Olimpiese Somerspele 2008

Spele van die XXIXe Olimpiade

Gehou in	Beijing, Sjina
Deelnemende lande	204
Deelnemende atlete	11 028
Items	302 in 28 sporte
Openingseremonie	8 Augustus 2008
Sluitingseremonie	24 Augustus 2008
Amptelik geopen deur	President Hu Jintao
Atlete-eed	Zhang Yining (tafeltennis)
Beampte-eed	Huang Li Pei
Olimpiese vlam	Li Ning
Vorige Spele	2004: Athene (Griekeland)
Volgende Spele	2012: Londen (VK)

Die Olimpiese Somerspele van die XXIXde Olimpiade is van 8 Augustus tot 24 Augustus 2008 in Beijing, die hoofstad van Sjina, aangebied. Tydens die geleentheid het 11 028 atlete aan 302 items in 28 verskillende sportsoorte deelgeneem.

Die openingseremonie het in die Beijing Nasionale Stadion plaasgevind. Soos gebruiklik het die lande in alfabetiese volgorde die stadion ingestap, maar aangesien die plaaslike taal Mandaryns is, is dié taal se alfabet gebruik om die volgorde te bepaal. Natalie du Toit, swemmer en gouemedaljewenner tydens die 2004 Paralimpiese Spele, het die Suid-Afrikaanse vlag ingedra.

Die 2008 Paralimpiese Spele is van 6 tot 17 September 2008 gehou.

Toekenning[wysig | wysig bron]

Beijing is op 13 Julie 2001 in Moskou deur die IOK verkies as die gasheer vir die 2008 Olimpiese Somerspele. Dié stad is bo die ander kandidate op die kortlys, naamlik Istanbul (Turkye), Osaka (Japan), Parys (Frankryk) en Toronto (Kanada) gekies. Stede soos Bangkok, Havana, Kaïro, Kuala Lumpur en Sevilla was ook voorgestel, maar het nie die kortlys gemaak nie.

Omstredenheid[wysig | wysig bron]

Die Olimpiese swembad met die Nasionale Stadion in die agtergrond.

Die toekenning van die Spele aan Sjina is in sommige kringe omstrede weens die land se ondemokratiese regering en swak menseregterekord. Amnestie Internasionaal het in April 2007 gemeld dat die situasie met die aanloop na die Spele vir terdoodveroordeeldes en buitelandse joernaliste verbeter het, terwyl die onderdrukking van plaaslike joernaliste en politieke aktiviste besig was om toe te neem. Die aantal mense onder huisarres en inhegtenisnames sonder regsproses is volgens Amnestie Internasionaal ook aan die toeneem.^[1]

Uit 'n ondersoek van Play Fair 2008^[2], 'n organisasie van vakbonde en aksiegroepe, blyk dit dat daar ook probleme is met die vervaardiging van goedere soos pette, tasse en penne wat vir die geleentheid gemaak word. Kinderarbeid word op groot skaal in Sjinese fabrieke aangewend en mense word nie die helfte van die minimumloon betaal nie. Die Organisasiekomitee van die Spele het aangekondig dat hierdie bedrywighede ondersoek sal word.^[3]

Van die atlete is besorg dat die lugbesoedeling wat oor die stad hang hulle prestasies nadelig kan beïnvloed. Die Beijing munisipale regering het ingestem om die besoedelingsprobleem aan te spreek en verskeie fabrieke in die omgewing is gesluit.

Seremonies[wysig | wysig bron]

Skouspel tydens die openingseremonie.

Die opening- en afsluitingseremonie is in die nuwe Nasionale Stadion van Beijing gehou, waar byna 100 000 toeskouers geakkommodeer kan word. Die stadion vertoon uiterlik soos 'n voëlnes en word in die volksmond dan ook as sodanig aangedui. Die stadion is deur die argitekfirma Herzog & de Meuron ontwerp.

Die aflos met die Olimpiese fakkel is vanaf Athene, deur die Himalajas, na Beijing geneem. Die fakkel is ook deur 'n groep van 80 spesiaal opgeleide bergklimmers na die spits van Mount Everest gedra. Die voormalig Sjinese gimnas, Li Ning, het die eer gehad om die Olimpiese vlam aan te steek.

Die Olimpiese vlam is op 24 Augustus 2008 uitgedoof tydens die afsluitingseremonie. Guo Jinlong, die burgemeester van Beijing het die Olimpiese vlag aan die burgemeester van Londen, Boris Johnson oorhandig, waar die 2012 Spele aangebied gaan word.

