英文

 呢篇嘢講嘅係一種語文。

• 想搵學校嘅科目，請睇「英文科」。
• 想搵專門研究英文文學、英文語文、英美文化嘅學系，請睇「英文系」。
• 想搵英國用嘅英文，請睇「英國英文」。
• 想搵美國用嘅英文，請睇「美國英文」。

英文
English
發音	IPA: [ˈɪŋɡlɪʃ]
用嘅國、地區	澳洲、加拿大、愛爾蘭、紐西蘭、英國、美國、南非、菲律賓、星架坡等等近140幾個國家同地區
區域	主要係西歐、北歐、北美、大洋洲以及西印度群島部分地區
講嘅人口	第一語言：3億3549萬1748 第二語言：5億500萬
排名	第三或者四（母語）（同西班牙文人數接近） 總人數第二
系屬	印歐語系
文字	拉丁字母
官方地位
官方語言	73個國家同地區、歐盟、聯合國以及好多嘅國際組織。詳見英文圈
管理機構	冇，不過牛津英文辭典起到權威作用
語言代碼
ISO 639-1	en
ISO 639-2	eng
ISO 639-3	eng
SIL	ENG
■官方語言兼第一語言 ■係官方語言而唔係第一語言

英文（粵讀：jing¹ man^4*2；英文：English），或者叫英語（jing¹ jyu⁵），花名叫鷄腸gai¹ coeng²。係屬於印歐語系日耳曼語族西日耳曼語支嘅一種語文，發源於英國英格蘭，由古代從歐洲大陸移民大不列顛島嘅盎格魯、撒克遜、朱特部落嘅日耳曼話演變出嚟，後來以英國嘅殖民傳播到世界各地。

由於喺歷史上曾經同多門語言接觸，佢嘅詞彙來源由一元變為多元，文法由多屈折變為少屈折，語音亦都有咗規律性嘅變化。根據以英文作為母語嘅人數來計，英文可能係世界上第三大或者第四大語文（1999年統計為3億8千萬人），但佢係世界上用得最廣泛嘅第二語文。上兩個世紀英國同美國喺文化、經濟、軍事、政治同埋科學上嘅領先地位令到英文變成一種標準國際語言。英文係聯合國嘅工作語言之一。

名

英文本身

英文自稱「English」，而呢個名嘅詞源係「Angle」。喺古英文，自稱係「Englisc」，而「Angle」對出係「Engle」。呢個詞源係一個日耳曼部落嘅名，佢哋原先住喺而家德國北部日德蘭嘅Angeln地方，後來喺5世紀時移民去英倫。佢哋係以祖地嘅名來做部落名，並且攞呢個名來自稱自己、包括自己講嘅話以及新住嘅地方。喺英文，「angle」有個意思係「鉤」，呢個就係佢哋祖地名嘅意思，因爲佢哋笪祖地喺日德蘭嘅海邊，嗰笪地嘅樣好似個魚鉤噉。

譯到漢字

喺漢字文化圈嘅各種語文，都將呢種語文叫做「英」，比如中文嘅「英文」、日文嘅「英語（えいご）」、韓文嘅「英語（영어）」、越南文嘅「㗂英tiếng Anh」。呢個「英」字來源自「英吉利」，即係英國舊時嘅中文譯音名，喺漢字文化圈未完全衰弱時，呢個譯名通過漢字傳輸到各種語文。「英吉利」呢個名到而家中文都重用緊，比如英吉利海峽，照計「英文」都可以寫全名做「英吉利文jing¹ gat¹ lei⁶ man^4*2」，不過而家一般都係叫「英文」。

比較特別嘅係，喺漢字文化圈向心力弱咗之後，日文同韓文都將原先用漢字寫嘅西方地名、人名轉曬用假名、諺文來表記，唯有「英語」等少數詞例外。比如喺譯做「英語」嘅同期，日文同韓文將「法文」譯做「佛語」（日文：仏語、仏蘭西語；韓文：佛語（불어）），將「西班牙話」譯做「西語/西班牙語」（日文：西語、西班牙語；韓文：西語（서어）），而家佢哋都轉曬用表音文字來寫，比如「法文」（日文：フランス語；韓文：프랑스어）、「西班牙文」（日文：スペイン語；韓文：스페인어）。