ڈاکٹر نبی بخش بلوچ پاکستان میں پیدا ہونے والے
تاریخ دان، ماہرِ
لسانیات،
محقق، ماہرِ لوک ادب، ماہرِلطیفیات، ماہرِ تعلیم، سابقہ وائس چانسلر
بین الاقوامی اسلامی یونیورسٹی، وائس چانسلر
سندھ یونیورسٹی، تاحیات پروفیسر، مشیر قومی ہجرہ کونسل اور بانی و چیئرمین سندھ لینگویج اتھارٹی تھے۔
ڈاکٹر نبی بخش بلوچ، گوٹھ جعفر خان لغاری، ضلع سانگھڑ، سندھ میں 16 دسمبر 1917ء کو پیدا ہوئے۔ ان کے والد کا نام علی محمد خان تھا، لیکن نبی بخش کی ولادت کے محض چھ ماہ بعد والد کا انتقال ہو گیا۔
والد نے آخر وقت میں وصیت کی کہ "میرےبچے کو پڑھانا"، جسے آپ کے چچا ولی محمد خان نے پورا کیا۔ اس زمانے میں گوٹھ جعفر خان لغاری میں کوئی باقاعدہ اسکول نہیں تھا اس لئے چچا نے انھیں گاؤں کے ہندو استاد سومل کے پاس ابتدائی تعلیم کے لیے بھیجا جہاں نبی بخش نے ابتدائی حروفِ تہجی اور اعداد سیکھے۔ اس کے بعد 1924ء میں گوٹھ پلیو خان لغاری کے پرائمری اسکول میں داخل ہوئے۔ مارچ 1929ء میں بلوچ صاحب مزید تعلیم کے لئے نوشہرو فیروز مدرسہ و ہائی اسکول میں داخل ہوئے۔
اس کے بعد نبی بخش نے ڈی جے کالج کراچی میں داخلہ لیا، لیکن مالی مشکلات کی بنا پر یہاں تعلیم جاری نہ رکھ سکے چناں چہ نبی بخش
جوناگڑھ پہنچے جہاں بہاء الدین کالج میں داخلہ لیا، یہاں نبی بخش کو کسی قسم کی مالی مشکلات کا سامنا نہیں ہوا۔ بہاء الدین کالج
جوناگڑھ میں بلوچ صاحب کا قیام
1937ء سے
1941ء تک رہا۔ جہاں سے نبی بخش نے بی اے آنرز میں پہلی پوزیشن حاصل کی جس کی بنا پر ان کو ایک سو روپے ماہوار "مہابت فیلو شپ" وظیفہ (بنام نواب مہابت خان والئی ریاست
جوناگڑھ) ملا۔