Bolivii

Bolivijan Äirahvahaline Valdkund
Estado Plurinacional de Bolivia (isp.)
Buliwya Achka nasyunkunap Mama llaqta (kečuaks)
Wuliwya Suyu (aimaraks)
Tetã Volívia (guaranikš)

Flag	Valdkundznam
Pälidn	Sukre
Eläjiden lugu (2012)	10,027,254 ristitud
Pind	1,098,581 km²
Kel'	ispanijan, kečuan, aimaran, guaranin da völ 33 valdkundkel't
Valdkundan pämez'	Evo Morales
Päministr	hän-žo
Religii	hristanuskond, inkanizm
Valüt	bolivijan boliviano (BOB)
Internet-domen	.bo
Telefonkod	+591
Aigvö	UTC-4

Bolivii, täuz' oficialine form — Bolivijan Äirahvahaline Valdkund (ispanijaks: Estado Plurinacional de Bolivia, kečuaks: Buliwya Achka nasyunkunap Mama llaqta, aimaraks: Wuliwya Suyu, guaranikš: Tetã Volívia), om valdkund Suviamerikan keskuzpalas. Sen oficialine pälidn om Sukre, no parlament da radonoigendajan tobmuden organad sijadase La Pas-lidnas.

Etimologii

Valdkundan nimi anttihe Bolivaran Simonan oiktastuseks, hän oli üks' liderišpäi ispaniž-amerikaižiden sodiden ripmatomudes aigan.

Istorii

Vn. 1825 elokun 6. päivän Bolivii tedištoiti ripmatomudes Ispanijaspäi.

Geografijan andmused

Bolivijan topografine kart.

Bolivii om röunoiš Čilin (röunan piduz — 860 km) da Perunke (1075 km) suvipäivlaskmas da päivlaskmas, Brazilijanke pohjoižes da pohjoižpäivnouzmas (3423 km), Paragvajanke suvipäivnouzmas (750 km), Argentinanke suves (832 km).

Valdkundan kaikiš korktemb čokkoim om Saham-vulkan, 6542 m valdmeren pindan päl. Leved Paragvai-jogi jokseb Atlantižhe valdmerhe, no valdkund om mererandatoi.

Londuseližed päresursad — londuseline gaz, kivivoi, tin, cink; toižed — vol'fram, antimonii, hahktin, litii, raudkivend, kuld, hobed, mec, gidroenergii.

Tobmuz

Bolivijan parlamentan pert' Murillo-torgul La Pasan keskuses.

Bolivii om unitarine konstitucine prezidentine tazovaldkund. Jäl'gmäine Konstitucijan udištamine oli vl. 2009.

Valdkundan pämez' om prezident (rahvaz valičeb händast 5 vodeks, ühteks strokuks), hän-žo om ohjastusen pämeheks. Prezident paneb ministrid radsijaha.

Parlament om kaks'kodine Äirahvahaline Nacionaline Suim (isp. Asamblea Legislativa Plurinacional). Üläkodi, Senat (isp. Cámara de Senadores), kogoneb 36 ühtnijoišpäi (4 ristitud kaikuččes departamentaspäi). Alakodi, Ezitajiden (Deputatoiden) Kodi (isp. Cámara de Diputados) mülüb 130 ezitajad-ühtnijad.

Käskuzkundaline tobmuz om Bolivijan Ülembaine käskuzkund (isp. Corte Suprema de Justicia de Bolivia). Se koumiš tobmuden sarakoišpäi üks'jäine sijadase oficialižes pälidnas, Sukres.

Administrativiž-territorialine jagand

   Kacu kirjutuz: Bolivijan administrativiž-territorialine jagand.

Bolivii alajagase 9 departamentha (isp. departamento), kudambad alajagase provincijoihe (niid om 112) (isp. provincia), a ned — kantonoihe (isp. cantón).

Eläjad

Bolivijan kaikiš surembad lidnad (enamba 200 tuh. rist. vn 2012 rahvahanlugemižen mödhe, surembaspäi penembha): Santa Krus de la Sjerr, El' Al'to, La Pas, Kočabamb, Oruro, Sukre, Tarih.

Ižanduz

Bolivijan päeksport om londuseline gaz, kivivoi, soi, cinkkivend da tin.

Irdkosketused

• Bolivijan prezidentan oficialine sait. (isp.)
• Bolivijan parlamentan alakodin sait. (isp.)
• Bolivijan Nacionaline statistikan institut. (isp.)