香港

香港
Hong Kong

（香港區旗） （區徽 放大）
官方語言	英文、中文
行政長官	梁振英
面積 - 水面面積 - 土地面積 - 水面面積嘅百分比	1,650平方千米 1,103平方千米 60%
人口 - 人口（2013年） - 人口密度	（未排名） 7,188,000 6,206／平方公里
生產總值總共（2004年）  每個人嘅生產總值	排第37 2366億美金 排第14 34200美金
開埠 - 嘅日期	穿鼻草約 1841年1月25號 做咗英國殖民地 1841年1月26號 南京條約 1842年8月29號
特區成立 - 嘅日期	主權由英國 交畀中華人民共和國 1997年7月1號
通貨	港紙（HKD）
時區	UTC+8（香港標準時間）
域名	.hk
長途電話代號	852
區花	洋紫荊

香港（粵拼：hoeng¹ gong²，英文：Hong Kong 又 Hongkong），官名香港特別行政區（hoeng¹ gong² dak⁶ bit⁶ hang⁴ zing³ keoi¹）（英文：Hong Kong Special Administrative Region，縮寫爲HKSAR），係華南一城，亦係一埠，位處南中國海北岸，是爲國際大都會。香港建於一八四一年，乃百年之城，爲英國人所建，家下歸中華人民共和國，係特別行政區。按《中英聯合聲明》同《基本法》，香港係高度自治嘅地方，除外交同防務，全面自治，有參與國際組織權利，有別於中華人民共和國體制，所以官方稱之爲一國兩制。香港三面環海，東同南係南中國海，西珠江口嘅零丁洋，東北係大鵬灣，北面同中國大陸隔住條深圳河。香港有唔少島，散佈東南西。因爲瀕海，水路發達，爲太平洋到印度洋，各國洋船必經之路。空運亦係南洋同中國嘅樞紐，世界日日都有唔少飛機，會經香港。

香港史可追至新石器時代。但轉變成大城，要由大清國講起。英國同大清打鴉片戰爭期間，一八四一年，英國人佔領香港島，響島東北岸起域多利亞城。一八四二年，清廷簽《江寧條約》，正式割香港島畀英國。一八六零年，清廷簽《北京條約》，再割埋九龍半島。一八九八年，清廷又簽《展拓香港界址專條》，租新界畀英國九十九年，於是三地，合埋就係依家「香港」。除咗日本佔領幾年，都係英國殖民地。一九八四年，中英兩國嘅政府簽咗《中英聯合聲明》，中華人民共和國政府保證過，香港一定會響一九九七年之後，有至少五十年嘅高度自治，維持返香港本來嘅制度同埋生活方式。英國響一九九七年約滿嗰年，按《中英聯合聲明》，將新界租地，連同香港島、九龍半島割地，主權一次過移交畀中華人民共和國。

香港人口約莫七百萬，以唐人爲主，亦有西人、印度、巴基斯坦、菲律賓、尼泊爾、印尼、越南等等各地人，有啲祖先來港百年以上。亦有唔少南洋唐人後代居港。香港人主要講廣東話，其次係英文，客家話、潮州話、鶴佬話、國語、各種各族家鄉話都有。

香港有別名幾個，好似香江（hoeng¹ gong¹）、東方之珠（dung¹ fong¹ zi¹ zyu¹）噉。廣東話裏面，香江係香港訛音，亦有指維多利亞港似江水，橫臥喺香港島同九龍半島之間。香港減筆寫港（gong²），而自稱時叫本港（bun² gong²）。英文最初寫 Hongkong，後地名劃一分音而寫，名 Hong Kong。當地人統稱香港人，或減筆港人。英文 the People of Hong Kong 或者 Hong Kong People 或者 Hongkonger 或者 Hongkongese。

史

內文： 香港史

香港夜色

考古證明，香港響舊石器時代就有人住。響西貢半島北岸黃地峒，有石器同整石器嘅架生。喺新界同大嶼山好多地方，都搵到新石器時代嘅遺址。旺角（以前叫「芒角」）就曾經係東漢、隋朝同唐朝人做陶器嘅地方。李鄭屋古墓亦證明香港喺東漢嗰時，畀番禺管。喺唐朝嗰陣，香港由廣州寶安縣管，嗰陣軍隊就係駐喺而家嘅屯門（屯兵之門），而呢區個名就係咁嚟㗎喇。

