كوريا الشماليه
Coordinates: 40°00′N 127°00′E / 40.000°N 127.000°E
كوريا الشماليه ، الاسم الرسمى جمهورية كوريا الديموقراطيه الشعبيه هى بلد فى النص الشمالى من شبه الجزيره الكوريه فى شمال شرق اسيا بين بحر اليابان و النهر الاصفر.يحيط بها من الشمال روسيا (19 كم م الحدود المشتركه) و الصين (1416 كم) و من الجنوب كوريا الجنوبيه (238 كم).الحدود بينها و بين كوريا الجنوبيه المفترض ان تكون منزوعة السلاح لكن فى الحقيقه المنطقه عسكرية بشكل حاد قوى لدرجة ان عدد العساكر على الجانبين يتقدر باكثر من مليون.اليابان من جيرانهايفصلهم عن بعض بحر اليابان.عاصمة كوريا الشماليه بيونجيانج تعتبر مركز صناعى و اقتصادى مهم و مكانها على الساحل الغربى لشبه الجزيره.
حزب العمال الكورى يحكمها من سنة 1948 لوحده و كيم جونج ايل هو سيكيرتير عام الحزب و القائد الاعلى لكوريا الشماليه.
التاريخ[تعديل]
بعد تحرير كوريا من الاحتلال اليابانى مع نهاية الحرب العالميه التانيه، اتقسمت شبه الجزيره الكوريه بقرار من الامم المتحده لبلدين بيفصل بينهم خط العرض ال 38 و سيطر الاتحاد السوفييتى على النص الشمالى (حوالى 55% من مساحة شبه الجزيره)و سيطرت امريكا على النص الجنوبى.ابتدا التاريخ الحديث لكوريا الشماليه باعلانها كجمهورية شعبيه سنة 1948.
السياسه[تعديل]
كوريا الشماليه هى جمهوريه اشتراكيه بحسب الدستور بتاعها بس بيعتبرها محللين سياسيين كتار (غربيين)انها ديكتاتوريه مطلقه على الطريقه الستالينيه.كل مفاصل و اجهزة الدوله ماشيا بنظام الحزب الواحد و الحزب المسيطر على كل حاجه هو الحزب العمال الكورى الشيوعى و اللى دوره قى قيادة البلد متأصل بنص الدستور.فى كمان جزبين صغيرين تانيين فى كوريا الشماليه و الاحزاب التلاته دول منضمين سوا تحت جبهه واحده اسمها الجبهه القوميه لاعادة توحيد ارض الاباء. البرلمان هو اعلى اجهزة الدوله و بينتخبو اعضاءه مره كل خمس سنين، بينعقد البرلمان مره واحده او مرتين فى السنه و فى غير اوقات انعقاده بيقود البلد الرئيس بتاع البرلمان. من الاجهزه المهمه التانيه فى البلد اللجنه القوميه للدفاع و دى مسئوله عن السياسات الخارجيه و كمان عن القوات المسلحه. من ساعة اما مات كيم ايل سونج سنة 1994 و منصب رئيس الدوله فاضى لانهم ادوله لقب الرئيس الابدى بتاع كوريا الشماليه.
القوات المسلحه و الامن[تعديل]
من اول سنة 1966 ابتدت كوريا الشماليه فى التركيز على الجيش و انه يكون دايما فى حالة استعداد و عشان كده غيرو الخطط بتاعة الاقتصاد و وجهوها اكتر ناحية تطوير القوات المسلحه بتاعتهم اللى بتعتبر واحده من اكبر الجيوش على مستوى العالم كله.القوات المسلحه متقسمه تلات فروع : الجيش و القوات الجويه و القوات البحريه.التجنيد الاجبارى فرض على كل الرجاله فى كوريا الشماليه و على نسبه معينه كمان من الستات و مدة الخدمه الرسميه ما بين تلات و اربع سنين بس فى الحقيقيه بتكون اطول من كده بكتير.فى كمان عدد كبير من قوات الاحتياط و القوات الباراعسكريه (زى البوليس).جهاز الامن الداخلى كبير و معقد و وظيفته مراقبة و التحكم فى تحركات الناس و نشاطاتهم الاجتماعيه و حتى جوا بيوتهم.وزارة الامن العام مهمتها السيطره على الوضع الامنى جوه البلد انما الامور السياسيه و عمليات المخابرات فبتتبع جهه تانيه اسمها جهاز امن الدوله.
