Visigodos

As migracions d'os visigodos dende Dacia dica Hispania.

Os visigodos estioron un pueblo chermanico. Son a branca occidental d'os godos y ocupaban antes d'a invasión hunna un territorio que correspondeba d'alto u baixo a l'antiga Dacia. En os tiempos d'as primeras invasions d'o Imperio Román os visigodos emigroron ta Europa Occidental, on facioron liga con o Imperio Román d'Occident contra atros pueblos chermanicos invasors y contra os hunnos. Os visigodos aduyoron a los romans a forachitar a los vandalos y alans d'Hispania y a vencer a Atila en a batalla d'os Campos Catalaunicos. Os visigodos formoron un primer estato en o sud d'a Galia con capital en Tolosa y dimpués en fuoron forachitatos ta Hispania y formoron un estato visigodo con capital en Toledo que duró dica a invasión musulmana. Dimpués d'a invasión musulmana bells visigodos podioron conseguir alianzas u pactos con os musulmans y controlar d'esta traza localment os suyos territorios, como estió o caso d'o conte Casio, o fundador d'a dinastía Banu Qasi. Con o tiempo s'asimiloron a la clase dirichent musulmana u emigroron enta a Gallaecia u Cantabria. Os visigodos estioron arrians més tiempo que atros pueblos chermanicos.

Os visigodos en Dacia

Os godos yeran orichinarios d'o sud d'Escandinavia, tierra que encara se diz Gotland. Dende o suyo puesto d'orichen emigroron ta Europa centro-oriental arribando en as costas d'a Mar Negra, ocupabando una ampla zona que d'antes estió d'os sarmatas y dacos. En ixos amplos territorios os godos y os pueblos sozmesos desembolicoron o que os arqueologos denominan a Cultura de Czerniachow, una cultura que teneba contacto con o Imperio Román. Os godos presionaban a los romans en a Dacia romana, y encara que o emperador Aurelián derrotó a los godos en l'anyo 271, prenió a decisión d'abandonar esta provincia, feito que se fació entre os anyos 271 y 272. Os godos podioron ocupar ya tota Dacia. Encara ye polemico si a mayoría d'os dacorromans fuoron evacuatos u a mayoría se i quedoron.

D'esta traza en o extenso territorio gobernato por os godos s'encomenzó a parlar de godos de l'este (ostrogodos) y godos de l'ueste (visigodos), d'alto u baixo con o río Dniéster como deseparación. Entre os restos arqueolochicos atribuitos a los visigodos en o periodo que vivioron a lo norte d'o Danubio en Dacia tenemos o "Trasoro de Pietroasele", trobato en Pietroasele (Buzău) en l'anyo 1837 y atribuito a lo rei Athanarico. N'este periodo os visigodos se convirtioron a lo cristianismo en a suya modalidat arriana. O bispe Ulfilas tradució a Biblia a lo idioma gotico.

A presión goda en Dacia empentó ta Panonia a los carpos (dacos que feban parte d'os dacos libres que poderban haber orichinato sieglos dimpués a los albaneses).

Os ostrogodos y visigodos fuoron derrotatos por os hunnos. Mientres que a mayor part d'os ostrogodos prenioron a decisión de sozmeter-sen a los hunnos, os visigodos y part d'os ostrogodos prefirioron cruzar o Danubio y emigrar t'o Imperio Román d'Orient.

Penetración d'os visigodos en o Imperio Román

Os visigodos permaneixioron en Dacia dica l'anyo 376, quan Fritigern demandó a lo emperador Valent que permitise a los visigodos d'asentar-sen a en la ribera sud d'o Danubio. Os visigodos s'asentoron en a diocesi de Tracia, principalment en Moesia. Manimenos as condicions no yeran as que os visigodos esperaban y se rebeloron. Os romans fuoron derrotatos en l'anyo 378 en a batalla d'Andrianoplin, on o mesmo emperador Valent murió.

