Australia

Australia Liân-pang/Ò-tāi-lī-a Liân-pang (Commonwealth of Australia/澳大利亞聯邦) ū-sî kiò-chò Ò-chiu, tī Tâi-oân-ōe ū kóng O͘-sú-to-lá-lí-ah (オーストラリア), mā pat kiò Hô-chiu (豪洲), Tāi-ò-su-má-ka-kok, sī chôan sè-kài thó͘-tē bīn-chek tē-6 tōa ê kok-ka, i mā sī Tāi-iûⁿ-chiu siāng-tōa ê kok-ka. Ò-tāi-lī-a pún-sin sī tē-kiû téng thó͘-tē bīn-chek siōng-sè ê 1-tè lio̍k-tē. Tī Ò-tāi-lī-a ê tang-lâm-hong sī Niú-se-lân, pak-pêng 3-ê kok-ka sī Papua Sin Guinea, Ìn-nî kah Tang-tè-būn (East Timor). "Australia" chit-ê Eng-bûn tan-sû ê gôan-thâu sī Latin-gí ê "terra australis incognita" (iá-bōe liáu-kái ê lâm-hong tāi-lio̍k)

Australia Liân-pang

(kok-kî)
chu-kù：Bô
Koaⁿ-hong gú-giân	Eng-gú
Siú-to͘	Kham-poê-la
lú-ông	I-lī-sa-pe̍k jī-sè
chóng-tok	Quentin Bryce
chóng-lí	Tony Abbott
Bīn-chek - chóng bīn-chek - Chúi-he̍k bīn-chek pah-hūn-pí	tē-6 7,686,850 km2 1%
jîn-kháu - Chóng jîn-kháu (2003 nî) - jîn-kháu bi̍t-tō͘	pâi tē-55 miâ 19,834,248 3/km2
To̍k-li̍p - ji̍t-kî	àn Eng-kok 1901 nî 1 goe̍h 1
Hoè-pè	Ò-tāi-lī-a goân
Sî-khu	UTC +8 ~ +11
Kok-koa	Chiân-chìn ê Ò-tāi-lī-a
Kok-chè kong-lêng piàn-sò· bêng-chheng sok-siá	.AU
Tn̂g-tô͘ tiān-oē tāi-bé	61

Le̍k-sú

Tī 50000-ní chêng, Ò-tāi-lī-a chit-ê só͘-chāi to̍h ū jîn-lūi o̍ah-tōng ê kha-liah, chit-chūn tng-tē hia-ê gôan-chū-bîn ê chó͘-sian to̍h-sī ùi Tang-lâm-a poaⁿ-sóa kòe--lài-è. Au-chiu-lâng kàu-kah 17 sè-kí chiah hoat-hiān chit-tè tāi-lio̍k. 1770 nî, Eng-kok soan-pò͘ khai-sí tùi Ò-tāi-lī-a hêng-sú chú-kôan, 1788 nî liáu-āu, Ò-tāi-lī-a chèng-sek chiâⁿ-chòe Eng-kok ê liû-hòng-tē (penal colony).

1901 nî, Ò-tāi-lī-a chiâⁿ-chòe Eng-kok ê liân-pang a̍h-sī kóng hō͘-chòe chū-tī léng-thó͘, sǹg kóng to̍k-li̍p ah (put-kò, si̍t-chè siōng pēng-bô ôan-chôan to̍k-li̍p).

Hiān-chú-sī ê Ò-tāi-lī-a sī kun-chú li̍p-hiān chè ê kok-ka, " kun-chú " to̍h-sī kok-ka gôan-siú. Kun-kù Ò-tāi-lī-a ê hoat-lu̍t, "Eng-kok kun-chú" to̍h-sī Ò-chiu ê kun-chú. 1999 nî, Ò-tāi-lī-a kú-hêng chôan-bîn kong-koat, iōng kiōng-hô thé-chè chhú-tāi lú-hông ê thê-àn siū hó͘-koat.

Chéng-tī

Eng-kok lú-ông sī Ò-tāi-lī-a liân-pang ê kok-ka gôan-siú, chóng-tok sī lú-ông ê tāi-piáu. Put-jī-kò sū-si̍t siōng "kun-chú" chí-sī 1-chióng siōng-tin. Kok-ka ê hêng-chèng kôan-le̍k iû Lōe-koh khòng-chè, chóng-lí sī lōe-koh ê léng-tō-lâng Chóng-lí it-poaⁿ lâi kóng to̍h-sī Chiòng-gī-īⁿ to-só·-tóng ê léng-siù.

