Рубрикатор

Культура и религия ЧАУНЗАНСЕТНЕ – ВАСЕНЦЕТЬ!
ЧАУНЗАНСЕТНЕ – ВАСЕНЦЕТЬ!

Неть оймсема читнестэ Республикань Культурань Кудосо прядовсь «Шумбрат, Мордовия!» народной творчествань XVIII-це фестивалесь. Сонзэ ютавтыцянзо: МР-нь Культурань ды туризмань министерствась, республикань Раськень творчествань кудось. Малав кавто ковонь перть Мордовиянь весе районтнэ тесэ невтсть отчётонь концертэст. Теде башка, важодсть сюпав выставкат. Сынст эйсэ невтевсть кедьчелькев ломантнень эрьва кодат важодемаст: артозь ды викшнезь картинат, эрзянь ды мокшонь оршамопельть, някат, матрёшкат ды лия сувенирт, чувтосто керсевкст, карть, лембе кемть, кодазь варьгат. Мезе парось – сынст эйсэ микшнесть.

Теевезь коень коряс покш концертэнть невтизь кавксть: 13:00 ды 18:00 чассто. Сынст эйс билеттнэнь рамсизь вейке часос! Ды ялатеке весенень эзть сато. Уцяскавокс эсь пряст ловсть сетнеяк, кить ниле часонь перть вансть концертэнть стядо.

Кода меляткак, Гала-концертэнть ваномо сакшнось МР-нь Прявтось В.Д.Волков. Сонензэ васняяк максозель валоськак:

– Культурань иесь минек ёнкссо а юты стяко. Аволь умок С.Д.Эрьзя лемсэ музейсэ панжинек галереянть, курок прядовить витнематне-петнематне музыкальной училищасо. Теде башка, Отяжбуесэ панжинек пародояк паро Национальной центра. Витнинек Культурань кудотнень Ковылкинасо, Ромодановасо ды Атюрьевасо. Ветявить покш витнемат Рузонь драмань театрасо. Кемтяно, сы иестэ панжсынек сонзэ одс.

Те фестиваленть прявт арсемазо – ванстомс минек национальной культуранть, раськень творчестванть, койтнень-кирдатнень, муемс седеяк ламо ёроков ды кедьчелькев ломанть. Пек паро, зярдо фестивалентень явить мель велень эрицятне, тонавтыцятне, врачтне, эрьва кодамо профессиянь ломантне. Те фестивальсэнть сехте сыре участникесь – В.И.Шустин, конанень 88 иеть. Истя жо «Шумбрат, Мордовия!» фестивалесь лезды муемс од талантт. Саемга, истятнэнь, кода Орданьбуе ёнксонь Жаренки велестэ Полина Карпушкина. Сон нилецеде сась фестивалев, кавксть лиснесь Кремлянь сцена лангс. Ламот участниктне кассть те фестивальсэнть.

Теде мейле Владимир Дмитриевич казнесэ казинзе сетнень, кить тейсть покш путовкс минек музыкальной искусствасонть. МР-нь Прявтонь премия максовсь содавикс композиторонтень Н.В.Кошелеванень, МР-нь искусствань заслуженной деятелентень В.С.Родионовнень. Славань III-це степенень орденсэ казевсь Ташто Шайгова ёнксонь Сыре Теризморга велень мокшонь культурань центрань прявтось Н.М.Кадерова. «МР-нь культурань заслуженной роботник» лемсэ казевсь «Морамо» ансамблянь ветицясь Г.В.Дулкин ды лиятне. Почётонь грамотасо ды Благодарностьсэ казезельть райононь Культурань кудонь прявттнэ.

Покш концертэнтень кочказельть 50-де ламо номерт.

Ваныцятне неизь сехте вадря ды виев киштематнень, моротнень. Сынь кочказельть эрьва райононть пельде. Пек кецявтсть эйкакшонь номертнэ: Ромоданова ёнксонь «Непоседы» ансамблясь, Чаунзабуестэ Виктория Котина морась частушкат. Моразельть ламо рузонь народной морот.

