Sent Kits da Nevis

Sent Kitsan da Nevisan Federacii
Federation of Saint Kitts and Nevis

Flag	Valdkundznam
Pälidn	Baster
Eläjiden lugu (2015)	51 936 ristitud
Pind	261 km²
Kel'	anglijan
Valdkundan pämez'	Elizavet Toine
Päministr	Timoti Harris
Religii	hristanuskond
Valüt	päivnouzmkariban dollar (XCD)
Internet-domen	.kn
Telefonkod	+1-869
Aigvö	UTC-4

Sent Kits da Nevis, täuz' oficialine form — Sent Kitsan da Nevisan Federacii (angl.: Federation of Saint Kitts and Nevis vai Federation of Saint Christopher and Nevis), om sar'hine valdkund Kariban meren päivnouzmpoles. Sen pälidn da kaikiš suremb lidn om Baster.

Sent Kitsan da Nevisan Federacii om kaikiš penemb Amerikan da Päivlaskmaižen šurupoliškon valdkund ičeze pindan dai ristitišton mödhe.

Istorii

Vl 1983 sügüz'kun 19. päiväl Sent Kits da Nevis tedoti ičeze ripmatomudes Sures Britanijaspäi.

Geografijan andmused

Sent Kitsan da Nevisan kart.

Sent Kits da Nevis sijadase kahtil saril vulkanižen augotižlibundanke — Sent Kits da Nevis. Valdkundan pind om 261 km², sidä kesken Sent Kits — 168 km², Nevis — 93 km². Narrouz-salm erigoitab sarid toine toižespäi, se om 3 km levette. Korallrifad ümbärtas muugotid sarid.

Valdkund om meriröunoiš Sen Bartel'minke (Francijan merentagaine territorii) pohjoižpoles, Antiguan da Barbudanke päivnouzmpoles, Montserratanke suvipäivnouzmpoles (Suren Britanijan merentagaine territorii), Sint Estatiusanke (Alamaiden merentagaine territorii) lodehes. Ühthine randanpird om 135 km. Ei ole röunoid madme.

Kaikiš korktemb čokkoim om sambnu Ljamuig-vulkan (1156 m) Sent Kits-sarel. Nevis-saren korktembaine čokkoim om ühtennimižen Nevis-vulkanan pä (985 m). Tropine mec otab 17% valdkundan territorijad.

Klimat om tropine passatine, neps da räk. Kun keskmäine lämuz om +26°C. Paneb sadegid 1500 mm (alangištoil) da 3700 mm (mägil), tazomäras vodes ümbri.

Londuseližed varad oma kala, väghine mahuz, keitandsol, lete, gravii, kived.

Tobmuz

Sent Kitsan da Nevisan valdkundan tobmuden pert' Basteras.

Ohjandusen form om parlamentine monarhii, federacii parlamentižen demokratijanke konstitucižen monarhan ohjandusen al, äjiden partijoiden sistemanke.

Valdkundan pämez' om Suren Britanijan Elizavet Toine-kunigaznaine, hän paneb radnikusele jenaral-gubernatorad. Jenaral-gubernator paneb ministrid päministran nevondan mödhe. Parlamentan ezipartijan lider tegese päministraks.

Federaline parlament om üks'kodine Nacionaline Suim (angl.: National Assembly) 15 ühtnijanke (11 — kaik rahvaz valičeb, 3 — jenaral-gubernator paneb, 1 — enzne valdkundmez'). Heiden valdatusiden strok om viž vot. Sen ližaks ičeze parlament om Nevis-sarel 8 ühtnijanke.

Päjärgvaličendad parlamentha oliba vl 2015 uhokun 16. päiväl. Timoti Harris radab päministran vs 2015 uhokun 18. päiväspäi.

Administrativiž-territorialine jagand

   Kacu kirjutuz: Sent Kitsan da Nevisan administrativiž-territorialine jagand.

Sent Kits da Nevis alajagase 14 tulendha (angl. parish), 9 niišpäi oma Sent Kitsal da 5 — Nevisal.

Eläjad

Sent Kitsas da Nevisas elädas kitsalaižed vai nevisalaižed.

Toižed lidnad enamba 1 tuh. ristitud oma Sendi Point Taun (kahtenz' surtte pälidnan jäl'ghe) da Sent Pol Kapister Sent Kits-sarel, a mugažo Čarlstaun, se om surembaine Nevis-sarel.

Ižanduz

Turizm, elektrotehnine tegimišt, madaliden valdkundmaksoiden zon da maižanduz (saharrogon da puvillan kazvatuz) oma Sent Kitsan da Nevisan ekonomikan päsarakod.

Vl 2010 eksport valdkundaspäi oli radiopalad (23%), radiooigendimed (20%), palad elektrolikutimiden täht (15%), toine elektroladimišt (15%); toine eksport — pened punolendimed (4%, 2 tonnad penemb jügutoitmižvoindanke), ehtatimed (3%), olud da alkogoližed jomad (3%). AÜV oma pätorguindühtnijaks (eksportan dai importan läz pol't).

Irdkosketused

• Sent Kitsan da Nevisan Federacijan ohjastusen oficialine sait. (angl.)
• Sent Kitsan da Nevisan informacine sait. (angl.)