En l'anyo 382 Teodosio I lis torna a conceder o dreito d'establir-sen en Tracia y Moesia. Alarico I prene o títol de rei y encomienza atra migración, esta vegata t'o Epiro saqueyando territorios d'os Balcans y o Peloponiso, (Macedonia, Tracia, Focida y Beocia y as ciudatz de Corinto, Esparta, Argos y Megara). A la fin Alarico I ye nombrato Magister Militum d'Iliria, pero dende Iliria os visigodos emigrarán ta Italia, on rematarán saqueyando Roma en l'anyo 410.

Dimpués d'o saqueyo de Roma emigran a lo sud d'Italia adrezando-se enta Africa pero o rei Alarico I muerte en Cosenza, y o suyo sucesor Ataulfo adreza a lo suyo pueblo de nuevo a lo norte d'Italia, pasando a la Provenza y arribando en Barcelona en l'anyo 415. En l'anyo 416 firman un foedus con Roma en o que se compromenten a pacificar Hispania.

Os visigodos como aliatos d'os romans en Galia (418-476)

Os romans los ninvían ta Hispania pa reconquerir-la. En Hispania empentan a los suevos ent'a Gallaecia, os vandalos son en gran mesura destruitos, y os alans tamien son vencitos. En compensación os romans lis conceden Aquitania en l'anyo 417, a cambeyo de que o suyo exercito se comprometa a esfender a lo imperio d'atros invasors y que o rei visigodo gobierne como lugartenient imperial. O foedus de l'anyo 418 permite que os visigodos s'estableixan en rechimen d' hospitalitas en Aquitania II, en a Novempopulania y en Narbonés I, que comprendeba Burdeus, Piteus y Tolosa, que esdevinió lur capital. Se suposa que en ixos territorios s'establioron uns 100.000 visigodos, numero que creixió en tot o sieglo V dica os 200.000 con a plegata d'atros continchents chermanicos asimilables (como os ostrogodos). En Aquitania os visigodos reciben dos tercios d'a tierra en calidat de biens radices libres d'impuestos (as ditas sortes goticas)

Quan a invasión hunna de Galia de l'anyo 451 os visigodos contribuyen a la victoria d'o cheneral Aecio en a batalla d'os Campos Catalaunicos, que se diz que quasi estió una batalla entre visigodos de part d'os romans y ostrogodos de part d'os hunnos. En a "Cronica de los Conquiridors" de Chuan Ferrández d'Heredia fan referencia a los visigodos federatos y establitos en Tolosa en o capítol dedicato a Atila.

Et finalment Ecio patricio con los Godos et con las otras ayudas como victoriosos echaron al rey Atilla et a su hermano, asi sobrados et vencidos, delas Gallias, el persiguiendo los fueron forçados de retornar en Germania, et apres poco tiempo Atilla mato a su hermano Blenda. Et seyendo Turismundo mucho alegre porque la batalla era vencida, dixo a Ecio patricio que que le parecie que fiziessen ; et el temiendo que los Godos tornassen contra ellos, consello que se tornassen a lures ciudades et que recrearien alli ; et assin lo fizieron ; et como Theundedo fues muerto en la batalla, fue leuantado rey delos Videgodos el dicho Turismundo fillo suyo, et regno vn anyo; el qual ya sea fuesse muyt fuert et tuviesse muchas gentes et buenas, en todo su tiempo no huuo batalla ; et fusse a Tholosa et fizo soterrar los suyos muertos. Et Yonio, bispe de Agustodiuo, et apres fizo entre los suyos. Et enel anyo segundo que començaua a regnar, por consello de sus hermanos fue muerto a traycion; mas ante que muries, conociendo lur maldat, mato el algunos de aquellos que le auien tractado la muert.

