拿破崙
想搵呢個詞嘅第啲意思，睇下【拿破崙 (搞清楚)】。
拿破崙（法文：Napoléon Bonaparte，原名Napoleone di Buonaparte，1769年8月15號—1821年5月5號），法蘭西第一共和國第一執政（1799年—1804年），法蘭西第一帝國同百日王朝嘅皇帝（稱為拿破崙一世，1804年—1814年、1815年）、軍事家、政治人，曾經佔領過西歐同中歐嘅大部份地方。
生平[編輯]
早年[編輯]
拿破崙1769年喺科西嘉島嘅阿雅丘城出世。科西嘉島啱啱賣咗畀法國後，法王承認拿破崙嘅老竇係法國貴族。響老竇嘅安排下，拿破崙 9 歲時到法國布裏埃納軍校接受教育。1784年以優異成績畢業後，被選送到巴黎軍官學校。
拿破崙 16 歲時老爸去世，佢中途輟學並被授予炮兵少尉頭銜。喺隨部隊駐防各地期間，佢閱讀咗好多啟蒙思想家嘅著作，其中盧梭嘅思想對佢嘅影響非常大。1789年法國大革命爆發後，拿破崙返到科西嘉，當時科西嘉係三種勢力嘅競逐場，革命派、保皇派同獨立派，拿破崙加入支持革命嘅雅各賓派，喺一個志願軍團得到中校嘅地位，後來因為同科西嘉獨立英雄保利起衝突，拿破崙全家被迫喺1793年6月逃到法國。
喺1793年12月，24歲嘅拿破崙帶兵攻下咗保王黨嘅堡壘土倫。1794年熱月政變中拿破崙由於同羅伯斯比爾兄弟關係緊密而受到調查，後嚟因拒絕到意大利軍團嘅步兵部隊服役而被免去准將軍銜。1795年佢受巴黎督政官巴拉斯之托成功平定保王黨武裝叛亂，一夜之間榮升為陸軍中將兼巴黎衛戍司令，喺軍界同政界中嶄露頭角。
拿破崙係一名出色嘅軍事家，對當時嘅軍事知識深有研究，善於將各種軍事策略運用於實戰之中，尤其係主張將火炮集中使用，以及充分發揮騎兵嘅機動作用。1796年3月2號，26歲嘅拿破崙被任命為法國意大利方面軍總司令，3月9號同情人約瑟芬•博阿爾內結婚，之後就匆匆趕去前線。喺意大利，拿破崙統帥嘅軍隊多次擊退咗奧地利同薩丁組成嘅第一次反法同盟聯軍，最後迫使對方簽署咗有利於法國嘅停戰條約。
埃及之戰同奪取權力[編輯]
取得意大利之役嘅勝利後，拿破崙嘅威信越嚟越高，佢成為法國人嘅新英雄。而佢嘅崛起令督政府感到受威脅，因此任命佢為埃及軍司令，派去東方以抑制英國喺該地區勢力嘅擴張。喺拿破崙嘅遠征軍裏面，除咗2000門大炮外，重帶咗175名各行業嘅學者同成百箱嘅書同研究設備。喺遠征期間拿破崙曾下達過一條著名嘅指令：「俾驢子同學者走喺隊伍中間。」拿破崙本人精通數學，同時重好鍾意文學同宗教，受啟蒙運動嘅影響極大。
然而1798年遠征埃及本身係一個大失敗。拿破崙嘅艦隊被英國嘅海軍上將納爾遜完全摧毀，部隊被困喺埃及。1799年回國時，400艘軍艦只剩低2隻小艦，原本侵略印度嘅計畫受阻，人員損失慘重。
呢個時候歐洲反法同盟逐漸形成，而法國國內保皇派勢力則漸漸上升。1799年8月，拿破崙最終決定趕返巴黎。1799年10月，返到法國嘅拿破崙被當作“救星”嚟歡迎。11月9號，拿破崙發動咗霧月政變並獲得成功，成為法國第一執政，實際為獨裁者。
拿破崙之後進行咗多項政治、教育、司法、行政、立法、經濟方面嘅重大改革，其中最著名並且直到今日依然有重要影響嘅《拿破崙法典》，係政變當晚拿破崙下令起草嘅，好多條款拿破崙本人親自參加討論最終確定，基本上採納咗法國大革命初期提出嘅比較理性嘅原則。法典喺1804年正式實施，即使係喺一個多世紀後依然係法國嘅現行法律。法典對德國、西班牙、瑞士等國嘅立法起到重要影響。喺政變結束後三個禮拜拿破崙向人民發佈嘅公告中，佢自豪噉宣稱：「各位公民，大革命已經返到佢當初籍以發端嘅原則。大革命已經結束。」
