愛迪生
愛迪生，全名湯馬士‧歐華‧愛迪生（Thomas Alva Edison，1847年2月11號—1931年10月18號）係美國嘅發明家；佢嘅發明不計其數，而其中一個偉大嘅發明，就係電燈膽。
出世及少年時代[編輯]
愛迪生喺美國俄亥俄州（Ohio）米蘭鎮出世；老豆係森姆．奧丹．愛迪生（Samuel Ogden Edison，1804–1896），之前喺加拿大搞飲食開飯店，後來因為加入革命軍而俾人通輯，於是走去美國米蘭鎮，轉搞木材生意；至於愛迪生嘅媽媽蘭茜．瑪菲斯．伊利沃（Nancy Matthews Elliott，1810–1871）喺加拿大做過小學教師，後來嫁咗之後就冇再教書，做個全職嘅住家婦人。而愛迪生就係佢哋嘅第七個仔。
每事問嘅愛迪生[編輯]
愛迪生細個時候啲人會叫佢做艾爾；佢個頭望落都幾大，而且成日都有好多問題去問啲大人，好似佢會問：「點解蘋果有紅色有綠色？」、「點解一加一會係二？」、「咁兩嚿泥加埋即係幾多？」、「點解蜜蜂嘅屋企同我屋企唔一樣？」、「點解人天生冇翼唔識飛？」……等一大堆好難答嘅問題，搞到啲大人好多時都口啞啞唔識答佢；當佢知道家禽要保溫嚟孵蛋，竟然三更半夜一個人走入穀倉，坐喺堆禾草上面孵蛋，於是除咗佢父母之外，其他人都覺得佢個頭腦有問題。
佢覺得火呢樣嘢好神奇，於是有一次向老豆間木廠嘅工友問長問短，不過得唔到答案，於是自己暱埋喺貨倉嘅一角點火，想研究一吓火係點樣燃燒，點知一發不可收拾，差啲燒晒成個貨倉。
後來佢同屋企人喺1854年搬咗屋去密茲根州（Michigan）嘅波特蘭居住；第一次返學，佢就一直問嘢，問到個神父班主任發晒脾氣，卒之三個月後頂唔順向愛迪生嘅父母提出唔再教佢；好彩媽咪蘭茜曾經教過書，於是好嬲咁同學校講話要退學，決定自己做老師，教個仔學知識同埋畀佢自修。
阿媽嘅啟發[編輯]
愛迪生學嘢好快，而且乜都想知想學，先後讀過《英國史》同埋《世界史》，又睇過好多唔同類型嘅文學作品；蘭茜見愛迪生進度咁快，認為佢會對科學有興趣，於是送咗本由R.G.柏加（R.G.Parker）寫嘅書《自然科學的學校》（School of natural philosophy）畀佢睇，點知愛迪生睇過之後就迷咗落去，而蘭茜亦已經一早預備咗屋企嘅地下室一角畀佢學做實驗。
發明嘅第一步～實驗[編輯]
到咗大約十歲，愛迪生基本上已經試過晒所有喺【自然科學的學校】裏面所講嘅實驗，佢亦有將呢啲實驗嘅結果組合，搞咗好多新嘅實驗，不過用貓貓狗狗嚟玩嘅居多，好似喺啲貓狗嘅身上面摩擦，比較吓產生嘅靜電量有幾多……等等，搞到啲貓狗見到佢都怕怕；佢重將全部冇毒嘅物料樽都貼晒毒藥標籤，搞到佢父母落到地牢嘅時候都唔敢走埋去掂呢啲樽。而自從有咗小型「實驗室」之後，愛迪生就好少出去同啲朋友仔玩，但係一有機會佢就會出去整蠱佢啲朋友；佢嘅挑皮同埋愛玩嘢嘅性格，完全係受咗佢老豆嘅樂觀開朗所影響。
