ნარუჯის დასახლება გაჩნდა 1929-30 წლებში, როდესაც ლაითურის ჩაის მეურნეობის გაშენების დროს გადაწვეს ტყითა და ბუჩქნარით დაფარული გაუვალი ადგილები. მისი სახელწოდებაც გადაწვის, გადარუჯვის შედეგად გაჩნდა. 1949 წლის ბოლოს დასახლება გამოეყო ლაითურს და ჩამოყალიბდა ცალკე მეურნეობად, რომელიც ფლობდა 230 ჰექტარ ჩაის პლანტაციას. 1966 წელს დაიდგა რუსთაველის ძეგლი. 1980-იანი წლების დასაწყისში ჩაის უკვე 550 ჰა ეკავა. 1986 წელს ნარუჯამ უკვე დაბის სტატუსი მიიღო.
2002 წლის აღწერის მიხედვით სოფელში ცხოვრობდა 1295 ადამიანი. 2010 წლის მონაცემებით მოსახლეობის რაოდენობა არის 2718 კაცი. მათი 90% ქართველია, აგრეთვე ცხოვრობენ სომხები (5%) და აზერბაიჯანელები (4%). მოსახლეობის 13% ღარიბია. დასაქმებულია შრომისუნარიანი მოსახლეობის 11%.[4]
