ANC, DA stuur swaargewigte na O-K
2011-04-29 23:21
- Artikelopsies
- Deel
- Kry Die Burger op
Port Elizabeth - Die ANC en die DA stuur die naweek hul swaargewig-politici na die Nelson Mandelabaai-metropool en elders in die provinsie om steun onder kiesers te werf vir die komende munisipale verkiesing.
Me. Helen Zille, DA-leier, gaan Sondag as deel van die Werkersdagvieringe kiesers by die ETC-konferensiesentrum in Uitenhageweg oor werkskepping toespreek. Mnre. Athol Trollip, DA-parlementêre leier, en Bonginkosi Madikizela, Wes-Kaapse LUR vir huisvesting, gaan ook die saamtrek bywoon.
Cosatu gaan op sy beurt kragte saamspan met die ANC en môre twee gedenklesings onderskeidelik in die Baai en Oos-Londen hou, sowel as vier saamtrekke reg oor die provinsie op Sondag.
Me. Thozama Mantashe, tweede adjunkpresident van Nehawu, gaan môre om 18:00 die John Gomomo-gedenklesing by die Veremarksaal in die Baai lewer. Op sy beurt gaan mnr. Irvin Jim, Numsa se sekretaris-generaal, ook vandag om 18:00 die Thozamile Gqwetha-gedenklesing in die Oos-Londen-stadsaal lewer.
Jim, mnre. Phumulo Masualle, Oos-Kaapse LUR vir finansies, en Fikile Mbalula, minister van sport, gaan die saamtrek by die Sisa Dukashe-stadion in Oos-Londen bywoon.
Mantashe, me. Nomaindia Mfeketo, ANC-uitvoerende lid, en Lindelwa Dunjwa, SAKP-sentrale komiteelid, gaan die saamtrek om 10:00 by die Dan Qeqe-stadion in Port Elizabeth bywoon.
In Queenstown gaan mnr. Senzeni Zokwana, NUM-president, me. Jessie Duarte, ANC-uitvoerende komiteelid en mnr. Xolile Nqatha, SAKP-sentrale komiteelid, dié saamtrek in die binnenshuise sportsentrum bywoon.
Die Mthatha-saamtrek sal deur me. Zingiswa Losi, tweede adjunkpresident van Cosatu, me. Baleka Mbete, ANC-uitvoerende komiteelid, mnre. Mandla Makupula en Madoda Sambatha, SAKP-sentrale komiteelede, bygewoon word. Dit word gehou in die ouditorium van die Walter Sisulu-universiteit.
- Die Burger