喺南宋嗰陣，嗰時得八歲嘅皇帝仔趙昰宋端宗畀元朝大軍一直追到嚟香港，聽講佢同佢細佬趙昺（有啲人叫宋帝昺），曾經喺一舊石頭度抖過，之後啲人就叫呢塊石做宋王台。後來趙昺登基，但係啲元兵係咁殺到嚟，佢就經淺灣（即係家陣嘅荃灣）向西面過海去新會，但係當架船駛到而家深圳蛇口左近嘅崖門嘅時候，蒙古大軍追到嚟，於是乎陸秀夫就揹住得嗰八歲嘅皇帝仔阿昺喺崖山跳海自殺身亡。

大清時香港係歸新安縣九龍司管，不過呢處記事寥寥無幾。後尾英國人去省城之前，都會取道香港先，兼攞埋水。1816年英使去北河見皇帝之前，7月10號到13號之間經過香港，就行過香港島。

喺1841年（道光廿一年辛丑歲），大清喺第一次鴉片戰爭裏面畀英國打敗咗，重喺之後嗰年簽咗《南京條約》，將香港島割讓左畀英國。之後清廷又輸畀英法聯軍，被逼簽埋《北京條約》，將九龍半島裏面近住香港島，成日搞事嘅地方，連埋昂船洲一齊割讓畀英國。由於嗰陣時嘅清廷自己已經好唔掂，喺九龍半島上嘅新邊界只係用好矮嘅鐵絲網分隔，位置就係喺今日嘅界限街。喺1898年，英國用同清廷簽嘅《展拓香港界址專條》同其他一系列嘅租借條約，租借埋新九龍、新界同附近嘅兩百幾個離島，租期係99年，但係就唔包括九龍城寨。

中華民國成立之後，民國政府本來係想取消不平等條約。但好快就自己搞唔掂，北伐單嘢搞到國民黨政府唔得閒諗住攞番香港嘅主權。但係，嗰陣香港政府重有開放中港邊界，兩地市民重可以自由咁來往。嗰陣唔少香港人，都同清時一樣，除咗捐錢返去之外，重身體力行加入國民政府做嘢。前國民政府外長伍廷芳就係嗰陣香港嘅名流喇。

中國抗日戰爭爆發後，日軍喺1938年登陸廣東，重好快咁佔領埋廣州同附近嘅地方。之後香港嘅唐人支持抗戰，出錢出力。日本軍政府因為咁樣表現不滿，曾經好多次同英國嘅領事抗議。喺1941年12月8號，日本偷襲珍珠港之後幾個鐘頭，就攻打馬來亞同走過深圳河打香港。嗰時日本同香港義勇軍、加拿大兵，重有印度籍同西人嘅英軍打咗好多場好激烈嘅仗。最後因為駐港嘅英軍戰力唔夠，喺1941年12月25號聖誕節嗰日，嗰陣嘅港督楊慕琦宣佈向日本投降，開始咗香港三年零八個月嘅日治時期。日治嗰陣，日本人為咗方便統治，好多次將啲窮人搬返去中國大陸住。由於日軍對居民殘酷，到咗香港被佔領嘅中期，新界地區嘅居民響應東江游擊隊，喺香港成立港九縱隊，加入對抗日本嘅武裝勢力，參加者多數係而家叫左派嘅人。而部份走甩英軍，亦成立英軍服務團，喺香港廣東之間抗日。

香港旗（1959－1997年）

香港盾徽（1959－1997年）

打贏日本之後，中華民國政府一度喺聯合國上要求要收番香港，但礙於嗰陣國共內戰已經開始咗，佢再一次冇力同英國政府攞返香港。當中國共產黨喺1949年成立咗中華人民共和國政權之後，中、英兩方面就香港問題達成協議：中方唔諗住收返香港主權，亦都唔理國民政府軍民喺香港嘅活動，用嚟換取英國對中華人民共和國嘅承認。於是喺1950年，英國承認中華人民共和國嘅成立，變咗係第一個承認中華人民共和國嘅西方國家。而後來由於中華人民共和國喺韓戰激嬲西方世界，搞到畀佢哋禁運，令到香港變成中華人民共和國嘅轉運物資、徵集資金、收集情況唯一嘅窗口。

