Aruba

E artículo aki ta skirbí na papiamento. Lo ta apresiá si por mantené e artículo aki na estilo di papiamento.

---

Aruba

Bandera Wapen
Himno: Aruba Dushi Tera
Capital	Oranjestad
Stad mas grandi	Oranjestad
Idioma(nan) oficial	Hulandes , Papiamento desde 2003
Forma di gobernacion - Rei - Gobernador - Prome Minister	Democracia parlamentario Monarkia constitucional Willem-Alexander Fredis Refunjol Mike Eman
Pais den Reino di Hulanda Status aparte	1 januari di 1986
Area  - Total  - Awa (%)	193 km² (n/a) {{{persentahe_awa}}}
Populacion  - 2005 est.  - Densidad	110.000 (n/a) {{{densidad_pop}}}/km² ({{{rango_densidad_pop}}})
Moneda	Florin (533) (AWG)
Zona di tempo	(UTC-4)
TLD di internet	.aw
Codigo pa yama	+297

Aruba ta un isla cu geograficamente ta keda den e parti mas zuid di e laman Caribe. E ta situa 27 km noord di e Peninsula di Paraguana, Estado Falcon, Venezuela. E islanan Aruba, Bonaire y Curaçao, tur tres situa dilanti di e costa noord di Sur-America. E islanan tambe ta conoci como Islanan ABC. Aruba ta un pais cu como pais-miembro ta forma parti di e Reino Hulandes como un partner, hunto cu Antia Hulandes y Hulanda como un pais autonomo, difini den Status Aparte cu ta na vigor desde 1 di januari 1986. Prome cu 1 di januari 1986 Aruba aforma parti di e pais Antia Hulandes, cu te cu e tempo ey tabata consisti di e seis islanan Aruba, Bonaire, Curaçao, Saba, Sint Eustatius y Sint Maarten. Riba 10 di october 2010 e pais Antia Hulandes a wordo desolvi y Curaçao cu Sint Maarten a haña mescos cu Aruba un Status Aparte. Bonaire, Saba y Sint Eustatius, e asina yama 'Islanan BES" a haña e status di municipio special di Hulanda. Aruba ta culturalmente hopi liga na Curaçao y Bonaire, entre otro door cu na tur tres isla ta papia e mes un idioma, esta Papiamento.

Historia

Articulo principal: Historia di Aruba

E prome habitantenan di Aruba tawata Indjan Arawak cu a bin for di Venezuela. Alonso de Ojeda, un explorado Spaño, a descubri Aruba alrededor di 1499. E prome mapa cu Aruba ta parece riba ta pinta pa e cartograf Juan de la Cosa, cu a compaña Ojeda, y asina e exploracion y colonisacion di Aruba a keda inicia pa e Spañonan. Te cu na mas of menos aña 1636 Peter Stuyvesant cu anteriormente tawata na e colonianan Hulandes na Brazil, a bin ocupa Aruba pa e West Indische Compagnie Hulandes, cu a adkeri nan prome colonia Americano den e region di awe New York, pero na aña 1791 a stop di existi y a traspasa e isla den man di e gobierno Hulandes. Aruba a sigui como colonia Hulandes bou di e Bataafse Republiek y despues Republiek der Nederlanden. Na 1805 e Inglesnan a ocupa Aruba pa un tempo corto y na 1816 Aruba a haya bishita di e General Francisco de Miranda, compaña pa un grupo grandi di 'freedom fighters' cu a parti un proclamacion dirigi na e habitantenan di Aruba, den cual a splica nan intencion di libera e paisnan latino Americano. E Hulandesnan a ocupa Aruba despues bek, unda te awe bou di e statuut di Reino ta bou di e dominio y poder colonial Hulandes como un nacion y pais cu den e Reino Hulandes ainda ta den e proceso di su decolonisacion , segun e mandatonan duna pa e pueblo di Aruba desde 1947, 1977, 1983. For di 1816 Aruba como parti di e colonianan Hulandes prome bou di e West-Indische Co. y te na aña 1845 bou di e nomber di "Curaçao en onderhorige eilanden" cu despues a bira "Antia Hulandes" cu mescos cu e statuut impone na 1954 tawata temporario, Aruba a keda forma parti di dje te cu, cumpliendo cu e proceso di nos decolonisacion, na 1985 a bira Nacion y Pais separa, para riba nos mes, independiente den Reino, faltando pa na 1996 a aboli e statuut pa a yega na e Reino Hulandes den forma di un commonwealth, manera tawata e mandato di e pueblo di Aruba desde 1947 (pa a bira di cuater pais di e commonwealth), ripiti na 1977 y acorda na 1983.