1802年8月，修改共和八年憲法，改為終身執政。1804年11月6號，公民投票通過共和十二年憲法，法蘭西共和國改為法蘭西帝國，拿破崙為法蘭西人嘅皇帝，稱為拿破崙一世。12月2號，拿破崙仿效查理曼大帝嘅歷史，以減少革命派對於佢登基帝位嘅不快。呢次係第一次法國皇帝以自己嘅「名」作為皇帝嘅稱號。佢並唔係由教皇庇護七世加冕，而係自己將皇冠戴喺個頭度，然後重為妻子約瑟芬•博阿爾內加冕為皇后。一年之後，佢又喺意大利由教皇加冕為意大利國王。
1805年8月，奧地利、英國、俄國組成咗第三次反法同盟，拿破崙於是喺9月24號離開巴黎，親自揮軍東進，到10月12號法軍已經佔領咗慕尼克。10月17號法國同奧地利喺烏爾姆激戰後，反法同盟投降。之後法國又取得咗奧斯特裏茨戰役嘅勝利，反法同盟再度瓦解，並且迫使奧地利取消神聖羅馬帝國嘅稱號。拿破崙隨後聯合德國境內各諸侯國組成「萊茵邦聯」，將佢置於自己嘅保護之下。次年秋天，英國、俄國、普魯士組成咗第四次反法同盟，但係10月14號法軍同時喺耶拿同奧爾斯塔特擊潰敵軍，普魯士嘅軍隊幾乎全軍覆沒，拿破崙因此取得咗德國大部分地區。1807年6月法軍又喺波蘭大敗俄國軍隊，拿破崙同俄國沙皇亞歷山大一世會面，雙方簽訂同平條約，喺之前一年拿破崙頒佈咗《柏林赦令》，宣佈大陸封鎖政策，禁止歐洲大陸同英倫嘅任何貿易往來。自此，法國喺歐洲大陸嘅霸主地位得到確立。拿破崙一世兼任意大利國王、萊茵邦聯嘅保護者、瑞士聯邦嘅仲裁者，並分別封佢嘅兄弟約瑟夫、路易、熱羅姆為那不勒斯、荷蘭、威斯特伐利亞國王。
轉折：入侵西班牙、奧地利同俄羅斯[編輯]
1807年末西班牙爆發內部動亂，西班牙國王遭到人民嘅唾棄。拿破崙於是乘機入侵西班牙，並畀佢大哥約瑟夫•波拿巴（Joseph Bonaparte）成為西班牙國王。但係呢個舉動遭到西班牙人嘅反對，拿破崙根本無法平息當地嘅暴動。英國喺1808年介入西班牙爭端，英軍8月8號登陸蒙得戈灣，8月30號佔領咗整個葡萄牙。之後佢哋喺當地民族主義者嘅支持下，逐步將法軍趕出伊比利亞半島。
正當拿破崙陷入西班牙泥潭之際，1809年初第五次反法同盟組成。奧地利從後偷襲法國喺德國嘅領土，拿破崙被迫退出西班牙，率軍東征。奧地利軍隊雖然一開始取得優勢，但係拿破崙好快就轉敗為勝，迫使奧地利簽訂維也納和約，再次割讓土地。次年，拿破崙娶奧地利公主瑪麗•路易莎為妻，法奧結成同盟。
到咗1811年末，法俄關係已經開始惡化，俄國沙皇亞歷山大一世拒絕繼續同法國合作抗英，最後戰爭爆發。拿破崙率領操12種語言嘅50萬大軍進入俄羅斯。俄軍採取撤退唔抵抗嘅戰術，直到1812年9月12號法軍歷經博羅金諾戰役（法軍有7萬人陣亡同重傷）後，進入莫斯科。拿破崙本來以為亞歷山大一世將會妥協，但估唔到迎接佢嘅係莫斯科全城嘅大火。而呢個時候國內又有人策劃咗一次失敗嘅政變，令佢不得不趕返法國，最後返到法國嘅只有一萬人。
戰敗、流放、百日政權同滑鐵盧[編輯]
1813年英國、俄國、普魯士同奧地利組成咗第六次反法同盟，雙方喺德國境內多次激戰。雖然法軍取得多次勝利，但係針對拿破崙嘅壓力就越來越大，直到10月嘅萊比錫戰役法軍被擊潰，各附庸國都紛紛脫離法國獨立，同盟軍開始向巴黎推進。1814年3月31號，巴黎被佔領，同盟軍要求法國無條件投降，同時拿破崙必須退位。1814年4月13號拿破崙喺巴黎楓丹白露宮簽署退位詔書，喺之前兩日拿破崙宣佈無條件投降。拿破崙本人喺退位後被流放到地中海嘅一個小島厄爾巴島。拿破崙保留「皇帝」嘅稱號，但係佢嘅領土只局限喺嗰個小島上。