Liân-pang gī-hōe iû 2-ê gī-īⁿ cho͘-sêng : Chiòng-gī-īⁿ (150-se̍k) kah Chham-gī-īⁿ (76-se̍k). 2-ê gī-īⁿ múi-hông 3-nî kú-hêng 1-pái ê sóan-kí.

Ò-chiu chèng-tóng

• Ò-chiu Chū-iû-tóng (Australian Liberal Party, kán-chheng "ALP")
• ò-chiu Kang-tóng (Labour Party, kán-chheng "LIB")
• Thôan-kiat-tóng (Unity Party, kán-chheng "UP")
• Ò-chiu Le̍k-tóng (Green Party)
• It-kok-tóng (One Nation Party).

Hêng-chèng-khu

Australia chôan-kok pun-chòe 6-ê chiu, 3-ê léng-thó͘ kap 7-ê hái-goā léng-thó͘.

Chiu

• New South Wales
• Queensland
• South Australia
• Tasmania
• Victoria
• Western Australia

Léng-thó͘

• Australian Capital Territory
• Jervis Bay Territory
• Northern Territory

Hái-goā léng-thó͘

• Ashmore kap Cartier Kûn-tó
• Australia Lâm-ke̍k Léng-thó͘
• Norfolk-tó
• Christmas-tó
• Cocos kap Keeling Kûn-tó
• Coral-hái Kûn-tó
• Heard kap McDonald Kûn-tó

Chú-iàu ê siâⁿ-chhī

• Canberra (Siu-to͘)
• Sydney
• Melbourne
• Brisbane
• Adelaide
• Perth

Tē-lí

Ò-tāi-lī-a kok-lâi tōa-to-sò͘ ê só͘-chāi sī soa-bo̍k he̍k-chiá pòaⁿ-soa-bo̍k tē-tài (soa-bo̍k chiàm 40%). Kok-ka ê tang-lâm-pō͘ kah sai-lâm-pō͘ sio̍k Un-tài khì-hāu, thô͘-chit khah pûi; pak-pō͘ só͘-chāi sī Jia̍t-tài khì-hāu, 1-pòaⁿ sī Jia̍t-tài ú-nâ, koh 1-pòaⁿ sī chháu-gôan; tang-pak-pō͘ ū 1-ê chôan sè-kâi siōng-tōa ê san-ô͘-chiau: Tāi-pó-ta (Great Barrier Reef; 大堡礁)

Keng-chè

Ò-tāi-lī-a sī 1-ê chiâⁿ hôan-êng ê se-sek hūn-ha̍p-hêng keng-chè ê kok-ka, jîn-kun GDP kah Au-chiu sù-tāi keng-chè-thé ū-tè pí. Chōe-kīn chit-chām, Ò-tāi-lī-a ê keng-chè siū-tio̍h chôan-kiû keng-chè lo̍h-nńg ê éng-hiáng, ôan-á pàng-bān cheng-tióng ê sok-tō͘.

Jîn-kháu

Ò-tāi-lī-a tōa-to-sò͘ kok-bîn ê chó·-sian sī 19, 20 sè-kí ê sî-kî î-bîn kòe--lâi ê Eng-kok-lâng. Che í-gōa, koh ū 1-kóa Hi-lia̍p, Italia kah A-chiu kok-ka ê î-bîn poaⁿ-lâi chia tòa. Gôan-chū-bîn chiàm ê pí-lē khah bô kàu 1%. Chham chin-chōe hoat-ta̍t kok-ka sio-siông, jîn-kháu ló-hòa ê būn-tôe ôan-á khùn-jiáu tio̍h Ò-tāi-lī-a.

Ò-tāi-lī-a ê thóng-iōng-gí sī Eng-gí. 1-kóa-á gôan-chū-bîn kàu-taⁿ iu-gôan pó-liû in ê cho̍k-gí. I-bîn cho̍k-kûn ê tē-2 tāi óng-óng ē-hiáng kóng bú-gí kah Eng-gí.

Chong-kàu

Tī Ò-tāi-lī-a, phó͘-lio̍k ū 7,8-siâⁿ ê kok-bîn sìn-hōng Thian-chú-kàu a̍h-sī Sin-kàu.

Gōa-pō͘ liân-kiat

• Ò-tāi-lī-a Lú-iû-kio̍k