Politica

Mira articulo principal: Politica di Aruba

E movimento pa Aruba su decolonisacion y independencia a cuminsa for di aña 30 cu Aruba a pidi pa cuminsa para riba su mes y na augustus 1947, Aruba a presenta su prome "Staatsreglement" (constitucion), pa Aruba su "status aparte" como un nacion y pais independiente cu e status di un estado autonomo den e Reino Hulandes den forma di un Commonwealth Hulandes, segun e ehempel di e Statuut di Westminster di 1931 di e Commonwealth Britanico. Na e Coferencia di Mesa Rondo (Hulandes: Ronde Tafel Conferentie, RTC) na 1948 a presenta e deseo y mandato aki di e Pueblo di Aruba pa a bira e di cuater pais independiente den un reino den forma di un commonwealth. Pero na 1954 cu a impone e Statuut, e status obteni pa Aruba tawata di un Teritorio Insular Autonomo di un "pais" cu a ser yama "Antia Hulandes". Na e Coferencia di Mesa Rondo di 1981 y 1983 a trece e mandato di 1977 di e Pueblo di Aruba, logrando e acuerdo di Aruba su decolonisacion, cu Betico a yama "un acuerdo di diamanta" Na 1986 Aruba a realisa su status di pais separa y independiente y di estado miembro di e Reino Hulandes, pero te awe Hulanda no kier cumpli cu e abolicion di e statuut colonisado impone for di 1954. Nan a disfrasa y camufla nan dominio y poder colonisado impone desde 1954 como supuesto "lazonan di un federacion".

Dia 24 di november 1955,(a aproba e Escudo di Aruba dia 15 di november 1955) J. Irausquin di Aruba di e partido politico PPA (Partido Patrico Arubano) a presenta un discurso dilanti di e United Nations Trust Committee (Comite Fiduciario di Nacion Uni) pa a splica e situacion cu a keda acepta temporalmente. El a finalisa su discurso bisando cu den futuro tin mas cambio ainda pa bin, y cu e ta espera di por conta riba e mesun bon diligencia y cooperacion.

Na 1972 a continua cu e proceso di decolonisacion y independencia. Esaki a inicia for di aña 40 na un conferencia na Surnam unda cu Betico Croes di partido MEP (Movimiento Electoral di Pueblo) a propone tambe un "sui-generis" Dutch Commonwealth di cuater pais y estado independiente miembro: Aruba, Hulanda, Surnam y Antia Hulandes, cada un cu su propio soberania y identidad nacional. Mr. C. Yarzagaray, representando e partido politico AVP (Arubaanse Volkspartij), a propone pa tiene un referendum pa e pueblo mes dicidi su propio destino y a proclama cu: "Aruba hamas lo acepta un federacion niun nacionalidad di segundo categoria".

Betico Croes mesora a inicia na Aruba un campaña pa informa y prepara e pueblo di Aruba pa Aruba su independencia politico y un status aparte den un commonwealth Hulandes liber di tur resto di colonisacion. Na 1974 e Ministro di Structura Estatal a percura pa publica e "Witboek over de Status Aparte", y na maart 1976, un comite nombra pa gobierno di Aruba a logra keda cla cu tur preparacion pa a introduci e bandera y himno nacional di Aruba como e dos simbolonan di Aruba su soberania y independencia, y hunto tambe a fiha 18 di maart 1981 como fecha pa Aruba su independencia como pais completamente separa y independiente cu un status aparte como estado miembro di un commonwealth nobo, moderno, bou di un statuut dor di cual lo a elimina pa semper e gran berguensa di tur e resto di dominio y poder colonial. A sigui na maart 1977, cu e referendum (Aruba a ser obliga pa a yama e referendum aki un 'encuesta', pasobra pa ley Aruba no tawata permiti pa tiene un referendum) pa e pueblo mes determina su futuro cu a ser teni cu e sosten di e Nacion Uni y 82% di e votadonan a scohe pa independencia: pa Aruba ta un pais riba su mes, y cu derecho di ta un estado miembro di un comonwealth nobo, moderno Hulandes, manera tawata e deseo di e pueblo ya for di añanan 40, pa Aruba iguala cu e otro cuater paisnan cada un como Estadonan di Miembro lo a obtene nan 'status aparte' eyden.