O Reino Visigodo de Tolosa (476-507)

Ta más detalles, veyer l'articlo Reino Visigodo de Tolosaveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

A muerte d'o zaguer emperador román fa que o rei Eurico se sienta independient se pueda chustificar como hereu d'o Imperio Román. Encomienza una expansión territorial, y os visigodos conquieren gran part d'Hispania.

Reconstruccion aproximata y desacherata d'o Reino Visigodo de Tolosa.

Dimpués que os visigodos saqueyasen a Lusitanica, Eurico decidió adhibir a lo suyo reino a provincia Tarraconense y ninvió a lo conte Gauterico, qui dende Burdeus siguió a calzata romana y entró en Hispania por o puerto de Roncesvals. Dimpués prenió Pompaleo y baixó por a val de l'Ebro y prenió Caesaraugusta. Dende ixe inte os hispanorromans d'a val de l'Ebro serán dominatos por una clase dirichent guerrera visigoda que durará dica a invasión musulmana.

En l'anyo 507 o rei franco Clodoveu I se convierte a lo catolicismo y con l'aduya d'os galorromans y os bretons esclafa a los visigodos y los forachita a lo sur d'os Pirineus (encara que conserven Septimania).

O Reino Visigodo de Toledo (507-711)

Ta más detalles, veyer l'articlo Reino Visigodo de Toledoveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

A mayor part d'os visigodos s'estableixen en a Meseta. A mayor densidat de visigodos yera en l'actual provincia de Segovia. Toledo ye a capital d'os visigodos dende l'anyo 554. En o futuro os visigodos prebarán d'ocupar tota a peninsula iberica. Os visigodos esdevienen una clase dirichent melitar que evita mezclar-se con os hispanorromans. Os visigodos en Hispania se comportan como cristians integristas y persiguen las manifestacions de relichiosidat popular, que se remontan a la relichión romana y os elementos prerromans que asimiló. O rei s'apoya a la Ilesia, convoca concilios y regula a vida relichiosa d'o reino.

En l'anyo 586 sozmeten a los suevos de Gallaecia. A fins d'o sieglo VI ya bi ha reis catolicos que obligan a lo resto d'os visigodos a convertir-se a lo catolicismo deixando l'arrianismo.

Se considera que con Suintila (621-631), qui venció a los bizantins y ocupó as ciudatz-estato hispanorromans d'o sud, s'unificó politicament a peninsula. En o sieglo VII s'introduce un dreito unico pa unificar l'aristocracia guerrera visigoda con l'aristocracia hispanorromana. D'astí enta debant o idioma gotico encomienza a desapareixer.

Os visigodos dimpués d'a invasión musulmana

Bi habió visigodos que plegoron a alcuerdes con os musulmans como Teodomiro, que gobernó o sudeste (a Cora de Todmir) u en a redolada de Tudela, sud de Navarra y sud de Cinco Villas en Aragón o conte Casio, qui estió establidor d'os Banu Qasi.

Os visigodos en fuents aragonesas y navarras

Os visigodos representaban pa a visión historica os hispans d'a Edat Meya una triple lechitimidat: politica (presuntos hereus d'os romans), relichiosa (os concilios visigodos, a fitación de Wamba, etc...) y territorial (antigos sobirans de tota a peninsula). Manimenos en a Corona d'Aragón y Navarra a clase dirichent no se consideraba heredera d'os visigodos en a mesma mesura que en o reino d'Asturias, reino de Leyón u reino de Castiella, on plegaban a imitar as institucions visigodas u tener a lechislación visigoda como bella cosa més present. En a Corona d'Aragón y Navarra teneban tamién como referents historicos os territorios ultrapirinencos y l'antiguedat clasica (como contrimuestra a figura de Chuan Ferrández d'Heredia).