拿破崙喺去厄爾巴島途中幾乎被暗殺，自己都嘗試自殺不遂。而喺巴黎，路易十八返到法國，重新成為法國國王，波旁王朝復辟。拿破崙嘅妻子同個仔被奧地利人囚禁，重有傳聞指拿破崙將被流放到大西洋上嘅一個小島，呢一切令拿破崙別無選擇，最後喺1815年2月26號逃出厄爾巴島，率領1000人於3月1號返到法國。本來被派嚟阻止佢嘅法國軍隊轉而繼續支持拿破崙。3月20號拿破崙返到巴黎，呢個時候佢已經擁有一個 14 萬人嘅正規軍同20萬人嘅志願軍，路易十八逃走，百日王朝開始。
但係好景唔長，歐洲各國迅速組成第七次反法同盟。1815年6月18號拿破崙嘅軍隊喺比利時滑鐵盧戰役中全軍覆沒，7月15號佢正式投降。法蘭西第一帝國覆滅，路易十八再度復辟。拿破崙被流放到聖赫勒拿島。1821年5月5號，拿破崙喺島上去世，5月8號喺禮炮聲中呢位征服者被埋葬喺聖赫勒拿島上嘅托貝特山泉旁邊。直至今日，拿破崙嘅死因重係眾說紛紜，英國醫生嘅驗屍報告顯示佢係死於嚴重胃癌，但新嘅研究認為拿破崙死於砷中毒，而且喺當年貴族鍾意用嘅牆紙上，歷史學家亦發現含有砷嘅礦物，估計係因為環境潮濕而畀砷喺環境中滲透出來。
佢去世後九年，新嘅奧爾良王朝喺人民嘅壓力之下將拿破崙嘅塑像重新豎立喺旺多姆圓柱上。1840年，法國七月王朝嘅路易•菲利浦派佢個仔將拿破崙嘅遺體接返。嗰年12月15號，拿破崙嘅靈柩被運返巴黎，喺經過凱旋門後安葬喺塞納河畔嘅老殘軍人退休院（即榮譽軍人院）。
影響[編輯]
拿破崙係一名出色嘅軍事家，佢一生親自參加嘅戰役達到60幾個，而佢指揮嘅多個戰役，直到今日喺軍事史上依然有重要意義。但係佢嘅征戰打破咗歐洲嘅權力均衡，導致其他歐洲強權7次組成反法同盟，最終徹底擊敗拿破崙。喺拿破崙戰敗後嘅維也納會議上，新嘅歐洲秩序同平衡好快被重新建立起來。
雖然拿破崙曾經叱吒風雲幾十載，但係佢嘅功績係短暫嘅，喺佢退位後，法國嘅疆域好快又恢復到佢執政之前嘅樣，拿破崙嘅戎馬生涯對之後嘅歐洲歷史並無重大影響。唯一可以令佢載入史冊嘅，係由佢本人下令編撰嘅《拿破崙法典》，呢部法典係好多現代民主國家法律體系嘅原型。
此外，拿破崙亦係最早提出歐羅巴合眾國構想並試圖通過武力嚟實現嘅人。雖然佢本人並未成功實現呢個夢想，今日嘅歐洲正在朝向一體化嘅目標邁進。
拿破崙為法國帶嚟榮耀，法國人民始終愛戴呢位法蘭西戰士（有趣嘅係，佢喺18歲之前始終認為法國唔係佢嘅祖國），1840年12月佢嘅遺體運抵巴黎後，90萬巴黎市民冒著嚴寒迎接佢。而喺多年後，拿破崙亦贏得對手嘅尊敬。1855年英國維多利亞女王帶王儲（即後來嘅愛德華七世）到老殘軍人院，女王讓王子「喺偉大嘅拿破崙墓前下跪」。
參考[編輯]
- （德）艾米爾•路得維希（Emil Ludwig）著／梅沱等譯：拿破崙傳，1999年廣州：花城出版社，ISBN 7536026441
- （法）布里昂（F. D. Bourrienne）著／鬱飛譯：拿破崙傳，1996年天津：天津人民出版社，ISBN 720111072
事蹟[編輯]
出面網頁[編輯]
 |
維基同享有多媒體嘅嘢： 拿破崙 |
| 前任: 五人督政委員會 保羅·巴拉斯 羅格·杜可斯 路易-耶路米·哥埃爾 讓-弗朗索瓦·慕霖 伊曼鈕·西耶斯 |
法國國家元首（首次） | 繼任: 路易十八 （法國國王） |
||
| 臨時執政 1799年11月11號 - 12月12號 |
第一執政 1799年12月12日 - 1804年5月18號 |
法國人民嘅皇帝 1804年5月18日 - 1814年4月6號 |
||
| 前任 路易十八 （法國國王） |
法國人民嘅皇帝 1815年3月20號-6月22號 |
繼任: 拿破崙二世 （法國人民嘅皇帝） |