E gobierno di Aruba a asigna e 'Instituut van Sociale Studies' den Den Haag pa haci un estudio di Aruba su independencia, cu a wordo publica den 1978, cu e titlo "Aruba en Onafhankelijkheid, achtergronden, modaliteiten en mogelijkheden; een rapport in eerste aanleg".

Na e conferencia di Den Haag den 1981, Aruba su independencia a wordo proponi na 1991. Den maart 1983, basa riba e Referendum, finalmente Aruba a haya un trato oficial den Reino, pa Aruba su decolonisacion y independencia, e prome pais birando den Reino Hulandes, cu su mesun costitucion, unanimamente aproba y proclama den augustus 1985, y despues di un eleccion teni den november pa Aruba su prome parlamento. Aruba a separa for di Antia Hulandes y bira oficialmente un pais y e di tres miembro di estado den Reino Hulandes dia 1 di januari 1986, cu despues di 10 aña Aruba a ful independencia na aña 1996, y cu e abolicion di Reino Hulandes Bieu. Un miembro di estado nobo di e nobo Reino Hulandes como completamente nobo y moderno di Dutch Commonwealth, liber di tur dominio colonial. E logro grandi aki ta danki na e United Nations Resolutions pa elimina colonialismo y tambe na Betico Croes y e steun politico di otro nacions manera Merca, Panama, Venezuela y varios pais Europeo. Croes tawata proclama e "Libertador di Aruba" despues di un accident tragico dia 31 december 1985 y a fayece den november 1986.

Organo Structural di Reino Hulandes

Mira: Disolucion di Antia Hulandes

Den 1990, e movimento pa independencia tawata laga pa otro ocasion na e peticion di Aruba su Prome Minister, Nelson O. Oduber. E articulo di programacion di independencia completo di Aruba, cu base den e Referendum di 1977 y e Acuerdo di 1983 pa Aruba su Descolonisacion y e independencia tawata rescindi/gelos den 1995, pero e proceso mester ta completo como un mandato oficial pa e pueblo di Aruba for di 1947 y 1977.

• Di 1 di januari 1986, e Reino Hulandes tawata consisti di tres pais: Hulanda, Antia Hulandes y Aruba.
• For di 10 di october 2010 caba, e Reino Hulandes ta contene cuatro pais: Hulanda (isla-BES: Boneiro,Saba, St Eustatius) , Aruba, Corsou y Sint Maarten.

Aunke e “igualdad” di e paisnan ta explicitamente abou den e preamble den e statuut, cu ta escirbi: "..teniendo cuenta cu a wordo expresa libremente su boluntad di stablece un orden nobo constitucional den Reino Hulandes, es cu lo hiba for di su interes interno di un manera autonomo y di su interes comun den un base di igualdad, y es cu ta otorga nan entre otro e asistencia reciproca , a resulta di un mutuo acuerdo...", den practica, Hulanda tin considerablemente mas mandato cu Aruba, Sint Maarten y Curaça.

Eleccion di Aruba

Mira: Elecionnan na Aruba

Como cu Aruba de facto mescos cu Hulanda ta un Pais separa, independiente, riba su mes, y un estado miembro di Reino Hulandes, e politica di Aruba ta den forma di un democracia parlamentario, unda tin un cabinete di Ministronan consistiendo 8 Ministero nombra pa Parlamento. E parlamento tin 21 miembro cu ta ser eligi directamente door di pueblo pa sinta un termino di 4 aña. E Gobernador di Aruba, kende ta representa La Reina na Aruba, ta ser nombra pa un termino di 6 aña.

Eleccionnan ta tuma lugar cada cuatro año pues e siguente eleccion lo mester tomar lugar na anja 2013.