Os visigodos son mencionatos en o "Liber Regum", en a "Cronica de Sant Chuan d'a Penya" y en a obra de Chuan Ferrández d'Heredia, por eixemplo en a "Cronica de los Conquiridors"

En o "Liber Regum" lis dicen simplament godos:

Estos godos foron de lignage de Gog e Magog e foron paganos. E mouieronse doltras flum de Danubium e passoron mar e uinieron gastando por tierra de Roma. Et era apostoli en Roma el Papa Aldebrando. Et uinieron estos godos en España & estidieron hi CCC.LXXX.III annos, e muitos dellos tornoronse a la fe de Xps.

Al tiempo que los godos passoron mar estonz se mouie Mahomath de Meca e fo predicant en Arabia e conuertie grant gent en so lei. Era dc.LX.II.

Del dia que Xps priso passion tro al dia que Mahomat se mouie de Meca ouo DC menos VIII annos. E Mahomath auia a la ora XL.ª annos.

Quando foron los godos entrados en España leuantaron rei de lor lignage, et est rei ouo nomne el rei Cindus, e fo xiano, e quando murie el rei Cindus non lexo fillo nenguno e rremaso la tierra sines rei, e non s acordoron las hientes de la tierra por auer rei e guerrioron se todos unos con otros grandes tiempos, e pues accordoronse e fizieron rei por elección al rei Bamba, e fo muit buen rei. Era DCC.X.

Est rei Bamba establie los arcebispados e los bispados de España dond ad ond fossen. Regno el rei Bamba XII annos, e pues empozonolo Eurigius, el nieto del rei Cindus, qui era godo, e murie assi e soterroronlo en Bragana.

[Fol. 32 V.] Quando fo muerto el rei Bamba regno Egica, so fillo de Eurigius, daquest qui auia empozonado al rei Bamba, et no regno mas de dos annos.

Murie Egica, e rregno el rei Vatizanus, qui fo del lignage de los godos.

Murie Vatizanus, e rregno el rei Rodrigo en toda España, e fo buen rei e conquirie muito. E pues, por el consello de los fillos de Vatizanus e de so nieto del rei Rodrigo el comte don Iulian, entroron los moros en España. Era DCC.LII.

A la sazón que regnaua el rei Rodrigo en Espanna uinieron d Affrica el rei Aboali & Abogubra. Et era rei en Marruecos el rei Amiramozlemin, & estonz uino Taric en España & arribo a Gibaltaric. Est rei Abocubra & Aboali & Amiramozlemin, con otros Reies muitos e con grandes poderes de moros uinieron al rei Rodrigo a la batalla & lidioron con el en el campo de Sagnera. En la primera fazienda foron mal treitos los moros. Mas pues cobroron & foron rancados los xianos. En aquella batalla fo perdido el rei Rodrigo, e no lo troboron ni muerto ni biuo. Mas pues, a luengos tiempos, en Uiseu, en Portogal, troboron un sepulcre que dizian las letras qui desuso eran escritas que alli iazia el rei Rodrigo, el qui fo perdido en la batalla en el tiempo de los godos.

En a "Cronica de Sant Chuan d'a Penya" parlan en cheneral de godos en o capítol III sin especificar, de fueras d'a primera linia, on enumeran bells pueblos chermanicos distinguindo entre visigodos y ostrogodos:

En aquesta isla de Estancia habitaban aquestas naciones; godos, vesegodos, estargodos, dauirugis, arcas et tanib. De las quales naciones nos callaremos, sino tan solamente de los godos, porque aquestos fueron los que tollieron Espanya a los romanos, que senoryaron los griegos et a la nacion que Ercules y auia lexado.

