sielkundige ly hy aan ernstige angsversteuring.

• Die hooggeregshof het in Desember 2008 gelas dié minister moet R2050 00 aan Bouwer betaal.