Economia

Articulo Principal: Economia di Aruba

Aruba ta gosa di un di e norma di biba mas halto den e region Caribe, cu un porcentahe hopi abou di pobresa y desempleo. Mas cu mita di Produccion Nacional Bruto ta wordo genera den e sector turistico. Turismo ta un di e pilarnan mas grandi pa e economia cu turista procedente di Merca, Canada y Europa. Merca ta e partner mas grandi cu Aruba ta haci transaccion economico cu ne. Un deficit den e presupuesto di Gobierno di Aruba ta algo cu ta comun cual ta contribui na e porcentahe halto di inflacion. Aunke Gobierno tin e intencionnan pa corihi e mal custumber aki pa aña 2009. Pa añanan caba Aruba ta haya ayudo financiero for di Hulanda. E florin Arubiano ta mara na un tarifa fiho di AWG 1,75 = US$ 1,-

Geografia

E isla generalmente tin lama keto y relahante cu excepcion di e parti noord cuta bastante bruto. Tur lama ta rondona cu santo blanco cu ta haci e lamanan hopi atractivo. Tambe nos tin cero cu bunita bista den cual Hooiberg (165 m) y Jamanota (188 m), ta destaca. Oranjestad, nos capital, cual ta localisa na 12°19′N 70°1′W / 12.317, -70.017, ta situa 25 km panoord di Venezuela.

Semper e clima ta consisti di un dia cayente. No mester di weather.com pa bisa nos cu ta bay tin solo pa mastanto dje aña.

Deporte

Na Aruba e deporte mas conoci y mas practica ta futbol, despues ta sigui baseball. Tambe e sportnan mane volley, atletiek, basketball y softball sa word practica sin laga afo sport acuatico. Sport cu ta atrae mas hende ta futbol, riparabel na nan final compara cu baseball. Aunke tin masha poco posibilidad cu un di e atletanan lo bira profesional, of hunga den exterior. Pero toch e weganan di futbol y baseball semper ta competitivo y di bon calidad cu hungandonan di hopi talento. Softball tambe ta un sport cu ta yama hopi atencion ya cu e ta un sport cu ta hunga tur weekend na diferente veld y ta algo cu ful famia por bay disfruta.

Demografia

Aruba ta situa den parti zuid paden di Caribe. Door cu no a haci hopi yobida, Aruba a wordo salba door di sistema di plantacion y economico di transacion di negoshi di catibo. Aruba su poblacion ta estima 80% mestiso y 20 % grupo etnico. E Arawaknan tawata papia un sorto di "Spaño/Portugues kibra" unda nan a siña for di nan antepasadonan na Hispaniola. E Hulandesnan a tuma control 135 aña pasa despues di e Spañonan, nan a laga nan pa cultiva y uza e isla como fuente di carni pa otro posesion Hulandes den Caribe. E partimonio Arawak ta mas fuerte cu esun di otro isla Caribense. Aunke no a keda hopi evidencia di indjan, e caracteristica isleño ta claramente indica cu tawatin nan partimonio gentico Arawak. Un parti grandi di e poblacion ta bin di descente Arawak y menos for di e antepasado Spaño, Italiano, Hulandes y un par di Frances, Portugues, Britanico y Africano. Recientemente tawatin un considerabel inmigracion na e isla for di e nacionnan bisiña di Merca y Caribe, posiblemente treci pa e miho trabounan paga. Den 2007, e leynan nobo di inmigracion a wordo introduci pa yuda controla e crecimento di e poblacion mediante e restriccion di e trahadonan stranhero na un maximo di 3 aña di residencia den isla.

Demograficamente, Aruba a sinti e impacto di cercania di Venezuela, mas hopi cu e cercania di Curaça y Boneiro. Gran parti di Aruba, e famianan ta bin door di Venezuela y tin un aumento temporal di Venezolanocu ta bin biba na Aruba.

Comunidad Hudio

Actualmente e comunidad Hudio di Aruba ta numera pa 35 Hudio. E comunidad aki a bira oficial for di 1754, ora Moses Solomon Halevi Maduro y su casa y su seis yiunan a ricibi un permit special na e isla door e Hulandesnan Real. Maduro a funda e 'main shipping company, Maduro & Sons'. E santana Hudio, cu regularmente a wordo uza pa entiero di e Hudionan cuminsamento di aña 1837, ta contene ocho tumba di graf datando bek na 1563, e unico indicacion di un presencia Hudio riba e isla prome cu siglo 18.

E prome minister di Aruba, Mike Eman, ta bin di un famia Hudio.

Ciudad y bario

Mira: Lista di luga na Aruba

E isla, cu un poblacion di mas di 140.000 habitante, no tin stad grandi. E districtonan:

• Noord
• Oranjestad West )
• Oranjestad Oost )(33,000 den 2006)
• Paradera
• Santa Cruz
• Savaneta
• San Nicolas Noord
• San Nicolas Zuid

Educacion

Enseñansa ta ocupa un funcion cardinal den e desaroyo di Aruba. Enseñansa na nivel ta un condicion importante pa hende suficientemente bon educa ariba e isla aki.

