Gotland

Lec’hiadur Gotland e Sveden

Gotland zo un enezenn eus ar Mor Baltel, er reter da aod Sveden. An enezenn vrasañ eus ar Mor Baltel eo, dezhi ur gorread a 2 994 km². Ur gontelezh hag ur broviñs istorel eus Sveden eo ivez.

Visby eo ar gêr vrasañ war an enezenn, ur gêr gozh anezhi, savet en Xvet kantved, da vare Kevre an Hansa. Lakaet eo bet war roll glad ar bed gant an Unesco.

Gant un nebeud enezennoù bihan (Fårö, Stora Karlsö, Lilla Karlsö ha Gotska Sandön) ez a d’ober kontelezh Gotland. Distank a-walc’h eo an annezidi (58 000 a annezidi, stankter ar boblañs dindan 20 den dre gilometr karrez). Bevañ a reont diwar sevel loened, pesketa ha gounit koadoù, ha pouezus eo an touristerezh ivez.

Evel inizi all er Mor Baltel (Öland e Sveden, Saaremaa ha Hiiumaa en Estonia) ez eo Gotland ur bladenn uhelik a-us ar mor ha tevennoù serzh zo a-hed an aod.

En enez Gotland e veze kaozeet gwechall henc'hutneg, ur yezh skandinavek aet da get bremañ.