Makedonska

Republika Makedonska
	zakładne daty:
swójske mjeno	Република Македонија
stolica	Skopje
přestrjeń	25.715 km²
wobydlerstwo	2.057.284 (2010)
hustosć zasydlenja	80/km²
forma knježerstwa	republika
hłowa stata	prezident Gjorge Ivanov
šef knježerstwa	ministerski prezident Nikola Gruevski
měna	Makedonski denar
hamtska rěč	makedonšćina
připóznate mjeńšinowe rěče	albanšćina, turkowšćina, romani, serbišćina, aromunšćina
hymna	Denes Nad Makedonija (Денес над Македонија)
časowe pasmo	UTC+1
njewotwisnosć	8. septembra 1991
Top Level Domain	.mk
telefon	+389
	mapa

Republika Makedonska (makedonsce Република Македонија/Republika Makedonija, albansce Republika e Maqedonisë) je stat na Balkanskej połkupje w juhowuchodnej Europje. Hač do lěta 1991 běše dźěl Socialistiskeje Federatiwneje Republiki Juhosłowjanskeje (SFRJ). Wona ma přestrjeń 25.713 km² a hłowne město je Skopje. Oficielna rěč w Makedonskej je makedonšćina.

Po schwalenju Ramikoweho zrěčenja 2001 a wójnskim konflikće mjez Albančanami a Makedončanami připóznawa Makedonska albanšćinu, serbišćinu, roma, turkowšćinu a bosnišćinu jako druhu oficielnu rěč w tych wokrjesach, hdźež je wjace hač 20% wobydlerstwa albanske resp. serbiske resp. roma resp. turkowske resp. bosniske. Oficialne mjeno kraja je Republika Makedonija. W organach Europskeje Unije, NATO, UNO a za Grjeksku je mjeno kraja Bywša Juhosłowjanska Republika Makedonska (mak. Πоранешна Југословенска Република Македонија/Poranešna Jugoslovenska Republika Makedonija). Grjekska njepřipóznawa oficielne mjeno Makedonskeje.

Mjez dźesać najwjetšimi městami w Makedonskej ličimy města Skopje, Bitola, Kumanovo, Prilep, Tetovo, Veles, Štip, Ohrid, Gostivar a Strumica. Ohrid je město słowjanskich wučerjow, mjez kotrymiž je swjaty Kliment Ohridski, kiž je kyrilicu k česći swojeju wučerjow swjateju Cyrila a Metoda wutworił. W Ohridźe je była tež wutwarjena prěnja Słowjanska Uniwersita w tak mjenowanym regionje Kutmičevica, na kotrejž je studowało wjace hač 3.500 studentow. W Ohridźskim regionje je tež Naum Ohridski skutkował. Naum Ohridski bě kaž Kliment Ohridski wučomnik swjateju Cyrila a Metoda. Pochowany bu wón w klóštrje Swj. Nauma Ohridskeho blisko albanskeje hranicy.

Tuchwilny prezident Makedonskeje je Gjorge Ivanov.

Flora a fauna w Makedonskej[wobdźěłać | žórłowy tekst wobdźěłać]

Makedonska ma bohatu floru a fawnu. Wosebity eko-system zmóžni něhdźe 3500 družinam rostlinow, 55 družinam rybow, 78 družinam cycakow a 330 družinam ptačkow žiwjenje. W Makedonskej su bruny mjedwjedź, rys, kaž tež jara rědki běłohłowny kosćełamak žiwe.