有一次，愛迪生做緊升氣球實驗嘅時候，佢見到嚟自荷蘭大佢一歲嘅朋友仔阿麥想捉雀仔捉唔到，於是拿拿林返去調製咗杯可以產生氣體嘅「氣化劑」畀阿麥飲，呢劑嘢係用炭酸鈉再混合幾種藥物而成，以為體內產生氣體就可以減輕重量，點知阿麥飛唔起之餘重勁肚痛，愛迪生終於第一次俾佢阿媽狠狠咁打咗一餐。
做蔬果生意[編輯]
愛迪生十一歲嘅時候，佢意識到做實驗要有一定嘅資金，於是搵埋阿麥一齊種菜出市集賣賺錢，啲人見到兩個賣菜小朋友好可愛，於是都樂於幫襯，令到生意出奇咁好；遇到有人想要一啲特別嘅蔬果而佢哋冇嘅時候，愛迪生重識得去搵低價嘅小販買入，再加返少少價嚟賣出，可以話細細個已經有商業嘅頭腦。不過後來因為放太多時間喺種菜同販賣上面，搞到冇乜時間去做實驗，於是佢唯有放棄種菜，返返去佢嘅實驗小天地。
賣報紙嘅日子[編輯]
喺1859年到1862年呢段其間，愛迪生喺連接侯倫港（Port Huron）到底特律（Detroit）嘅火車上面賣報紙同埋小食雜貨，而當時嘅列車行駛時間係由朝頭早七點到朝早十點；因為愛迪生每次一到底特律就即刻會入去公共圖書館睇書，於是後來啲人傳聞話呢間公共圖書館裏面嘅書幾乎都俾愛迪生睇過晒。
喺愛迪生十三歲嗰年，佢獲批准喺火車嘅車廂裏面設置實驗室，於是佢可以一邊做實驗一邊賺錢，成為咗佢當時最夢寐以求嘅工作。之但係冇幾耐之後，有一日佢喺站上面賣報紙嘅時候趕唔切上返火車，於是即刻搏命咁追，佢用一隻手攬住叠報紙，一隻手拉住車邊嘅欄杆企圖擒上返車，當時介紹佢做呢份工嘅車長喺火車上面見到佢咁危險，於是人急手快即刻用對手就揪住愛迪生對耳借力，終於救咗佢返上車；因為呢一下揪耳仔救命嘅行動，愛迪生嘅聽覺自此以後變得非常之差，正如佢嘅記述咁講：「對耳仔一拉起嗰時剩係聽到轟一聲，跟住聽乜都唔再清楚……」、「…十三歲之後都冇再聽過雀仔嘅叫聲…」。
1861年，美國因為解放奴隸問題而引發嘅南北戰爭爆發，愛迪生要咗比平時數量多幾倍嘅報紙上火車，重加價嚟賣，居然俾佢賺到一大筆錢；佢見辦報紙原來都幾好搵，於是決定用呢筆資金自己做編輯出報紙，命名為【新聞一週】（News Weekly），主要刊登一啲交通工具嘅價錢、火車嘅班次時間同埋失物待領……之類嘅消息，後來慢慢加入咗好多關於其他人嘅私隱同壞話，終於招嚟某啲人嘅不滿而搵佢麻煩，唯有打消做報業大王嘅念頭，重投實驗嘅懷抱。
不過有一次，愛迪生喺流動實驗室裏面用黃燐做實驗嗰陣，因為架列車搖得太犀利，樽易燃嘅黃燐一滑手就跌咗落地，重引發咗一場火災，呢一吓嚇親啲乘客之餘亦驚動到火車當局，於是落命令唔准佢再喺火車度做實驗，不過就照舊畀佢喺車度賣報紙。
青年時代[編輯]
年輕電報員嘅誕生[編輯]
自從喺1838年電報機實用化之後，電報員成為咗好多年青人嘅夢想職業；愛迪生都唔例外，佢為咗想成為一個電報員，喺十一二歲嘅時候利用賣菜賺返嚟嘅錢買咗部標準嘅摩斯電報機，閒來就同阿麥一齊實習收發電報。雖然佢喺十三歲嗰年因為一次意外令到聽覺變壞，但好彩嘅係，電報嘅發報聲佢居然重可以聽得清清楚楚，於是佢重新燃起做電報員嘅鬥志。