喺1950年代中，右派工會暴動，中華民國政府嘅情報人員從此就唔畀再入香港。

喺1967年，成個中國大陸都搞文化大革命，紅衛兵好多次想越過中港邊境。後來左派公然響應國內造反派嘅號召，喺香港好多地方搞暴亂，則係「六七暴動」。嗰陣喺香港街頭擺滿寫住「同胞勿近」嘅真假「菠蘿」（即係土製炸彈），搞到香港人好驚又好亂。後來中華人民共和國總理周恩來，話唔諗住收返香港，先平息到呢件事。

經歷過1960年代尾嘅暴動，香港政府喺1970年代初調整咗政策方針，開始諮詢華人嘅意見，逐漸納華人入政府做決策。1973年香港經歷咗一次經濟大衰退，不過自從1974年就開始咗有廿幾年咁長嘅高速增長。1970年代中香港地鐵開始動工、廉政公署成立、九年免費教育開始實施、同埋公共房屋計劃進一步擴展等等，都為香港未來嘅「經濟奇蹟」奠定咗基礎，令到香港喺1980年代初成為世界著名嘅「亞洲四小龍」之一。

喺1970年代初期，由於新界土地契約嘅問題，令到港英政府迫住要考慮香港前途嘅問題。英國政府曾經好多次要求中華人民共和國政府延續新界嘅租約，但畀佢拒絕咗。不過，喺1970年代末，「香港前途問題」已經變成中英兩國嘅正式議題，但究竟係邊方面先提出轉移香港政權，街外人都有唔同嘅講法，不過唔理邊個先提出，「香港前途問題」搞到中英兩國開始咗差唔多廿年嘅爭拗。

喺1980年代初時，英國曾經提出過分拆香港嘅「主權」同「治權」，前者畀返中國，不過英國人就留住治權。唔少香港傳統上流社會嘅政治同商界精英，開始嗰陣都支持有關嘅建議。傳統英國資金嘅商業機構，好似滙豐銀行、怡和洋行，都有幫手遊說。

嗰陣時商界年輕領袖李鵬飛帶埋其他香港工商界精英，成立咗個「年青才俊團」上去北京交流，重得到嗰陣時嘅領導人鄧小平接見。當佢哋提出分拆主權同治權嘅建議時，畀鄧小平「好惡咁鬧」，結果遊說就失敗咗喇。中國嗰陣堅持一定要「收回」香港，不過香港人重可以享有「高度自治、港人治港」，呢樣變成中英兩國談判時嘅唯一框框。

最終，香港主權喺1997年易手，成為中華人民共和國嘅第一個特別行政區。此後有金融風暴、沙士瘟疫，金融海嘯等大事。二〇〇三年七月一號，有七一大遊行，反對香港政府施政同顛覆國家罪立法，間接令董建華辭任香港行政長官。中國亦頻加干涉香港事務。

政治

內文： 香港政治

香港嘅政治係由1841年開埠後開始計起，最初係由英國人發展同埋管理，後來先慢慢開始有華人參與。香港嘅主權歸屬問題，喺二十世紀尾受到國際關注，中華人民共和國同埋英國經過近廿年磋商，最後決定喺1997年移交主權，結束咗香港近二百年嘅殖民地歷史。主權移交後，香港成為中華人民共和國嘅特別行政區，以一國兩制形式平衡兩地之間政治同社會上嘅差異。主權移交後嘅政治爭議，多數涉及憲制性文件《基本法》嘅架構下，香港民主發展嘅步伐。另外，有關法治同言論自由，重有無主權移交前嘅保障，中央政府對香港內政嘅干預亦引起大眾關注同爭議。

地理

內文： 香港地理

香港範圍，約莫響南北北緯22度9分到33分之間，東西東經113度50分到114度26分之間。

香港係珠江口東南面嘅一部分，位於澳門以東60公里（37英里），香港大致上有香港島、大嶼山、九龍同埋新界呢幾部份。九龍半島北面黐住新界，新界隔住條深圳河連住中國大陸。有262個島，當中大嶼山最大、新界最多人、鴨脷洲人口密度最高。全香港最高嘅地方係大帽山，有958米，即係3142呎咁高。低窪地方就主要集中喺香港西北部嘅元朗。

香港呢個名係由今日香港仔嗰頭走出來嘅。而今日香港個港就唔響香港仔，而係隔開港島同九龍嘅維多利亞港，係全世界最深 嘅港口之一。

香港大部分土地都無起樓，屬自然地方。香港山多平地少，而且山坡好斜。香港總面積1104平方千米，當中開發咗嘅唔夠百分之廿五。其餘嘅地多數都係綠色嘅，包括總共佔咗香港四成土地咁多嘅郊野公園。香港大部分已建區喺九龍同港島北部。新界有散落嘅已開發地區。

