www.ch.ch - Pagina iniziala

Chanzlia federala, secziun da l'administraziun electronica

Localisar

icon_stellenportal
icon_behoerdenverzeichnis
icon_wahlen
icon_ebuku
icon_gefahren

Infurmaziuns


Documents d'identitad per persunas ch'èn burgaisas da la Svizra

Persunas ch'èn burgaisas da la Svizra han il dretg d'in passaport u d'ina carta d'identitad, sch'i na s'opponan nagins motivs legals cunter quai. Quests documents servan a cumprovar l'identitad e la naziunalitad svizra.

Il passaport svizzer actual (passaport 10) è munì cun in chip da datas, sin il qual èn registradas ina fotografia da la fatscha da la possessura u dal possessur dal document d'identitad sco er duas improntas da dets. Ils models da passaport pli vegls (passaport 03 e 06) na pon betg pli vegnir empustads; els restan dentant valaivels fin a la scadenza da lur durada. Medemamain pon ins empustar ina carta d'identitad senza chip da datas. Il passaport e la carta d'identitad èn valaivels durant 10 onns per persunas creschidas. Tgi che dumonda il passaport e la carta d'identitad il medem mument, po profitar d'ina buna purschida cumbinada. Faschai diever da l'empustaziun online.

Fin la fin da l'onn 2016 duain vegnir renovads il passaport e la carta d'identitad. Sco tar las bancnotas èsi necessari da far quai en intervals regulars. Pertutgant la carta d'identitad duain las burgaisas ed ils burgais pudair eleger – ultra dal model senza chip – tranter trais ulteriurs models cun chip: in cun datas electronicas arcunadas (sco il passaport), in cun ina identitad electronica per las applicaziuns dad e-government e dad e-business sco er in cun datas electronicas arcunadas e cun identitad electronica.
La carta d'identitad vegn ad interim emessa en sia furma actuala, pia senza chip da datas e senza infurmaziuns registradas electronicamain. Il cussegl federal vegn a decider pli tard, sche las cartas d’identitad svizras vegnan medemamain munidas en il futur cun in chip da datas.

Uschia pudais Vus far ina dumonda per in document d'identitad

Svizras e Svizzers a l'exteriur

Sche Vus avais dumondas davart in document empustà u davart il termin per la registraziun da las datas biometricas contactai per plaschair:
Posts chantunals da passaports e proceders en ils singuls chantuns
A l'exteriur: Ambassadas e consulats da la Svizra

Perdita u engol d'in document d'identitad

Sch'ins perda in document d'identitad u sch'el vegn engulà, sto quai vegnir annunzià uschè svelt sco pussaivel a la polizia locala. Per dumandar in document d'identitad da reserva en Svizra u a l'exteriur sto esser avant maun in avis da perdita d'in post da polizia svizzer u ester. Svizras e Svizzers a l'exteriur ston ultra da quai avisar la perdita a la represchentanza svizra da lur pajais da domicil. Sch'in document va a perder, daventa el nunvalaivel. In document d'identitad ch'è annunzià sco pers u sco engulà vegn publitgà naziunalmain ed internaziunalmain per la tschertga. In document d'identitad ch'è vegnì chattà na dastga pervia da quai betg pli vegnir duvrà vinavant da la possessura u dal possessur e sto vegnir surdà ad ina autoritad emettenta. Quella fa ch'el daventa nunduvrabel. Infurmaziuns pli detagliadas chattais Vus sut:
Passaport svizzer - Documents d'identitad Quest simbol signifitgescha ch'il link maina sin ina pagina externa. Vus As chattais alura ordaifer noss servetsch e nus n'avain nagina responsabladad per quels cuntegns.


Enavos tar la survista Documents da legitimaziun ed attestaziuns