喺1863年嘅夏天，十五歲嘅愛迪生喺密蘇里州（Missouri）一個火車站上面等火車埋站，忽然俾佢見到一個細路仔喺火車軌上面玩，重有架列車就快撞埋去，於是佢即刻奮不顧身咁衝出去救返個細路；原來呢個細路仔係曼特．基利文斯車站（Station Mount Clemens）嘅站長麥肯治（J.U.Mackenzie）個三歲嘅仔占美．麥肯治（Jimmie Mackenzie），麥肯治極之感激，佢知道愛迪生想成為一個電報員，為咗報答佢對個仔嘅捨身相救，於是答應收佢做契仔教佢電信嘅各種技術；麥肯治站長邀請愛迪生返佢屋企住，期間剩係需要愛迪生畀伙食費，半年之後愛迪生已經達到電報二級技士嘅資格，而當時二級技士嘅要求係要喺一分鐘之內收發30至51個字母。
1864年，愛迪生正式受僱成為一個集團嘅電報技術員，得閒嘅時候就繼續睇關於科學嘅書同埋做實驗。有一次因為連接美國同加拿大嘅河底電纜斷裂，愛迪生靈機一觸用火車頭嘅汽笛發摩斯訊號畀河嘅加拿大對岸，而對面嘅發報員真係收到訊息，於是愛迪生一夜成名。
獨闖加拿大[編輯]
喺1864年五月，愛迪生隻身去到加拿大搵發展，佢喺加拿大安大略省（Ontario）嘅史德福特火車站（Station Stratford）搵到份夜間嘅電訊技士，工作時間係夜晚七點到第朝七點，但係佢日頭仍然爭取時間睇書同埋做實驗；火車當局為咗監察車站嘅職員有冇蛇王，就規定車站嘅電報員每晚九點之後要每個鐘發個電訊畀車務中心，但係愛迪生憑住佢嘅小聰明發明咗一部連住時鐘嘅定時發報機，自己就爭取時間瞓覺，所以中心方面一度認為佢係最勤力可靠嘅職員，不過因為有次車務中心嘅突擊檢查之中發現愛迪生冇回覆，於是總務由車務中心騎快馬去到史德福特車站，見到愛迪生居然喺度瞓覺，但個電報機就仍然嘟嘟響喺度發訊號，質問之下愛迪生唯有認錯，雖然總務好欣賞愛迪生嘅呢件小作品，但係車站始終係要一個職員而唔係機器，所以叫愛迪生即刻拆走部機，於是愛迪生嘅第一件發明品宣告玩完。五日之後，愛迪生收到電報話車站有列火車要入，通知喺嗰度嘅另外一段貨卡開走，點知愛迪生發訊號畀站頭時候冇回應，衝到去嘅時候兩架火車已經撞埋咗；呢次意外令到愛迪生被叫到多倫多（Toronto）總公司問話，因為佢有偷懶嘅前科，於是問責嘅矛頭就直指愛迪生，除咗即時炒佢魷魚之外，重考慮起訴佢失職，佢驚起坐監上嚟，當晚就即刻執嘢走佬返美國。
流離浪蕩嘅日子[編輯]
愛迪生出走加拿大返到美國之後嘅幾年，先後做過好多間電信公司，並且冇固定屋企，四處流離浪蕩。
喺呢段期間，佢識到人生裏面一個重要嘅朋友－－米爾頓．阿當（Milton Adam）；阿當係一間電信公司嘅發報員，1865年愛迪生去呢間公司申請電報員工作，就係由佢嚟做考核，之後就非常欣賞愛迪生，最後更成為咗好朋友。同年嘅4月14日，成功解放奴隸制度嘅美國總統林肯（Abraham Lincoln）喺華盛頓福特劇院俾人暗殺，愛迪生因為遲咗收發呢單新聞嘅電報而俾人鬧到狗血淋頭，愛迪生引咎辭職，咁啱阿當亦都想另謀發展，於是同愛迪生一齊唔撈，暫時分開各自再去尋找新天地。
