北大西洋公約組織

北約旗

北大西洋公約組織（英文：North Atlantic Treaty Organisation，縮寫 NATO），簡稱北約，係個為協同防衞而起嘅國際組織。佢係喺1949年4月4日，北美洲及西歐共 12 個國家喺美國華盛頓簽署《北大西洋公約》後正式成立。

北約嘅總部原本設喺法國巴黎，後來搬咗去比利時布魯塞爾。

成立原因

第二次世界大戰後，東歐 8 國喺蘇聯控制下(之後成立咗華沙公約組織‎)，成立咗共黨國家；而中、西歐其他國家，包括戰敗嘅德國同埋意大利，戰勝嘅英、法等國及其他好多國家，都因為受到戰爭破壞，經濟疲弱，社會動盪，加上各國之內，共產黨勢力膨脹，都大有被共黨接收嘅可能。美國怕無咗成個歐洲，勢必會令佢嘅勢力退返大西洋嘅西岸，令北美形勢陷於孤立，因而一面對歐洲實行“馬歇爾援歐計劃”。對中、西歐非共產國家提供大量軍事、經濟援助，另一方面成立軍事組織——「北大西洋公約組織」以同蘇聯及東歐集團對抗。

組織嘅成員國

北大西洋公約組織嘅成員國，包括西歐嘅英國、愛爾蘭、葡萄牙、比利時、荷蘭、盧森堡；北歐嘅丹麥、挪威、冰島；南歐嘅意大利、希臘；中歐嘅德國（西德，全名為德意志聯邦共和國）；大西洋彼岸嘅美國、加拿大；與及大部份領土喺亞洲、小部份領土喺歐洲、戰略地位極為重要嘅土耳其，合共 16 個國家。

北約嘅組織及協防條款

北約設有一名秘書長處理日常事務。由於佢係軍事組織，所以各成員國國防部長會定期舉行會議。組織嘅主要功能，就係協防各個會員國。任何成員國嘅安全受到威脅，其他國家有加以協助嘅義務。不過，協防行動須要先由組織會員國開會通過。

戰後防務，其實主要由美國出力。喺各成員國中，大多數都有美國駐軍，以保障歐洲地區嘅安全。不過美國如果調動軍隊，同運用設喺該國嘅軍事設施，須要先得該國同意。其中，駐有美軍最多嘅地區係德國。北約嘅軍事指揮，主要係由美國將領擔任。