香港有條水蛇春噉款嘅海岸綫，又長、又攣，無厘規律。就係因為有條噉嘅海岸綫，香港有好多海灣、河流同埋沙灘。

生態

內文： 香港生態

香港濕地公園

香港雖然面積細，但物種豐富程度絕對可以同鄰近嘅海南島同台灣相比。

受到地形所礙，香港有大概七成半土地屬郊區，未曾開發成市鎮 。由於受香港城市擴張嘅影響，郊區同城市嘅距離非常之近，市民同埋旅客可以喺短時間內前往郊區。2005年，前往郊野公園嘅遊人達萬二人次，進行遠足、燒烤、露營等活動 。郊區內嘅自然生態盎然，有多種香港稀有、獨有品種棲息，同密集嘅市區發展形成強烈嘅對比。呢啲潛在嘅自然生態旅遊資源，獲得政府近年進行評估發展 。

新界西北係香港生態嘅稀有郊區。例如：響新界西北嘅米埔[1]。

政府喺郊區開闢咗郊野公園卅三個，同埋特別地區十七個，共佔地 416.44平方千米，即全港土地約三成八。呢啲地域受到法例保護，交由漁農自然護理署（漁護署）管理。郊野公園主要係為市民提供郊野康樂設施，而特別地區則主要為保護自然生態環境。除咗郊野公園，香港亦設有海岸公園四個兼海岸保護區一個，同樣受到法例保護。海岸公園同保護區面積有 24.30平方千米，畀市民欣賞珊瑚等海洋景觀同生物，亦可以潛水、扒獨木舟、玩風帆以及喺海底影相等活動 。

政府指定嘅郊野地區，受到法例保護，兼且有漁護署管理，自然生態環境得以維護發展。

氣候

香港氣候係亞熱帶氣候。年中半年似溫帶。一二月，撞到冷峰時，會多雲。三四月，氣候幾宜人，雖則有時都幾潮濕。五到八月，嗰處又熱又濕，重間唔中落雨行雷。十一、二月，香港會吹風下，兼且有陽光同埋溫度唔錯。

七到九月，係最易打風嘅時候，卽係熱帶氣旋嘅吹襲，但係，就算五月甚到十一月，都間中有熱帶氣旋嘅吹襲。年年北太平洋同埋中國幾個海，總共生咗熱帶氣旋約莫卅一個，當中半數會去到颱風級數。打風嗰陣，唔只風大，兼且好多地方會落大雨。大雨通常持續幾日，不過查實大部分嘅破壞，都係大雨之後嘅山泥傾瀉同埋水浸造成。

香港史上錄得最高嘅氣溫係攝氏卌六度，最低紀錄就係攝氏零下八度。而香港天文台嘅紀錄就係1900年8月18號到1900年8月19號嘅攝氏36.1度（華氏97.0度）同埋1893年1月18號嘅攝氏零度（華氏32.0度）。2009年8月2號下晝兩點，香港天文台喺黃大仙錄得攝氏37.1度（華氏98.78度），創出新高。一年入面，一月通常最凍，平均氣溫係攝氏16.1度（華氏61.0度）；最熱嘅係七月，平均攝氏28.7度（華氏83.7度）。香港位於北回歸線以南一度，緯度同夏威夷差唔多。冬天嗰陣，強風自北面吹落香港，整凍全港；而夏天嗰陣，通常吹西南風，啲風又暖又潮濕。

經濟

內文： 香港經濟

香港經濟市場上行緊資本主義，有自由市場政策、低稅率，政府唔干預市場。香港係全球金融、貿易嘅重要中心，有全亞太區最集中嘅公司總部群。香港嘅人均國民生產總值同埋城市生產總值都係全中國最勁嘅。以購買力平價為來計，香港超越埋歐洲四大經濟體系，即係英國、法國、德國同埋意大利，亦都勁過日本。

殖民地時代嘅香港政府跟英國嘅規矩，將香港呢個經濟體系嘅運作交畀私營機構主導嘅市場經濟。1980年打後，港府通常都打積極不干預呢張牌，無為而治；而香港都成日畀人用來做自由放任政策嘅例子，最出名嘅就係佛利民。由1995年經濟自由度指數出現開始，香港連續十三年排頭位。香港喺2006年世界報告入面經濟自由一項都排第一。