不斷嘅見工同辭職，加上做電報員剩係收收發發冇乜挑戰，於是愛迪生開始厭倦想搵另外一啲工作；1867年，佢諗住遠赴巴西去搵出路，但最後因為唔想離開太遠，於是中途返返轉頭。到到1868年，廿一歲嘅愛迪生喺波士頓一間圖書館睇書時撞返阿當，於是阿當邀請佢一齊住分擔宿舍費用；期間愛迪生日頭喺電信局做嘢，空閒或者夜晚時份就好似以前一樣用嚟做實驗，終於喺同年10月28日，佢得到發明品嘅第一件專利權－－電氣投票紀錄機，不過因為一班議會議員覺得用機器點票始終太過兒戲，會忽略少數人嘅意見，所以最終冇俾議會採用，成為咗愛迪生第一件、但係唔實用嘅專利發明。不過愛迪生冇放棄繼續研究，只係認為既然要發展就要去大城市，可惜資金唔夠，於是阿當自願傾盡身家畀愛迪生做水腳去紐約發展。
發明家嘅誕生[編輯]
踏上發明之路[編輯]
愛迪生嘅第一件專利產品雖然唔實用，但係喺1869年嘅一月，電信新聞就刊登咗「愛迪生成為發明家」嘅消息。
愛迪生離開咗波士頓去咗紐約，不過初初去到搵唔到佢嘅朋友，於是喺街度流浪咗幾日，最後俾佢搵到一個電氣廠嘅地下室做暫時棲身嘅地方。三日之後嘅一晚，愛迪生瞓瞓吓聽到上面工廠突然發出好大嘅燥音，於是八卦上去睇吓，原來係有部大型機器壞咗，佢見到成班人流晒汗咁喺度整緊就自動請纓幫手，憑住佢對機器嘅知識，佢好快就發現原來有一條彈弓跌咗落堆齒輪中間卡住；廠長同意愛迪生係有啲料子，於是提出畀月薪300元美金請佢做技師，佢嘅生活得到改善之餘，重認識咗同樣係技師嘅另一個重要朋友－－富蘭克林．利安納特．波布（Franklin Leonard Pope），而據聞呢份工都係由波布大力推舉先成事。冇幾耐之後，喺1869年9月24日紐約發生金價大暴漲，佢哋做嘅呢間公司因為支持唔住而俾財團收購，於是兩個人決定自己創業。
開合資公司同埋工廠[編輯]
愛迪生同波布搵多個合伙人一齊開咗間電器公司，專門處理關於電器嘅問題，而且生意唔錯，一路都有好多人嚟搵佢哋做顧問，而愛迪生一邊照顧客戶自己亦一邊進行研究，繼續為佢嘅發明申請專利，而佢喺呢段時期嘅發明多數係用喺商業之上，例如黃金報價機、股市行情機等。
有一次，愛迪生幫一間工廠修理一部大型機器，點知佢拆晒成部機再重新安裝之後，竟然令到生產率提高三倍以上，個工廠嘅老細喜出望外，於是要求愛迪生將呢部機嘅修理同埋構造專利賣畀佢，愛迪生諗住開價三千美金，點知個老細一口價就話畀四萬美金，愛迪生諗都冇諗過收咁多錢，搞到去銀行兌支票攞現金嘅時候，將啲十蚊廿蚊嘅美金紙塞到成個人爆晒。因為呢一大筆資金，喺1871年愛迪生廿三歲嘅時候，佢再融資入去間合資公司，開設咗第一間最初只係請咗18個員工嘅工廠，而喺同年，工廠嘅第一件製成品「電報印刷機」正式面世，呢部係可以將電報打印成文字嘅機器。憑住愛迪生不斷推出發明品，令到工廠越嚟越強大。而佢不斷發明同研究，淨係喺1872年就已經得到37件嘅專利，到咗1873年再加多35件，令到當時佢手上嘅專利權已經有成一百二十幾個。