Концертэнь башка пелькс алтазель Ине Отечественной войнантень. Тезэ кочказельть виев, седейс токиця морот. Эрьванть ули мель шнамс. Саемга, кото иесэ Лилия Ямбушева лиснесь морамо сыре покштянзо В.И.Шустинэнь марто. Парсте вастозель Кочкурбуестэ Юрий Ваньков, сон ловнось стих. Псистэ цяпасть Зубова-Поляна ёнксонь «Надежда» ды «Империя танца» коллективтненень. Вадрясто морызе «Смуглянканть» Чаунзабуестэ Виктор Сыркин. Истя жо лембестэ вастозель Лямбирь ёнксонь народной хорось.

Ваныцятне седейшкава кунсолость Дубёнка ёнксонь Александр Седовонь, Кочкурбуестэ Анна Брыжинскаянь, Ромоданова ёнксонь цёрань квартетэнть. Парсте морасть татаронь морыцятнеяк: «Умырзая» ансамблясь, Рафаэль Акбулатов од цёрась. Ваныцятне тошкасть эсь ютковаст, кой-кона паро номертнэ мекс-бути эзть понго Гала-концертэв, сынст таркас невтезельть седе лавшот.

 

Ризнэвти, аламольть эрзянь номертнэде. Ваныцятнень кецявтызь весенень вечкевикс Евгений Самаркин, Кочкурбуень Мурань велестэ «Сюлгамось» ды Покш Березникбуень Пермезь велень «Эрзянь ават» коллективесь.

Изницятнень лемест яволявтомо сцена лангс лиснесь МР-нь Культурань ды туризмань министрась В.И.Шарапов. «Мастерство земли мордовской» выставканть кисэ 1 тарканть саизе Ковылкина ёнксось, 2-нть – Орданьбуесь ды Кадошкинась, 3-нть – Зубова-Поляна, Ташто Шайгова ды Кадошкина ёнкстнэ.

Эрьва кодамо номинациянь коряс башка дипломсо ды эрьвась 20 тёжат целковоень премиясо казевсть Орданьбуень, Ромодановань, Покш Игнатбуень, Кочкурбуень, Темниковань творческой коллективтне.

100 тёжань премиясо казевсть Саранск ошонь округонь артисттнэ.

«Шумбрат, Мордовия!» фестивальсэнть 1-це тарканть саизе Чаунзабуесь (60 тёжат), 2-це таркасот – Ковылкина ды Краснослободск ёнкстнэ (эрьвантень 40 тёжат), 3 таркасо – Лямбирь, Рузаевка ды Торбеева ёнкстнэ (эрьвантень 30 тёжат).

 

Т.Маторкина

 

Новости

Тетянь-авань промкс


Саранскойсэ ютась «Социальное партнёрство семьи и школы, как ресурс развития республиканской системы образования» темас республикань тетянь-авань промкс. Эйзэнзэ пурнавкшность образованиянь сферасо управлениянь тонавтыця муниципальной отделтнэнь прявттнэ, тетятнень-аватнень пельде представительть, внутренней тевень министерствань ды здравоохранениянь министерстватнень ды лия ведомствань важодицят.

Подробнее ...
 
Урядыть ветькак


Августонь погодась пек лезды Мордовиянь аграрийтненень – лембе ды, главноесь, коське – неть фактортнэ лездыть пурнамс урожаенть эрязасто ды аламо ёмавкс марто. Региононь ламот хозяйстватнева а емавтыть вейкеяк минута – паксятнесэ важодемась а лоткси ветькак. Республикань районтнэнь, а Минсельхозонь сводкатнесэ сындест 23 – можна явомс колмо аволь вейкеть группава.

Подробнее ...
 
Спасов


Коень коряс эрьва иестэ Саранскоень Пролетарской районсо келейстэ тешкстыть Умарень Спасонть. Вана течияк «Луч» ДК-сь Пролетарской райононь Культурань ды оймсемань парксонть ютавты «Пахнет яблоками Русь!» кенярксчи. Тесэ ёрокчист невтьсызь те райононь творческой коллективтне

Подробнее ...
 
Утешев сайсь сырнень медаль

 

Индонезиянь Магеланг ды Семаранг оштнесэ ютась Астрономиянь ды астрофизикань коряс Масторлангонь эрьва иень олимпиадась. Те олимпиаданть масторлангонь астрономиянь сообществась лови сехте престижнойкс.

Подробнее ...
 
«Меремась» Обницасоль

 

Эстониянь Обница велесэнть, конась яволявтозь 2015 иень финнэнь-угрань раськетнень культурань прявт ошокс, неть читнестэ ютавтозель Сетунь королевствань чи.

Подробнее ...