Stati Unii de ła Mèrica

Stati Unii d'America
Motto: In God we trust
Informasion
Nome par intiero:	Stati Unii d'America
Nome ufisiałe:	United States of America
Łéngoa uficiałe:	a liveło federałe nesuna. Ła xe de facto l'ingléxe
Cavedal:	Washington  (563 384 ab. / 2003)
Polìtega
Governo:	Repùblica federałe
Capo de stato:	Barack Obama
Capo de governo:	el presidénte el ga funsion anca de capo del governo
Indipendensa:	da ła Gran Bretagna 4 de lujo 1776
Ingreso a l'ONU:	24 de otobre 1945 1
Area
Totale:	9 629 091 km²
Pos. nel mondo:	3°
% delle acque:	2,2 %
Popolasion
Totałe:	293 655 404 ab.  (2004)
Pos. nel mondo:	3°
Densità:	31 ab./km²
Giografia
Continente:	Mèrica del Nord
Fuxo oràrio:	UTC da -5 a -10
Economia
Vałuta:	Dołaro ($) : 100 cents
Varie
TLD:	.us .um .edu .gov .mil
Prefiso tełef.:	+1
Sigla autom.:	USA
Ino nasionałe:	The Star-Spangled Banner
Festa nasionałe:	4 de lujo
1 El xe uno dei 51 Stati che 'nte el 1945 i ga fondà l’ONU. El xe membro de ła NATO dal 1949

I Stati Unìi de la Mèrica (ufisialmente en ingléxe United States of America, acronimo in ingléxe USA) i xè un stato intè el nord de el continénte mèrican.

Storia

Antighità

El teritorio che uncuò el partien ai Stai Unii el gera abità esclusivamente da varie tribù indizene, inclusi i nativi de l'Alaska che i gera migrai inte la Merica del Nord durante un periodo de tenpo che el podaria essar scomisià 35 000 ani fa e el podaria essar finio 11 000 ani fa.

I primi europei a tacar piè sul solo de chei la che dopo i xe deventai i Stai Unii i xe stai proabilmente i Vichinghi vidai da Erik el Rosso, facilitai inte le so navegazion da un clima relativamente caldo. El nome che i ghe ga dà a sta prima colonia el xe stà chiamà, de fati, Vinland, "tera de le vide/tera del vin", a sotolinear come che i gavesse catà un teren tanto fertil.
De lori se ga trazze certe su l'isola de Teranóva, ma xe proabile che i se sie spenzui anca pì a sud. I so insidiamenti no i ga vuo però sucesso, proabilmente a causa de le malatie, de l'ostilità dei indizeni e de l'esiguo numaro dei coloni.

Cristoforo Colombo, inte'l so tentativo de verzar na nova via par le Indie, el xe desbarcà el 12 de otobre del 1492 inte le isole caraibiche. Solo ani pì tardi xe rivà su la massa meridional del contegnente, mentre inte le tere atualmente governae dai Stai Unii no'l ga mai tacà piè.

La colonizazion europea de le Meriche, la scumincia a la fin del secolo sedese.
Contemporaneamente ai britanichi, el teritorio el xe stà ocupà e desfrutà da olandesi, svedesi, spagnoi e francesi, ma la classe dominante la gera quela inglese.

Indipendensa e espansion

Ritrato de George Washington

Cronolosia de l'anession dei vari Stai

L'orizene de la nazion statunitense la resal a la Dichiarazion de Independenza de le tredese colonie britaniche (i atuai Stai de New York, Rhode Island, New Hampshire, Massachusetts, Pennsylvania, Virginia, North Carolina, South Carolina, Georgia, Maryland, Delaware, Connecticut e New Jersey), che inte'l 1776 i se ga proclamà libare e independente, dopo gaver convegnuo a formar na federazion infra lore.
La strutura politica orisenal (1777) le gera na confederassion, ratificada sucesivamente inte'l 1781 col nome de "Articoi de la Confederazion". Dopo un longo debato, questi i xe stai sostituii da la Costituzion, inte'l 1789, de un governo federal pi centralizà.

Inte'l corso de vari confliti co le varie popolazion native, in primis le Guere Indiane, e par mexo de tratai internasionałi, cofà ła Aquisizion de la Louisiana, el teritorio dei atuai Stai Unii el se ga esteso progressivamente verso ovest.
Durante el secolo disnove se ga zontà altri novi stai ai 13 fondadori e i confini de la nassente nazion i se ga esteso par tuto el Nord de la Merica, aquisendo anca un certo numaro de possedimenti oltra oceano. Inte'l 1812 i Stai Unii i ga tentà, senza riussirghe, de chiapar el controlo del Canada (Guera del 1812) mentre inte'l 1848 na vitoriosa guera contra el Messico la gà portà a l'anession de la Całifornia e del New Mexico. Na esperienza traumatega inportante par la nazion la xa stada la guera de secession mericana (1861-1865).