阿媽嘅死[編輯]
喺愛迪生同人合資開工廠嘅期間（1871年嘅某一日），佢老豆傳嚟電報話佢阿媽－－蘭茜．愛迪生因為急病唔掂，點知趕到返去密茲根嘅時候，佢阿媽已經等唔到見佢個仔最後一眼就死咗；佢好傷心。據聞話，愛迪生一見到已經唔再郁唔再同佢講嘢嘅阿媽嘅時候，伏咗喺阿媽屍體嘅床邊喊咗足足一晚都無停。
後來佢回憶話：「如果當初冇媽媽一路悉心嘅教導，就唔會有今日嘅愛迪生；每當我諗起呢一點，我就盡辦法唔好令佢失望。」
第一任老婆[編輯]
1871年冬天嘅某一日，有人向愛迪生提親，於是愛迪生去到瑪莉．史特威爾（Mary Stilwell）嘅屋企作第一次見面（相親），兩個人一直唔出聲，瑪莉嘅家長就好擔心，忽然愛迪生話大家都冇問題，可以即刻結婚，原來佢哋一直用湯馬士密碼溝通；終於喺同年嘅聖誕節當日（1871年12月25日），愛迪生同當時只有十六歲嘅瑪莉成為咗夫婦，後來生咗三個仔女，其中兩個嘅名重加入咗密碼用嘅「點」同「橫」；佢哋分別係：
- 瑪莉安．托特（點）．艾斯泰莉．愛迪生（Marion Dot Estelle Edison，1873–1965）
- 湯馬士．戴殊（橫）．艾爾巴．小愛迪生（Thomas Dash Alva Edison, Jr，1876–1935）
- 威廉．賴斯利．愛迪生（William Leslie Edison，1878–1937）
不過愛迪生因為十分投入發明同埋研究，所以好多時都唔可以陪伴啲屋企人，令到瑪莉經常抑鬱。瑪莉．愛迪生夫人喺1884年8月9日與世長辭，當時愛迪生三十七歲。
發明嘅路[編輯]
第一間研究所[編輯]
1876年，愛迪生喺新澤西州（New Jersey）嘅文盧柏加（Menlo Park）開設文盧柏加研究所（Menlo Park Laboratory）；佢當呢度係佢屋企一樣，經常埋頭喺研究所做實驗搞發明，亦都因為咁，當時好多嘅發明品或者改良品都係喺呢度出品。
電話發明爭奪戰[編輯]
研究所開始冇幾耐之後，有人發表「識講嘢嘅電報機」，即係電話嘅雛型；有一間電信公司邀請愛迪生加入電話發明嘅行列，後來佢同另一個電氣發明家亞歷山大．格拉咸．貝爾（Alexander Graham Bell）差唔多同一時間發表用電磁振動原理嘅電話，不過喺競爭之下，最後俾貝爾攞咗電話嘅發明權（後來再決定真正嘅電話發明者其實早有一人）。但係睇返當時愛迪生所設計嘅炭粒振動傳送裝置其實係比貝爾所設計嘅線圈振動傳送裝置更有見地，因為愛迪生嘅呢個發明，正正同後來我哋所用電話嘅傳送構造原理一模一樣。
留聲機[編輯]