Kalender[wysig | wysig bron]

Die volgende tabel dui die Spele se daaglikse program aan. 'n Blou blokkie beteken dat wedstryde plaasgevind het, maar dat geen medaljes op die spel was nie. 'n Geel blokkie dui aan dat medaljes toegeken is, die getal dui die aantal medaljeparades wat die dag gehou is aan.^[4]

●	Openingseremonie	●	Wedstryde	●	Wedstryde met medaljes	●	Sluitingseremonie

Augustus	06	07	08	09	10	11	12	13	14	15	16	17	18	19	20	21	22	23	24	Tot.
Seremonies			●																●
Atletiek										2	4	6	6	5	3	6	7	7	1	47
Pluimbal										1	2	2								5
Basketbal																		1	1	2
Boks																		5	6	11
Boogskiet					1	1			1	1										4
Gewigoptel				1	2	2	2	2		2	1	1	1	1						15
Gimnastiek							1	1	1	1		4	4	4				1	1	18
Handbal																		1	1	2
Hokkie																	1	1		2
Bofbal																		1		1
Judo				2	2	2	2	2	2	2										14
Kanovaart							2		2								6	6		16
Moderne vyfkamp																1	1			2
Ruitersport							2		1				1	1	1					6
Roei											7	7								14
Skerm				1	1	1	1	2	1	1	1	1								10
Skyfskiet				2	2	2	2	1	2	1	2	1								15
Duik					1	1	1	1				1		1		1		1		8
Sagtebal																1				1
Gesinchroniseerde swem															1			1		2
Taekwondo															2	2	2	2		8
Tafeltennis												1	1				1	1		4
Tennis											2	2								4
Driekamp													1	1						2
Sokker																1		1		2
Vlugbal																1	1	1	1	4
Waterpolo																1			1	2
Fietsry				1	1			2		1	3	1	2	3		2	1	1		18
Stoei							2	2	3		2	2		2	2	3				18
Seil											2	1	2	2	2	2				11
Swem					4	4	4	4	4	4	4	4			1	1				34
Totaal	-	-	-	7	14	13	19	17	17	16	30	34	18	20	11	23	20	31	12	302

Aantal medaljes[wysig | wysig bron]

Hier is die top tien lande wat medaljes tydens die Spele verower het. Vir 'n volledige lys, sien Olimpiese Somerspele 2008 medaljes.

Kaart van medaljes volgens lande:
Goud vertoon lande, wat ten minste een goue medalje gewen het.
Silwer vertoon lande, wat ten minste een silwer medalje gewen het.
Brons vertoon lande, wat ten minste een brons medalje gewen het.
Groen vertoon lande, wat geen medaljes gewen het nie.
Swart vertoon lande, wat nie aan die Olimpiese Somerspele 2008 deelgeneem het nie.
'n geel vierkant vertoon die gasheerstad (Beijing).
Blou sterre vertoon lande, wat hul eerste medalje tydens die Somerspele gewen het.

Plek	Land	Deelnemers	Goud	Silwer	Brons	Totaal
1	Volksrepubliek van Sjina	639	51	21	28	100
2	Verenigde State	596	36	38	36	110
3	Rusland	467	23	21	29	73
4	Verenigde Koninkryk	312	19	13	15	47
5	Duitsland	463	16	10	15	41
6	Australië	433	14	15	17	46
7	Suid-Korea	267	13	10	8	31
8	Japan	351	9	6	11	26
9	Italië	344	8	9	10	27
10	Frankryk	323	7	16	18	41
70	Suid-Afrika	136	0	1	0	1

Hoogtepunte[wysig | wysig bron]

Michael Phelps spog met een van sy goue medaljes tydens die Somerspele.

Michael Phelps van die VSA het agt goue medaljes tydens die Spele ingepalm, 'n wêreldrekord wat hom 'n totaal van 14 goue medaljes oor sy loopbaan besorg, meer as enige ander atleet in die geskiedenis van die Spele.
Die Suid-Afikaanse atleet, Khotso Mokoena verower 'n silwer medalje in die verspring.
Kirsty Coventry van Zimbabwe wen 1 goue (200m rugslag) en 3 silwer medaljes (100m rugslag, 200m wisselslag en 400m wisselslag swem).
Natalie du Toit behaal 'n 16de plek (uit 25 swemmers) met 'n tyd van 2uur 49.9 sekondes in die 10 km swem marathon. Haar tyd is min of meer 'n minuut en 'n half stadiger as die van die wenner, die 19-jarige Rus, Larisa Ilchenko.

Suid-Afrikaanse deelname[wysig | wysig bron]

Suid-Afrika se Hokkiespan net voor die wedstryd teen die Verenigde Koninkryk op 15 Augustus 2008.

Die Suid-Afrikaanse swemmer Natalie du Toit, die wenner van vyf goue medaljes by die 2004 Paralimpiese Spele, het gekwalifiseer om aan die Spele deel te neem. Daarby word sy die eerste geamputeerde atleet wat vir die Olimpiese Spele kwalifiseer sedert Olivér Halassy in 1936.^[5]^[6]

Die Paralimpiese atleet, Oscar Pistorius, is eers deur die Internasionale Atletiekfederasie verbied om aan die Olimpiese Spele deel te neem nadat 'n Duitse universiteit bevind het dat sy bioniese kunsbene hom 'n voordeel bo gewone atlete gee.^[7]. Die verbod is later opgehef^[8], maar hy kon nie vir deelname kwalifiseer nie.

Suid-Afrika kon slegs 'n enkele silwer medalje tydens die Spele inpalm (Khotso Mokoena vir verspring).