Como bintidos mil alumno y studiante ta bay scol tur dia na Aruba. Na mas o menos ochenta scol, e alumno- y hobennan ta haya e oportunidad pa descubri, desaroya y uza nan propio capacidad.

E sistema actual di enseñansa na Aruba conoce e siguiente nivel di enseñansa y tipo di scol:

-Enseñansa pre escolar pa e grupo di edad 0 pa 3 aña; -Enseñansa preparatorio pa e grupo di edad 4 pa 5 aña; -Enseñansa basico pa e grupo di edad 6 pa 11 aña. Fuera di enseñansa basico regular, Aruba conoce tambe:

-Enseñansa special, reparti den: Enseñansa pa muchanan cu tin dificultad pa siña (MLK); Enseñansa pa muchanan cu tin hopi dificultad pa siña (ZMLK); Enseñansa pa muchanan sordo y mudo.

-Enseñansa avansa (AVO/LBO) pa e gruponan di edad 12-15 te 17 aña, reparti den: Educacion Profesional Basico (EPB) cu e ciclo basico y e ciclo di profesion y banda di dje e educacion pa aspirante. E ciclo di profesion ta reparti den: Sector tecnico (T); sector economico (E); sector di cuido (V). enseñansa general secundario (MAVO); enseñansa general avansa (HAVO); HAVO y VWO ta cay bou di un solo scol, Colegio Arubano. Tin un scol na San Nicolas y Oranjestad enseñansa preparatorio cientifico (VWO).

-Enseñansa post secundario (MBO/HBO/VWO) pa e grupo di edad 15 pa 17 aña, reparti den: Educacion Profesional Intermedio (EPI); Unidad Ciencia y Tecnologia (CT); unidad Salubridad & Servicio (SS); unidad Hospitalidad y Turismo (HT); unidad Economico (E).

estudio pa maestro di scol (IPA). IPA ta forma docente dinamico y profesional pa drenta scol preparatorio, primario y secundario. IPA tin specialisacion pa bira docente di preparatorio (kleuter), primario (scol basico) y pa bira docente di scol secundario tin actualmente Bachelor y Master Papiamento, IK (informatiekunde) y CKV (Culturele & Kunstzinnige Vorming). IPA tin un seccion nobo cu a start sali na aña 2007 cu ta Movecion y Salud (M&S).

Universiteit van Aruba (UA) Facultad Huridico (JF); facultad Financiero-Economico (FEF). Enseñansa pa adulto pa esnan cu no ta bay scol mas di 15 aña pariba. Tanto e enseñansa pre escolar como e gran parti di enseñansa pa adulto no ta cay bou di e ley di enseñansa y supervision di Departamento di Enseñansa.

Programa di incorporacion Programa di incorporacion pa enseñansa basico. E programa di incorporacion ta un proyecto di Departamento di Enseñansa y ta cay bou di Directiva di Scol Publico. Pa casi diescuatro aña ta existi na cinco scol basico publico un programa special pa guia mucha cu un otro idioma di cas, e asina yama PRISMA-project. Y desde 2002 e programa aki ta existi na algun Dependances. Na principio e meta di e proyecto di Prisma tabata solamente pa yuda e muchanan cu un otro idioma na cas cu no ta Papiamento of Hulandes, pa nan por domina den un tempo relativamente corto e idioma Hulandes. Na 2001 a scohe pa e Dependances ora cu a descubri cu tin hopi mucha stranhero bibando na Aruba y cu no ta bay scol. Desde e momento ey e fluho di mucha stranhero pa Aruba a aumenta bastante. A scohe pa guia nan den e Dependances, p’asina no pone un peso extra ariba e scolnan regular y e maestronan na e scolnan aki. Di e forma aki e maestronan por a duna mas atencion na e muchanan naci na Aruba. Pero den transcurso di aña mas y mas mucha Arubiano a haya ayudo extra den e idioma Hulandes pa medio di e metodo di Prisma. Hulandes ta y lo keda pa e muchanan Arubiano un idioma stranhero y lo no bira nunca nan prome idioma di cas of lenga materno.