愛迪生唔介意失去咗電話嘅發明專利權，佢即刻着手搞下一個項目：「可以紀錄電話聲音喺紙帶上面嘅機器」。因為佢自己嘅耳仔有嚴重嘅聽覺問題，佢知道點樣可以令到細微嘅聲音得到最大嘅傳播，於是佢嘗試將好細小嘅針加入電話入面嘅振動板，希望將好細嘅聲音都紀錄得到，點知靈機一觸，俾佢諗到另一個設計。
＜留聲機藍圖＞ 及 ＜聽留聲機講嘢嘅人＞
1877年八月嘅某一日，佢將一幅草圖交畀助手去進行初模生產，而係1877年12月6日，愛迪生喺報紙上發表留聲唱機嘅誕生。佢嘅原理主要喺紀錄嘅唱片部份，用法係一邊搞動搖杆，一邊向住收音口發聲，等振動板振動支針喺錫、鉑等嘅物料上面刻上聲音，然後再轉動支針去讀返啲刻紋，就可以聽返先前錄低嘅嘢，而第一隻俾留聲機錄低嘅就係耳熟能詳嘅經典兒歌：《瑪莉有隻小綿羊》（Mary had a little lamb）。當呢一個發明誕生之後，愛迪生就被譽為係「文盧柏加嘅魔術師」；當時愛迪生廿九歲。
電燈[編輯]
自從喺1801年，一個叫大衛嘅英國科學家發現用電流通過白金嚟發光嘅現象之後，於是就有好多人開始研究電燈，但一直成效唔大。
1879年，愛迪生亦都着手參與電燈嘅發明，重承諾用六個禮拜時間去完成呢個「黑暗中嘅太陽」；當時普遍嘅人都只係用煤氣燈、手提油燈或者孤光燈嚟照明。
愛迪生將處理過嘅細絲連喺玻璃球入面嘅兩極線之上，再進行抽真空，但係通電之後所發光嘅效果維持唔到好耐，條細絲會因為加電壓或者抵受唔住高溫而燒斷；之後佢用咗過千種嘅材料加工嚟做燈膽入面燃燒嘅細絲，就連頭髮鬍鬚都用過，期間都諗過用白金嚟做材料，但因為考慮到成本問題，佢明白如果太貴嘅話根本唔會普及，只會淪為實驗嘅玩具，於是實驗一路都冇乜進展，瀕臨放棄邊緣……。喺佢對外公佈限期前嘅冇幾耐，愛迪生喺沉思之中忽然俾佢見到之前用剩嘅綿線材料，於是靈機一觸，將炭混入去綿線度，再經焗處理做成炭絲，作為發熱發光嘅燈絲。
1879年10月21日，當期時已經有新聞記者喺研究所門外守住等消息，而愛迪生亦信心十足咁招開咗即時嘅小型記者招待會。一大班人圍喺實驗室入面議論紛紛，愛迪生叫咗一聲通電之後，用加工綿線做炭絲嘅電燈膽足足長照咗四十個鐘頭，燈光重比起一貫用開嘅所有照明工具猛烈好多倍；呢個時候開始，電燈就正式取代咗孤光燈，成為日常嘅照明工具。
不過愛迪生仍然唔滿足，於是繼續搵材料嚟研究點樣改善延長燈絲嘅燃燒時間，最後俾佢發現，用竹片混合煤炭粒同瀝青加工嚟做燈絲；1880年，愛迪生終於發表可以維持一千兩百幾個鐘頭嘅電燈膽，比起用綿線加工嘅燈膽價錢更平，而且更耐用。佢為咗可以同時間可以用上好多好多個燈膽，愛迪生重着手研究發電機、插頭、開關系統同埋灰士（保險絲）嘅發明。1881年，愛迪生舉行亮燈大會，將好多組嘅燈膽一齊開着，呢單新聞即時轟動全世界，同年重喺巴黎博覽會上面得到第一個國際獎項。當時愛迪生三十四歲。
第二任老婆[編輯]
喺第一任老婆瑪莉．愛迪生死後兩年，即係1886年嘅2月24日，三十九歲嘅愛迪生再同另一個當年得十九歲嘅女仔緬娜．米勒（Mina Miller）結婚，同樣地亦都生咗三個仔女，分別係：