Et depues de aquesti Valient; et en tiempo de aquesti los godos tenyan lur senorya mayor en Tolosa. Et aquesti rey prendió las tierras de Bética et de Galicia, las quales tenían los vándalos et los alanos; et depues de aquesti Goodorenus; et depues su filio Turison; et depues su hermano Trodoricho. Et depues de aquesti regnó su hermano Euricho. Et aquesti prese en España la prouincia de Tarragona, et depues de aquesti regnó su fillo Alarico; et depues de aquesti regnó su nieto Teodio; et depues de aquesti Teodiselo; et depues de la muert de aquesti, regnó Agila, et depues Athanagildo; et depues de aquesti Luynba; et depues su hermano Leouegildo; et aquesti exampló et crexió su reyno en Spanya; et aqueste fué el primero rey que se posó a taula todo solo, et se vistió de vestiduras reales, porque enantes todos los reyes se posauan en lur taula con caualleros et hauían ansi vestidos como caualleros. Et depues de la muert de aquesti, regnó su fillo Ragaredo el qual fué católico rey et gitó toda la error arriana de su Regno, et fizo cabo de su tierra la ciudat de Toledo. Et depues regnó su fillo Liuba; et depues de la muert de aquesti, regnó Gondemarus; et depues de aquesti Sisabuch. Et aquesti rey fiço vaciar por fuerça los judios. Et en tiempo de aquesti començó a predicar Mahomat la suya maluada secta en la tierra de Mecha, et en otras tierras de allende el mar, que agora son de moros. Et depues de aquesti regnó su fillo Recaredo et murió moço de muy poca edat. Et depues de la muerte de aquesti regnó Suincilla, fillo del rey Recaredo primero.

Et aquesti tollió las tierras todas et ciudades, et lugares que los romanos senyoriauan en Espanya. Et aquesti fué senyor de toda Espanya sin ningun: (sic). Et depues de la muert de aquesti regnó su fillo Raximiro. Et depues Sisenando su hermano; et depues de la muert de aquesti regnó Ensencilla; et depues Engulga; et depues de la muert de aquesti regnó Sinda Zundo, et depues de aquesti Recesundo; et depues de la muert de aquesti regnó el rey Bamba, el qual fué muy cathólico rey et virtuoso et batallero mui marauilloso, é exampló é creció muyto el su Regno. Et depues de aquesti, regnó el rey Eruigio, et depues de aquesti regnó Flauio Egica; et depues regnó Euzica, el qual fué rey muy cruel; et aquesti rey mandó que todos los clérigos et vispos de su tierra prendiessen et tuuiesen drudas, et aquesti fiso enderrocar todas las fuerças de las ciudades et lugares de su Regno por tal que las sus gentes no pudiessen rebellar contra éll. Et depues de aquesti, regnó Rodrigo el qual perdió su tierra en la forma siguient: Es a saber, como el compte Julian, sosmeso del dito rey Rodrigo, fues ydo por mesagería al rey Aboali, moro, por afferes del dito Rey, et el dito Rey huuo affer con la muller, segunt algunos dizen, ó, con la filla del dito Compte, et estando en seruicio del dito Rey; porque el dito Compte tornado de la mesagería et sabiendo la maleztat que su senyor le hauía feita, tractó que su senyor perdiesse su Regno. Et ansi se fizo; que en el año de nuestro Senyor DCC.XIII. XI dias de noviembre, en el tercero año del regimiento del dito rey Rodrigo, por tratamiento del dito compte Julian vino en Espanya el rey Abohali, ensemble con los reyes de Aboçubra, de Marruecos, de Ezarich et con otros reyes de moros por numero XXV; et las oras fué vencido el dito rey Rodrigo por los moros, et toda Espanya prendida entro Azlet de Prouença, dentro XIIII. meses; segunt que las coronicas dizen mas largament, las de Castiella, en otro volupne de liuro et la batalla y mete.

Bibliografía

• (es) José-Ramón Julià et al.: Alas de historia universal. Tomo I De los orígenes a las crisis del siglo XVII. Editorial Planeta.
• (es) Hermann Kinder y Werner Hilgemann: Atlas histórico mundial. Ediciones Itsmo.
• (es) Francisco Beltrán Lloris: Los germanos. Historias del Viejo Mundo, num. 15. Historia 16.
• (es) María Victoria Escribano Paño: Los godos en Aragón. CAI 100.