Età contenporanea

Ai primi del Novesénto i Stati Unii de Mèrica i se gà inposto cofà poténsa econòmega mondiałe dominante. Pasà el periodo de la Granda Depression dei ani trenta, i xe rivai a cuèrdar (prima del scumìsio de ła secónda guera mondiałe) serca el 50% de ła produssion mondiałe.
Dopo ła concluxion de ła secónda guera mondiałe (1945), stante l'inportansa del roło che i gavéa vùo, i xe deventai ła prinsipałe potensa mondiałe anca dal punto de vista połìtico, insieme a l'U.R.S.S, toéndo pi tardi ła poxission de guida de łe potense capitalìsteghe durante ła Guera Fréda. Dopo del 1945, i Stati Unii i xe stai variaménte coinvolti, stante el rolo de superpotensa, in diversi confliti extrateritoriałi. Ła só poxission ła se gà ulteriorménte rinforsà col croło deła rivałe Union Soviètica (1991) e ła só framentassion.

In sèvito a l'ataco terorìstego vegnest l'11 de setenbre 2001, i Stati Unii i gà estéxo ła só lota al terorismo oltra dei confini nassionałi, faxéndo guere in Afghanistan cóntro i tałebani e in sèvito in Iraq cóntro ła ditatura de Saddam Hussein e i só sostenidóri iracheni. Sta ùltima guera, in particołar,a càuxa de motivassion dopo rivełae infondae e łe acuxe de vołer inposesarse sol che del petrołio irachen, ła xe stà contestada da gran parte de l'opinion pùblica del móndo intiero e ła gà vùo cofà rixultà primo qûel de far crołar l'imàxene e ła credibiłità dei Stati Unii de front a ła comunità internassionałe, specialménte del móndo àrabo-musulman.

Zeografia

I Stati contegnentai i xe divixi in:

• ła costa orientałe (East Coast): da nord a sud, Maine, New Hampshire, Vermont , Massachusetts, Rhode Island , Connecticut, New York, Pennsylvania , New Jersey, Delaware, Maryland, Virxinia, Carolina del Nord, Carolina del Sud, Georgia, Flòrida
• el sud (South): el conprende Virxinia, Carolina del Nord, Carolina del Sud, Georgia, Flòrida, e anca Virxinia Osidental , Kentucky, Tennessee, Alabama, Louisiana, Arkansas, Oklahoma, Texas .
• el Midwest: el conprende Ohio, Michigan, Indiana, Wisconsin, Illinois, Missouri, Minnesota, Iowa, Dakota del Nord, Dakota del Sud, Nebraska e Kansas.
• ła xona montana (Mountain states, compréso el Southwest): łe conprende Montana, Idaho, Wyoming, Nevada, Utah, Colorado, Arizona, Novo Messico.
• ła costa osidentałe (West Coast): la conprende Washington, Oregon e California.

I Stai Unii i chiapa rento, oltra ai 48 stai contegnentai, i stai de l'Ałaska , e de le Hawaii.
Xe parte de i Stati Unii anca el distréto de Cołumbia, che el contien ła capitałe Washington, e vari teritori inte l'Osèano Pasìfego e inte i Caraibi, intra i cuali se ricorda Porto Rico, che la xe ligada ai Stai Unii inte na sociazion ciamada Commonwealth .

I Stati de ła costa orientałe

Giograficaménte sta xona ła conprénde montane base e asè antighe, i Apałachi, có na anda xeneralménte da nord-est a sud-òvest, oltra a tanti fenòmeni łocałi, conprendésti i fenòmeni glaciałe a nord, łe fałie tetòneghe de ła val de l'Hudson, e ła xona de orìxene calcàrea (corałina) de ła Flòrida.
El córso dei fiumi el xe xneralménte da òvest verso est, i ténde a èsar de poca łongésa, ma grandi e de fluso regołar. Łe sèvente łe xe forte, soratut al nord.
I inverni i xe ùmedi e frédi inte'l nord e moderai inte'l sud, łe istà łe xe in stéso ùmede.