- 瑪特連妮．愛迪生（Madeleine Edison，1888–1979）
- 查理斯．愛迪生（Charles Edison，1890–1969）
- 迪奧多．愛迪生（Theodore Edison，1898–1992）
緬娜．愛迪生夫人喺1947年8月24日離世。至於第二仔查理斯．愛迪生喺愛迪生死後承繼咗愛迪生嘅公司，亦曾經成為新澤西州嘅參議員。
更多嘅發明同研究[編輯]
1880年，愛迪生首次喺美國製造電氣火車頭。1881年，愛迪生搬到去紐約繼續研究，重喺屋企嘅樓上開設學校嚟教電氣技術。而喺1882年，愛迪生喺紐約開設咗第一個發電站。重有新嘅無線電機、研究改良相片嘅技術……等等。
喺1883年，佢喺西奧連治（West Orange）開設臨時研究所，到咗1884年就將文盧柏加研究所關閉，一直到1887年將西奧連治研究所大肆擴建，呢個時候先算係正式成立，並保留到而家。
1889年，四十二歲嘅愛迪生發明咗「會郁嘅相片」－－冇聲嘅放映機。1891年發明「愛迪生選礦法」，着手經營鐵礦，但係做咗八年終於失敗。跟住又着手搞水泥工業。1909年發明咗第一嚿鹼性電池，而據聞呢個項目嘅實驗足足做咗五萬次以上。到到1910年就發明咗圓盤唱片，跟住喺1912年，佢將唱機同冇聲影畫結合，變成有聲有畫嘅有聲放映機（即係今日嘅電影），再次震動全世界。
晚年[編輯]
跟住嘅愛迪生仍然繼續研究同發明，包括喺雜草裏面提煉橡膠嘅技術……等。
1929年，全世界為燈膽發明舉行盛大嘅白光燈膽發明五十週年紀念大會；而喺美國，除咗當時嘅總統靴拔．胡佛（Herbert Hoover）出席咗呢個超過五百人嘅盛典之外，就連首位獲得諾貝爾獎嘅女性得主居禮夫人（Maria Skłodowska-Curie）都有嚟道賀燈膽嘅發明家愛迪生。呢個盛會入面，愛迪生喺致辭嘅時候因為有少少唔舒服，忽然頂唔順半跌半坐咁坐返落張櫈度。
兩年之後，即係1931年10月18日，湯馬士．艾爾巴．愛迪生喺美國新澤西州西奧連治嘅屋企安祥咁與世長辭，享年八十四歲。當晚，全美國嘅家家戶戶都熄晒啲唔需要用嘅燈嚟悼念呢個偉大嘅發明家，而自由神像嘅火炬亦都喺呢一晚暫時熄滅。
計返愛迪生一生裏面所發明同埋經佢改良嘅物品總數加埋多達二千幾件，終於被世人公認為一代嘅「發明之王」，而佢留底嘅成功秘訣就係：「百份之一嘅靈感，百份之九十九嘅努力！」。
生平小插曲[編輯]
愛迪生被世人譽為偉大嘅「發明之王」，佢嘅一生對人類貢獻良多，但係佢為人風趣幽默，所以喺其中嘅過程入面都發生唔少得意嘅小事同埋精警嘅語錄，喺呢度就分享幾則佢嘅人生小插曲。
「舊大褸」[編輯]
愛迪生由加拿大走佬返咗美國嘅頭嗰段時間，喺紐約做緊散工電報員同埋散工電氣技師；有一次佢喺街度撞見個朋友，朋友見佢件大褸舊舊地，就話佢：「你件褸咁寒酸好心就買過件新啲啦！」，愛迪生就答：「有乜所謂？呢度都冇人識我。」