Acercamento Tin dos manera di acercamento:

-Na e scolnan basico publico ta saca e alumnonan di Prisma for di klas ora di les di Hulandes y di lesamento. Durante nobenta minuut nan ta haya les di Hulandes y lesamento segun e metodo di Prisma den un local apart. Despues nan ta bay nan klas bek y ta sigui atende e otro lesnan cu nan compañenan di klas. Si resulta necesario, nan ta sigui cu “Taal en Lezen” segun e programa di Prisma te ora cu nan no tin mester di ayudo adicional. E scolnan publico ta traha cu rooster semanal cu ta reparti segun edad. E grandura di e grupo segun edad por varia pa cada “blokuur”; -E Dependances ta scolnan apart na unda gran parti di mucha stranhero entre 8 y 13 aña ta reparti den grupo fiho di maximalmente 15 alumno pa klas. E klasnan ta reparti segun edad. Durante henter un aña escolar e alumnonan ta den un Prisma klas. Durante henter e aña ey nan ta haya solamente e idioma Hulandes y lesamento segun e metodo di Prisma. Fuera di esey nan ta haya tambe e mesun metodo di 'rekenen' igual na e otro scolnan basico. Despues di un aña nan ta pasa pa un scol basico of scol avansa igual cu e muchanan di Aruba.

Programa di incorporacion pa studiantenan secundario Desde 2002 ta acepta hoben entre 14 y 18 aña cu un idioma stranhero apart na un Dependance. Cu ayudo di un programa special nan ta haya preparacion durante un aña escolar pa despues nan pasa over pa enseñansa avansa. Esaki por ta mavo den dia, scol anochi of EPB. Ta reparti e alumnonan aki tambe den grupo di 15 pa klas.

E scolnan di Aruba

scol preparatorio	scol basico	MAVO	VMBO	MBO	HAVO/VWO
Agnes Kleuterschool	Cacique Macuarima School	Filomena College	E.P.B.-HATO	E.P.I.	Colegio Arubano-Oranjestad
Arubanita Kleuterschool	Caiquetio School	Colegio San Antonio	E.P.B.-San Nicolas		Colegio Pariba-San Nicolas
Ayo Kleuterschool	Colegio Laura Wernet Paskel	Maria College	E.P.B.- Santa Cruz
Arco Iris Kleuterschool	Colegio Bon Bini	La Salle College
Cayena Kleuterschool	Colegio Conrado Coronel	John Wesleycollege
Graf V. Zinzendorf School Kleuterschool	Colegio Cristo Rey	Mon Plaisircollege
H Imelda Kleuterschool	Maria Regina School	Colegio San Augustinus
Jacintha Kleuterschool	Rosario College	C.G. Abraham de Veerschool
Kukwisa Kleuterschool	St. Anna School
Mon Plaisir Kleuterschool	St. Dominicus College

• Estudionan Academico:
  • UA (Universiteit van Aruba)
  • IPA (Instituto Pedagogico Arubano)

Cultura

Riba 18 di maart ta celebra e dia di Himno Nacional di Aruba. Na 1976, Aruba a hañ su Himno Nacional (Aruba Dushi Tera) y Bandera.

E origen di e poblacion y e posicion geografico di e isla a duna Aruba un cultura mixto. Segun e Bureau Burgelijke Stand en Bevolkingsregister (BBSB) desde 2005 Aruba ta conta cu 92 diferente nacionalidad.E influencia Hulandes por wordo mira ainda, manera e celebracion di Sinterklaas dia 5 y 6 di december y otro dia di fiesta manera 30 di april unda Aruba y Reino Hulandes ta celebra e haciment'i aña di S.M. Beatrix, "Dia di La Reina" (Koninginnedag). Pasco y Aña Nobo ta wordo celebra cu un musica tipico y cantica di gaita pa Pasco y Dande pa Aña Nobo y ayaca, ponche crema, oliebollen y ham y otro cuminda tipico y bebida. Riba Aña Nobo ta tira klapchi y show di vuurwerk. Riba 25 di januari ta celebra e haciment'i aña di un politico,d.f.m Gilberto F. 'Betico' Croes, "Dia di Betico". Riba 24 di juni ta celebra "Dia di San Huan", cu e cantica 'Dera Gay'. Religion tambe tin su influencia; Asencion (Pasco Grandi) y Bierna Santo ta un dia di fiesta rib'e isla.

