18 Идым

18 Идым — григориан кечышот почеш идалыкын 261-ше (кужемдыме ийлаште 262) кечыже. Идалык пытыме марте 104 кече кодеш.

Пайрем-влак

• Колышо мотоциклист-влакым шарныме кече
• Вӱдын качествыжым эскерыме тӱнямбал кече.
• Азербайджан — Калыкле сем кече.

Лӱмгече

Идым тылзын латкандашымше кечынже шке лӱмгечыштым Глеб, Елизавета, Захар, Раиса да Максим-влак палемдат.

Мо лийын

Тыгак ончо: Категорий:18 Идым Мо лийын

• 1810 — Чили элын Испаний деч кораҥмыже нерген увертарыме. Тудо шке суверенитетшым налын.
• 1947 — Америкыште Рӱдӧ разведке кучемым почмо. Тудым ЦРУ маныт.
• 1991 — Украинын тистыжым пенгыдемдыме.

Кӧ шочын

Тыгак ончо: Категорий:18 Идым Кӧ шочын

• 1901 — Дим. Орай (Дмитрий Фёдорович Богословский), марий серызе. Сылнымут тӱняште тудо Дим. Орай лӱм дене чапланен. Ятыр марий произведенийын авторжо. А «Чолга шӱдыр» повестьше школ программышкат пурталтын.
• 1949 — Алевтина Ильинична Бердинская, тӱвыра пашаеҥ. Шернур посёлкышто шочын. 1997-ше ийыште тудо Республикысе йоча книгапӧрт секретариатын вуйлатышыжлан шогалын. Алевтина Ильинична мыланна ятыр марий муро сем автор семынат палыме. Тудын мурыжо-влакым эфирыштына Татьяна Денисова, Эльвира Трифонова да молат йоҥгалтарат.
• 1952 — Геннадий Александрович Мальгин, тӱвыра да мер пашаеҥ, Татарстан республикын сулло тӱвыра пашаеҥже. Татарстан кундемыште шочын-кушкын. Паша корныжо Менделеевск кундемысе Элнет тӱвыра пӧрт дене кылдалтын. Тыште тудо «Элнет» лӱман ансамбльым чумырен. Суапле пашажым палемдыде кодымо огыл: ятыр чап танык дене палемдалтын.
• 1960 — Валерий Александрович Чеботкин, сӱретче, Марий Эл кугыжаныш премийын лауреатше. Йошкар-Олаште шочын. Паша корныжо М. Шкетан лӱмеш Марий калыкле драме театрыште тӱҥалын.Йошкар-Оласе художественный училищыште туныктышылан пашам ышташ тӱҥалын – 5 ий вуйлатышыжланат тыршен. Уста сӱретчын пашаже-влак Нью-Йоркышто, Прагыште, Парижыште да моло олаласе ончерлаштат лийыныт.
• 1956 — Иван Михайлович Стрельников, мыскараче, мер пашаеҥ, «Марий ушемын» йыжъеҥже. Шкеже тудо У Роҥго кундем Кӱрсола гыч, но кызыт У Роҥго кугыялыште ила. Иван Михайлович тӱвыра тӱняштат кугу пагалымашым сулен шуктен.
• 1979 — Наталья Васильевна Пушкина, радиовӱдышӧ, сценарист, режиссёр, мурызо, мыскараче, мер пашаеҥ, Мер Каҥашын да «Марий калык конгресс» мер толкынын еҥже, Марий Эл Радион тӱҥ редакторжо, Олык Ипай лӱмеш премийын лауреатше. «Саскавий» ӱдырамаш ушемын еҥже. Шочынжо Наташа Морко кундем Мари-Кужер ялыште. Кӱшыл шинчымашым Марий кугыжаныш педагогик институтышто поген. Судент пагытыштак «Рвезылык» ушемым чумырен да шкеак вуйлатен. 1 ий тудо Эстонийыште шинчымашым поген. А «Марий Эл Радиошто» икымше кече гычак пашам ышта.

Кӧ колен

Тыгак ончо: Категорий:18 Идым Кӧ колен

Калык пале

• Елизавета да Захарий-влакын пайремышт. Ожно тиде кечын ӱдыр-влак ончыкылык пӱрымашышт нерген мужедыныт. Куэ выньык дене пöрт гыч чыла черым да осалым ӱштын луктыныт. Тиде кечын шочшым нимогай осал вий сеҥен ок керт, манын ӱшаненыт.

	18 Идым Викиклатыште?