التعليم[تعديل]
التعليم من اهم الركائز التى تقوم عليها الايديولوجيات الشيوعيه و له دور مهم فى تأصيل العقيده فى الاجيال الجديده و يعتبر وسيله مهمه لتلبية احتياجات الحكومه من العمال المهره و الفنيين و العلماء فى كل المجالات.جميع الطلاب فى المدارس ملتزمون بالاشتراك فى عملية الانتاج حتى و هم فى سن الدراسه انتاج يتركز على العلوم و التكنولوجيا.سنة 1967 فرض التعليم الالزامى على جميع الاطفال التى تتراوح اعمارهم ما بين السابعه والسادسة عشر و بعدها تغير القانون و اصبح سن التعليم الالزامى مابين خمسة سنين الى سن السادسة عشر.مراحل التعليم تنقسم سنه واحده حضانه و اربع سنين ابتدائى و ست سنين ثانوى.بالنسبه للتعليم العالى فبتترواح مدة المعاهد و الكليات من اول سنتينالى ست سنين و من اهم الجامعات فى كوريا الشماليه جامعة كيم ايل سونج فى بيونجيانج. هناك ايضا مؤسسات كثيرة تهتم بتعليم الكبار وتركز على التعليم الفنى و ملحقه بالمراكز الصناعيه الضخمه.
الزراعه[تعديل]
سنة 1958 اتأممت كل المزارع الخاصه و اندمجت فى حوالى 3000 وحده تعاونيه و كل واحده بيعيش فيها تقريبا 300 عيله و مساحتها حوالى 500 هيكتار.الوحدات التعاونيه بتديرها لجان اداريه و هى دى اللى بتدى الاوامر بنوع و كمية المحصول اللى بيتزرع فى الموسم المعين و و قد ايه اسمده لازم تتضاف للتربه و بتوزع الحصص الانتاجيه على الفلاحين.المحاصيل بتتلم و بتتورد على المخازن الحكوميه اللى بتحتكر عملية التوزيع.فى كمان مزارع نموذجيه بتديرها الدوله و متخصصه للبحث العلمى و التطوير.
النسبه اللى بيساهم بيها الانتاج الزراعى فى الدخل الاقتصادى قلت بنسبه كبيره (حوالى الربع سنة 1994) على الرغم من الصرف الكبير اللى بتصرفه الحكومه على زيادة مساحة الاراضى المزروعه و على مشاريع الرى و الاسمده الكيماويه و الميكنه الزراعيه.الفلاحين بيتدفع لهم رواتب من الحكومه ياما على شكل فلوس او على شكل منتجات تانيه و بتسمحلهم الحكومه انهم يربو فراخ و نحل و يزرعو اشجار فواكه و جناين صغيره لحسابهم.المحاصيل الزياده عن حاجة الحكومه بيتسمحلهم انهم يبيعوها فى الاسواق المحليه اللى بتتعمل بشكل دورى.
من اهم المحاصيل فى كوريا الشماليه الحبوب و خصوصا الرز و الدره و القمح و الشعير.انتاج الحبوب زاد بشكل كبير من اوائل الخمسينات و كوريا هندها اكتفاء ذاتى من الرز بس القمح لسه بتضطر الحكومه انها تستورده.من المنتجات الزراعيه التانيه المهمه البطاطا و فول الصويا و الخضار و الفواكه. التبغ و القطن و الكتان بيدخلو فى الانتاج الصناعى.تربية الحيوانات متركزه فى الاراضى اللى صعب انها تتزرع و الانتاج الحيوانى من بيزيد سنه ورا سنه و خصوصا تربيه الدواجن و منتجاتها.
