Roxolana
Roxolana | |
---|---|
Roxolana, asinas clamata per estar pelirroya |
|
Información personal | |
Naixita n'o: | 1500 ? |
Naixita de: | Rohatyn (Galitzia Oriental ?) |
Muerta o: | 18 d'abril de 1558 |
Casata con: | Solimán I |
Roxolana (u Roxelana), tamién conoixita per lo suyo nombre turco de Jurrem (u Hürrem), "l'alegre", (1500 ? - 18 d'abril, 1558) estió la muller d'o soldán Solimán lo Magnifico d'o Imperio Otomán.
Encara que las fuents d'o sieglo XVI cosa no dicen d'o suyo nombre de soltera, las tradicions ucrainesa y polaca posteriors consideran que yera Aleksandra u Anastasia Lisovska.
Biografía[editar | editar código]
Lo pai de Roxolana estió probablement un mosen rutén d'o lugar de Rohatyn, 68 km a lo sudeste de Lviv, capital de Galitzia, alavez parte de Polonia. La raptoron los tartres de Crimea en una d'as suyas incursions en Ucraína, presa como esclava y levata en primeras, posiblement, t'a ciudat crimeana de Caffa, important centro d'esclaus.
Trigata t'o harem de Solimán, puyó de categoría dica tornar-se la odalisca favorita d'o soldán y tener con ell cinco fillos. De l'aprecio que Solimán teneba per Roxolana, en ye buen ixemplo un d'os poemas que lo soldán li escribió:
- Cadiera reyal d'o mío nicho solitario, tresoro mío, amor mío, la mía luz de luna
- La mía amiga més sincera, la mía confident, tota la mía existencia, soldana mía
- La més beroya d'as beroyas...
- La mía primavera, l'aimata d'a cara alegre, la mía luz d'o día, la mía vida, fuella que ride...
- Lo mío chardín, la mía dulce rosa, la sola que no me fa mal en iste mundo...
- Lo mío Istanbul, lo mío Caraman, la tierra d'a mía Anatolia
- Lo mío Badakhxán, lo mío Bagdad, lo mío Corastén
- Muller mía d'o pelo polito, quiesta mía d'a cella arqueyata, aimata mía de uellos raposers...
- Siempre cantaré las tuyas alabanzas
- Yo, l'amador d'o corazón turmentato, lo Muhibbi d'os uellos glarimosos, soi unhombre feliz.
Crepando la tradición, Roxolana remató estando la suya muller y fendo que un d'os suyos fillos, Selim, heredás lo imperio. Probablement estió tamién la consellera de Solimán en muitos afers d'estato, y pareix haber influito igualment en afers exteriors y de politica internacional. Dos d'as cartas d'ella t'o rei polaco Sechismundo II Augusto se son conservatas, y mientres que estió viva, lo Imperio Otomán mantenió per un regular relacions pacificas con o Polonia-Lituania. Bells historiadors tamién creyen que podría haber intervenito con o suyo marito en o control d'as incursions d'os tartres de Crimea en a tierra natal d'ella.
Roxolana tamién s'embrecó en bells prochectos de construcción publica importants, dende la Meca dica Cherusalem; d'entre las primeras, en descollan una mezquita, dos escuelas coranicas, una fuent y un hespital ta mullers cerca d'o "Mercato d'Esclaus de Mullers" (Avret Pazary) a Istambul. Tamién n'ha pervivito qualques contrimuestras d'os suyos bordatos, como los datos en 1547 t'o xah d'Irán u en 1549 t'o rei Sechismundo II Augusto.
Roxolana morió lo 18 d'abril de 1558 y fue apedecata en un mausoleu decorato con un exquisito recholato d'Iznik que representaba lo chardín d'o paradiso, talmén en homenache t'o suyo caracter alegre y risotero. Lo suyo mausoleu ye adchacent a lo d'o suyo marito en a Mezquita de Solimán.
Muerta Roxolana, lo desolato soldán li escribiba:
- Eslanguindo-me soi en o mont d'o penar,
- an que sospiro y chemeco nueit y día,
- preguntando-me qualo ye lo destín que m'aguarda
- agora que ita se'n ye l'aimata mía.
Obras inspiratas en Roxolana[editar | editar código]
Roxolana, u Jurrem, ye estata lo motivo, igual a Turquía como a Occident, de pinturas, de piezas musicals (como una sinfonía de Joseph Haydn y una opera de Sichynsky), d'obras de teatro y de novelas, més que més en ucrainés.
Tamién se'n ha feito un molimento en o suyo lugar natal de Rohatyn.