人力單車陣「佔領皇后」

【明報專訊】人民力量噚日朝早11點，搵咗27架單車同3架私家車喺中環慢駛，發起第二次「流動佔中」，歷時個半鐘，車隊喺遮打道出發，聲稱係呼應舉辦佔中嘅地點，之後沿美利道、皇后大道中及德輔道中行咗個圈。車隊一度霸佔晒皇后大道中所有行車線，造成小型交通擠塞，有部分私家車司機經過車隊時就以粗口大罵，亦有唔少市民舉機影相。





踩單車嘅成員有譚得志（快必）、譚香文、甄燊港，人力主席袁彌明就坐喺私家車陪住一齊慢駛，佢哋沿途大叫口號「十月佔中，公民抗命」。快必話活動係希望宣傳佔中，鼓勵大家自發組織公民抗命，又叫市民體諒吓將會出現嘅交通癱瘓。喺真正佔中之前，人力仲會發動多兩次流動佔中，快必話諗過搵3架私家車喺告士打道停駛喎。





運輸署噚日話，無就呢個活動收到交通擠塞報告。警方回應話，中午約12點遮打道近皇后像廣場發現一輛私家車於限制區內上落客，人員於是截停該車，並向該名姓林男司機發出定額罰款通知書。據Emily現場睇，袁彌明就喺呢架私家車上。