I stati del Sud

Sta xona ła ciapa ła banda meridional dei Apałachi, e pi a òvest łe montagne Ozark.
I fiumi i conprende le foci del Mississippi e del Río Grande.
L'influenza climatica pi granda la vien dal Golfo del Mesico, e la conporta inverni miti, umidità, e de tanto in tanto uragani.

I stati del Midwest

Fredi de inverno, caldi d'istà, con un clima da umido verso est a seco verso ovest.
I xe in gran parte stati agricoli e industriali . Xe qua che se cata el "cor", dito heartland, dei Stati Uniti; el Midwest el xe considerà un sentro de valori morali (lavoro serio, casa e fameja, i pionieri su la prateria, e via cussita) par el resto del paese.

El Capitol Reef National Park inte'l Utah.

I stati de la zona montana

Se cata le Montagne Rocioxe e molti deserti (p.e. deserto Sonorano).
La xe na zona seca, soratuto a sud. Ghe xe inverni fredi asè e istà miti a nord, e inverni miti e istà calde a sud.
Sta qua la xe la zona manco abità del paese, e xe in do che se cata molte de le destinazion sèniche dei Stati Uniti (par esenpio el Grand Canyon in Arizona o Yellowstone in Wyoming).

La costa osidental

La conprende montagne bele alte (p.e. Sierra Nevada, vari vulcani), deserti (p.e. Death Valley), e zone umide asè (la costa, soratuto a nord).

Połitica

I Stati Unii i xe na Union Federal de Stadi.

Ła Capital ła xe Washington D.C..

el musso, simboło del Partito Democratico

L'elefante, el simboło del Partito Republicàn

I Stati Unii i gà un sistema bipartitico, caraterizà dunque da ł'alternansa al potere tra i do partiti: Partito Democratico (Democratic National Committee) e Partito Republicàn (Republican National Committee o anca GOP, Grand Old Party).
El Partito Democratico el gà come simboło el musso. I Democratici i gà idee liberałi e progresiste che se identifica con ł'area del sentro e deła sinistra moderada e riformista: pa 'sti motivi i Democratici i vién anca chiamai Liberals o The Left Wing (l'ala sinistra del parlamento). Atualmente i xé el partito de magioransa che controła ła presidensa (co Barack Obama) e el Senato.
El Partito Republicàn el gà come simboło l'elefante. I Republicani i gà idee conservatrici e liberiste che łe corisponde ała area del sentrodestra: pa 'sti motivi i Republicani i xé chiamai anca Conservatives o The Right Wing (l'ala destra).

Blue States e Red States neła elexión presidensiałe del 2012

I do partiti i gà ognuno un cołore de riferimento: blu pa i Democratici; rosso pa i Republicani. Mentre in Europa el blu el xé in senerałe el cołore del sentrodestra e dei conservatori, in America el xé invexe el cołore del sentrosinistra e dei progresisti. Ma quisti cołori no i xè uficiałi, lori i xè invensiòn deła media. De conseguensa se in Europa el rosso el xé el cołore deła sinistra socialdemocratica e postcomunista, in America el xè invexe el cołore deł sentrodestra. Quando che ogni 4 ani ghe xé łe elexión presidensiałi americane se parla de Blue States e Red States, cioè rispetivamente i stati dove ciapa ła magioransa el Partito Democratico e i stati dove vinse el Partito Republicàn.
Dopo essere stai pa 8 ani ała presidensa americana (co George W. Bush 2001-2009) i Republicani 'desso i xé ała oposixión, ma nel novembre 2010 ae elession de metà mandato i gà conquistà ea magioransa aea Camera dei Rapresentanti dopo 4 ani de magioransa democratica.

Etimołogia

El nome "Mèrica" el riva dal nome de l'esplorador talian Amerigo Vespucci, che par primo el ga reconossuo de essar da rente a un novo contegnente, e no, come che se credeva fin l'ora, a qualche isoea asiatega.
La prima volta che el xe conparso el nome Mèrica xe stà inte la Cosmographiae Introductio, publicada inte'l 1507 dal cartografo todesco Martin Waldseemüller, che el ga proposto de darghe al "contegnente novo" el nome de Vespucci. Scomuncialmente el nome Mèrica el xe stà doparà pa'l Sud del contegnente. Sucessivamente el xe stà estenduo anca a la parte sora.
Ma el xe stà Benjamin Franklin, co intensi raporti epistołari co personalità de ogni clase, a difondar la paroła "mericani" (parola individuante un popolo ugnolo), cussì da rendarla de doparameneto comun.

Varda anca

• Square Deal

	Stati par indice de svilupo uman
Cuel prima		Cuel daspò
Austrałia	3° posto	Paéxi Basi