Luengas eslavas

Distribución d'as luengas eslavas.

As luengas eslavas son un grupo de luengas indo-europeas que se parlan en Europa Oriental y Centro-Oriental, incluyindo gran part d'os Balcans dica zonas prou meridionals. Como efecto d'a colonización europea tamién se parlan en Siberia, Asia Central y en zonas puntuals d'atros continents.

Fonetica

A K inicial indo-europea evoluciona a s-, estando as luengas eslavas luengas satem, d'esta traza "corazón" se diz sertse, "cien" se diz sto, ecetra.

Clasificación

A clasificación tradicional d'as luengas eslavas estableixe tres grupos: central, meridional y oriental, deseparatos por a discontinuidat important que representa l'aria on se parla o hongaro y o rumán. Manimenos esta clasificación se fació en base a los caracters d'as luengas standard, caracters no siempre presents en totz os dialectos y parlas representatos por ixos standards. Por eixemplo en ciertos aspectos d'as luengas eslavas meridionals se veye una afinidat entre o eslovén y o crovate con o checo d'una man y entre o macedonián y o bulgaro con o ucrainés por l'atra. Tamién o reconoiximiento de luenga por part de ciertos sistemas lingüisticos eslavos puet estar subchecto a interpretacions influitas por nacionalismos de sentitos contrarios, por o que se fa enfasi en diferencias poco importants pa despartir, u lis dan poca importancia pa asimilar. Entre as luengas eslavas abundan as parlas de transición a l'egual que en as luengas neolatinas y as luengas turquicas a causa d'una deseparación recient, unas mugas cambiants y procesos migratorios interiors.

As luengas eslavas reconoixitas son:

• Grupo oriental:
  • Belarruso
  • Ruso
  • Ucrainés

• Grupo occidental
  • Subgrupo checo-eslovaco:
    • Checo
    • Eslovaco
  • Subgrupo lequitico:
    • Caixubo
    • Eslovincio,
    • Polabo
    • Polaco
    • Pomeranés
  • Subgrupo sorabo:
    • Altosorabo
    • Baixosorabo

• Grupo meridional
  • Subgrupo occidental:
    • Esloveno, con a suya variant prou diverchent o Prekmurián.
    • Serbo-Crovate grupo: (que recibe diversas denominacions seguntes o país).
      • idioma serbio,
      • idioma crovate,
      • idioma bosniaco,
      • idioma montenegrín.
  • Subgrupo oriental:
    • Antigo eslavo eclesiastico
    • Bulgaro
    • Eslavo eclesiastico moderno
    • Macedonián

Bells lingüistas especulan que tamién existió un grupo septentrional. O dialecto antigo d'o ruso d'a ciudat Novogorod ye fácil que tienga bellas trazas d'ixe grupo desapareixito.

Vinclos externos

• (en) Luengas eslavas