到咗佢成為發明家之後，有一日又遇見呢個朋友，朋友重見佢着緊當日件舊大褸，就問佢：「你而家都出咗名啦，重着住呢件咁舊嘅大褸？」，愛迪生又答：「有乜所謂？呢度人人都識我。」
「可以閂制嘅機」[編輯]
發明咗留聲機冇幾耐，有一次喺一個場合度，一個高調嘅女人走埋嚟想擦愛迪生鞋，就問愛迪生：「我親愛嘅愛迪生先生，乜你真係第一個發明識講嘢機器嘅人咩？」
愛迪生笑笑口望望週圍等緊佢答嘅人，就話：「第一件會講嘢嘅器材，係上帝喺伊甸園用阿當嘅肋骨整成嘅（即夏娃），但係我所發明嘅就可以令佢閂制。」
「冇嘢撈」[編輯]
自從投入實驗以嚟，愛迪生基本上每日只係瞓得四個零鐘，而做嘢嘅時間就差唔多佔佢十八個鐘頭，不過佢樂在其中，所以成日同人講自己冇嘢撈，佢話：「我咁大個仔都未撈過世界，成日暱喺實驗室度玩，都唔知幾咁過癮！」
「唔聽好過」[編輯]
愛迪生因為細個嘅意外令到佢聽覺有嚴重問題；有次佢喺一次晚宴入面見到又聾又盲嘅海倫．凱勒（Helen Adams Keller），就同佢表示：「聽唔到嘢都好嘅，起碼唔會有咁多噪音，諗嘢都清晰啲集中啲。」
海倫．凱勒就回應：「如果我好似你咁係一個咁叻嘅發明家，我就會發明幫聾人聽到嘢嘅儀器。」
愛迪生：「乜你咁認為咩？我就唔會搞呢啲咁無聊嘅發明，因為人類講嘅嘢好多都無無謂謂，聽又得，不過唔聽好過。」
「上帝也分神」[編輯]
費城起咗一坐新教堂，成班牧師就為咗使唔使加支避雷針喺度開會爭論，因為有啲認為上帝係會眷顧呢間教堂唔會俾雷劈，最後佢哋就派咗個代表去請教愛迪生，問吓個可行性。
愛迪生聽到之後就微笑咁話：「梗係要裝，上帝都會有神不守舍嘅時候嘅。」
「時間、時間」[編輯]
話說當愛迪生做緊電燈膽實驗嘅時候，佢將一個未上電線底座同燈絲嘅空心玻璃罩交畀佢助手，叫佢量吓呢個玻璃罩嘅容量，跟住又繼續整自己嘢；
過咗一段時間，愛迪生擰轉頭重見佢助手用軟尺量緊個罩嘅周長、直徑嘅嘢，係咁喺張檯度計算式，於是慨嘆咁話：「時間、時間，點解咁簡單嘅嘢要搞咁耐？」，跟住走埋去將個空心玻璃罩嘅開口放喺水喉下面灌水，滿咗水就同個助手講：「將呢啲水倒入個量杯度然後講個容量畀我知！」，話咁快轉個頭，助手即刻就畀咗個容量數字佢。
佢一邊繼續實驗，一邊同個助手講：「你睇！咁簡單，最少嘅時間就搵到最準確嘅答案，點解你諗唔到呢？」，個助手即刻面都紅晒。
跟住佢就自言自語咁話：「人生實在太短暫，太短暫啦！但係要做嘅嘢就實在太多，唔識得慳時間點做得晒…」
資料來源[編輯]
- 內文嘅絕大部份資料來源同埋部份插圖係參考自台灣發行嘅書刊：【世界歷史偉人叢書系列 - 偉大發明家：愛迪生】，喺民國六十九年（1980年）經過台灣國立編譯館審批，由林白出版社出版。
- 再加上眾多零碎嘅資料互相印証、補充及整合，當中包括英語維基下嘅相關條目。
- 少量補充自科學名人堂 - 愛迪生
 |
維基同享有多媒體嘅嘢： |