香港嘅耕地同天然資源比其他地區少，所以好多食物同埋原料都要靠入口。香港係全世界第十一大嘅貿易單位，入口同埋出口嘅總值大過國民生產總值。有114個國家喺香港有領事館（2006年數字），係全世界最多嘅一個城市。香港嘅大部分出口產品都係轉口產品，即係啲喺境外生產嘅嘢，經過香港轉運去第道，通常係中國大陸。香港回歸之前，香港同大陸之間已經有深入嘅貿易關係。因為香港自治，所以香港可以繼續做一個資金同埋資源流入大陸嘅落腳點。香港亦都係大陸同埋台灣通航之間嘅一個轉機點。

香港用嘅貨幣係港紙。最大港紙係1000蚊。1983年起，聯繫匯率制度將港紙同美金之間嘅匯率限住喺每7.75至7.84蚊港紙兌一蚊美金。

語文

內文： 香港語文

香港以華人為主，自然講中文最多，不過當重喺英國殖民地時，英文先係官方話，中文無憲制地位。1970年之後，中文嘅地位先得到香港法例第5章《法定語文條例》確認，成為官方語言。但法律冇講明「中文」係指乜，結果九七主權移交後就出現「兩文三語」政策，兩文即係中文同英文，三語即係廣東話、普通話、英文。「兩文三語」都係喺香港最多人講同寫嘅語言。至於中文書寫，傳統以來都係以正體中文為主，但九七回歸後，香港同大陸來往多咗，簡體字亦多人用咗，加上法律對中文字無明確嘅定義，所以簡體字同正體字亦同樣受到官方認可。

另外，有啲香港作者同埋傳媒直書廣東話，而香港法庭用粵語字落口供，喺冇政府規範嘅情況之下，變為有香港特色嘅粵語白話文，之後慢慢普及，後尾呢啲字重畀香港政府正式列入香港增補字符集中嘅粵語漢字，而呢啲字之後入埋統一碼，喺電腦打同睇廣東話都唔成問題，互聯網興起之後，網上討論區用廣東話更加四圍都係。

喺香港，好多時都係講廣東話為主，一定要講普通話嘅場合都唔係咁多，所以多數香港人嘅普通話能力都只限於基本溝通。除咗廣東話同普通話之外，有好多嚟自大陸唔同地方嘅新移民都會講返佢哋鄉吓嘅話，好似閩南話、上海話、潮州話、福州話、客家話、四邑話咁，而喺新界一啲圍村地方，重有好多人講一種叫做圍頭話嘅原居民語言，呢啲圍頭話係屬於廣東話嘅一種次方言。除咗中文之外，由於喺英國殖民地嗰陣好多英國人嚟香港做嘢，所以講英文亦好普遍，好多路牌，街招都係中英並重。

中文同英文之外，由於香港家庭，請外地女人做家務，都好普遍，當中，至多係菲律賓同印尼，所以，菲律賓話同印尼話，都唔少人講。而香港南亞族裔嘅人亦有唔少，所以好多南亞族裔嘅語言亦有人講，好似印度、巴基斯坦各種話、同埋尼泊爾話咁。香港亦有好多日本人同韓國人，所以日文、韓文都一樣有人講，雖然呢啲唔係中文嘅話都係喺返呢啲人嘅鄉里之間先曉，但由於呢啲人佔香港人口唔少數目，所以亦好容易喺市區聽到人講。

宗教

內文： 香港宗教

香港實行宗教自由，世界上主要嘅宗教，都可以響香港搵到。而香港居民，絕大多數係華人，故此信徒最多嘅，香火最鼎盛嘅，係佛教同道教。而呢個教從來唔注重入教儀式，講究「信則有，不信則無」嘅慨念，所以信徒數目難以估計。

而其他宗教，因為種類繁多，所以教堂、禮拜堂同寺廟自然亦多，例如基督教、回教等。

文化風俗

內文： 香港文化風俗

飲食

內文： 香港飲食文化

香港有「美食天堂」之稱，好多國家嘅菜色喺香港可以食到。

香港嘅街頭小食非常之出名，港人稱之為掃街。常見嘅街頭小食有咖喱魚蛋、燒賣、格仔餅、雞蛋仔等等，嘢飲有珍珠奶茶、絲襪奶茶等等。