Celebracion di Carnaval tambe ta un dia importante na Aruba, como den Caribe y Latino Merica, por ehempel Mardi Gras (Diamars Diki) ta celebr'e pa hopi siman largo. E celebracion aki a cuminsa rond di aña 1950 influencia pa inhabitante (Venezuela, St Vincent, Trinidad, Barbados, St. Maarten y Anguilla) cerca di e isla cu a bin traha pa e rafinaderia pretolero (LAGO). Cu curso di tempo Celbracion di Carnaval a cambia y awo e ta cuminsa for di cuminsamento di januari te diamars prome cu Diaranson Shinishi (Dia di Shinishi) cu un parada grandi riba e ultimo diadomingo di e festivo (diadomingo prome cu Dia di Shinishi).

Turisimo di Merca recientemente a crece e visibilidad di cultura Mericano riba e isla, cu e celebracion manera Halloween y Thanksgiving den November

Idioma

Mira tambe: Ortografia di Papiamento, Gramatica di Papiamento y Papiamento na Aruba

Idioma por wordo mira manera un parti importante di e cultura Arubano. E idiomanan oficial ta Hulandes -desde 2003- y Papiamento. Papiamento ta e idioma predominante na Aruba. Un idioma crioyo papia na Aruba, Curaçao y Boneiro, ta incopora palabra incluyendo Portugues, idioma di West Africa, Hulandes y Spaño. Manera mayoria di isla den e region, Spaño tambe ta wordo papia tin biaha. Ingles tin un conexionhistorico (cu e Imeperio Britanico) y ta wordo uza hopi; door di crecemento turistico. Otro idioma comun ta papia basa na e size di e comunidad ta Portugues, Chines, Aleman y Frances. Esaki ta ofreci den scol secundiario y universidad, ya cu un percentahe halto di studiante di Aruba ta continua nan estudio na Europa.

Den añanan reciente, e gobierno di Aruba a mustra un interes grandi den e reconocimento di e importancia cultural y historico di su lenga materno. Aunke Papiamento ta wordo papia, ta masha similar entre e isla di papia Papiamento, tin un diferencia grandi den e skirbimento.E ortografia ta diferencia cada isla y tambe cada grupo di hende. Tin ta mas orienta na e origen Portugues y ta haci uzo di e otrografia ekivalente. (Eh. ta uza 'y' enbes di 'j'), na unda otro ta mas orienta ne e origen Hulandes.

Den un buki The Buccaneers of America , prome publica den 1678 ta wordo declara door di un relato testimonial cu e idjannan riba Aruba tawata papia Spaño. E gobierno di mas bieu un declaracion oficial skirbi na Papiamento data for di 1803.

Aruba tin cuater corant publica na Papiamento: Diario, Bon Dia, Solo di Pueblo y Awe Mainta y dos den Igles: Aruba Today y The News. Amigoe ta e corant publica na Hulandes. Aruba tin tambe 18 radio stacion (2 AM y 16 FM) y tin tres tv-stacion local: Tele-Aruba, Aruba Broadcast Company 'ATV 15' y Canal 22, Aruba su Television Nobo.

Segun censo di 2000 e poblacion ta uza e lenga principal na e siguiente:

• Papiamento (oficial y idioma nacional) 66.3 %
• Spaño 12.6 % (importante door di e cercania cu Venezuela, ta duna les na scol basico for di klas 5)
• Ingles (importante pa e turismo, ta duna les na scol basico for di klas 4) 7.7 %
• Hulandes (oficial wordo uza den administracion publico y enseñansa) el 5.8 %
• Otro 2.2 %
• E 5.3 % no specifica of no conoci (censo di 2000)

Luganan di interes

Kapel di Alto Vista Parke Nacional Arikok Formacion Sero Ayo y Casibari Bushiribana y Balashi Faro California Frenchman's Pass Jamanota Hooiberg Lourdes Grotto Brug Natural Natural Pool

Palm Beach Quadiriki Caves Eagle Beach Arashi Caves of Aruba Baby Beach Aruba Aloe Factory Palm Island Aruba San Nicolas Huliba Cave (Tunnel of Love)

Arubianonan famoso

• Dave Benton, musico cu a gana e 2001 Eurovision Song Contest representando Estonia
• Juan Chabaya Lampe, compositor di Aruba su himno nacional
• Betico Croes, politico (Libertado di Aruba)
• Bobby Farrell, musico (grupo Boney M.)
• Percy Irausquin, diseñado di moda
• Jim Jones, artista Mericano di hip-hop
• Gene Kingsale, beisbolista di MLB player
• Calvin Maduro, beisbolista di MLB player
• Pete Philly, artista Hulandes di hip-hop
• Sidney Ponson, actualmente beisbolista di MLB player