Yemen

الجمهوريّة اليمنية (Al-Ŷumhūriyya al-Yamaniyya)
Bandera de Yemen Escudu de Yemen
Lema nacional: Allah, al-Watan, at-Thawra (árabe: «Dios, la Patria, la Revolución»)
Himnu nacional: República Xunida
Capital  • Población  • Coordenaes	Sana'a 1.747.627 hab. (2004) 15°21' N 44°22' E
Ciudá más poblada	Sana'a
Llingües oficiales	Árabe
Llingües reconocíes	{{{idiomes_reconocíos}}}
Forma de gobiernu Presidente Primer ministru	República presidencialista Abd Rabbuh Mansur Al-Hadi Mohammed Basindawa
Unificación	22 de mayu de 1990
Superficie  • Total  • % agua Llendes Costes	Puestu 48º 527.968 km² Despreciable 1.746 km 1.906 km
Población  • Total  • Densidá	Puestu 50º 20.727.063 (2005) 37 hab/km²
PIB (PPA)  • Total (2005)  • PIB per capita	Puestu 112º US$ 19.324 millones US$ 745
Moneda	Rial Yemenín (YER)
Xentiliciu	yemenín, -ina, -ino yemenita
Zona horaria  • en Branu	UTC+3 UTC+3
Dominiu d'Internet	.ye
Códigu telefónicu	+967
Prefixu radiófonicu	7OA-7OZ
Códigu ISO	887 / YEM / YE
Miembru de: ONU, Lliga d'Estaos Árabes
Sitiu web del Gobiernu: www.yemen.gov.ye

El Yemen (tamién Yeme; n'árabe: اليَمَن‎ al-Yaman), conocíu oficialmente como República de Yemen (n'árabe: الجمهورية اليمنية‎ al-Jumhūriyyah al-Yamaniyyah) ye un país d'Oriente Mediu qu'ocupa la fastera suroccidental de la península d'Arabia y llenda: al norte con Arabia Saudita, al sur col golfu d'Adén y el mar Arábicu, al este con Omán y al oeste col mar Bermeyu. Ye, colos sos 527.970 km² d'estensión, el segundu mayor país de la península, y la so capital ye Sana'a. El territoriu del país compriende tamién más de 200 islles. La mayor d'elles, Socotra, asítiase xeográficamente n'África, a unos 354 km al sur del territoriu continental del país. El país, con una xeografía dominada pol desiertu y pola cadena montañosa de Rub' al Khali, con picos de hasta 3.660 m d'altor, ta dixebrada del cuernu d'África pol estrechu de Bab-el-Mandeb.

Yemen yera la tierra del reinu de Saba, un estáu de comerciantes qu'ocupó'l territoriu yemenín demientres varios milenios. Nel añu 275 el país pasó a manes de la dinastía de los himyarites, y nel sieglu IV aportó a elli el cristianismu, que compitió col xudaísmu y el paganismu, que yeren les relixones del Yemen primero d'aquella. El Yemen recibió bien ceo l'islam, y les tropes yemenines foron perimportantes pal so espoxigue territorial inicial. De los sieglos IX al XVI el país tuvo domináu por varies dinastíes, de las que la más importante, pola prosperidá que-y dio al país, foi la de los rasúlides. A primeros del sieglu XX el país taba dividíu ente los imperios otomanu y británicu. Dempués de la Primera Guerra Mundial estableciose'l reinu de Yemen nel Yemen del Norte, y en 1962 convirtióse na República Árabe de Yemen. El Yemen del Sur siguió siendo un protectoráu británicu hasta 1967, añu en qu'algamó la so independencia col nome de República Democrática de Yemen. Dambos estaos xuntáronse pa formar l'actual república del Yemen en 1990.

La población del Yemen, ún de los países más probes del mundu, ye mayoritariamente rural. Tocántenes a la forma de gobiernu, embaxu la presidencia d'Ali Abdullah Saleh (1990-2012) el país ye ún de los más corruptos del mundu. En 2011 hebo manifestaciones, qu'entamaren el 15 de xineru, pa protestar pola probeza, el paru y la corrupción qu'asolaben el país, y tamién escontra'l plan de Saleh d'enmendar la constitución del país pa eliminar la prohibición de reelección indefinida del presidente, lo que lu diba facer presidente de por vida. Tenía amás, planes, pa que'l so fíu Ahmed Saleh fora presidente dempués d'elli. De resultes de les revueltes ciudadanes Saleh renunció al poder, dexándo-ylu al so vicepresidente Abd Rabbuh Mansur Hadi a cambiu de que-y garantizaran la inmunidá xudicial. El 18 de marzu de 2012 entamó una conferencia nacional pa poner les bases de lo que ha ser el futuru del país, que finó'l 25 de xineru de 2014. Yemen ha convertirse, colos alcuerdos alcanzaos nella, nuna república federal multirexonal. Estendióse-y por un añu el mandatu al presidente Hadi pa que convoque y coordine dos comités. Ún ha decidir si el país ha dividise en dos rexones federales (norte y sur) o en seis más pequeñes; y l'otru ha preparar una nueva constitución.

Gobiernu y Política

Dende la unificación de la República Árabe de Yemen (Norte) y la República Democrática de Yemen (Sur) en mayu de 1990, el sistema de gobiernu tien como base un Conseyu Presidencial de 5 miembros (tres del Norte y dos del Sur), dirixíu por Ali Abdullah Saleh.

Tien un parllamentu unicameral formáu por 301 miembros: 159 diputaos del norte, 111 del sur y 31 que nun son elexíos.

Organización político-administrativa

Mapa de Yemen

El país divídese en diecinueve gobernaciones (o muhafazat; muhafaza en singular ):

Abyan Adén Ad Dali' Al Bayda Al Hudayda

Al Jawf Al Mahrah Al Mahwit 'Amran Dhamar

Hadramaut Hajja Ibb Lahij Ma'rib

Sa'dah Sana'a Shabwah Ta'izz

Xeografía

Nel sector oeste de Yemen abonden los montes, con altures que pasen de los 3.500 metros, mientres que la fastera oriental ye una meseta, na mayor parte desértica. Nun hai ríos permanentes y les precipitaciones son mui escases. Les temperatures, normalmente mui elevaes, son más suaves na costa y nos montes.

Economía

Yemen tien una economía arcaica. Namás un 1% de la so superficie ye regantible. Asína, l'agricultura ye sobre too de cultivos de cereales y café. La ganadería yemenino ye abondo importante, sobre too no que respecta a les oveyes y cabres. Tamién ye un de los países productores de petroleu y tien abondes reserves de gas natural.

Demografía

Evolución de la población de Yemen.

Los yemeninos son árabes. Hai una pequeña minoría persa na costa norte y otra minoría ente Yemen y Omán qu'habla diferentes llingües sudarábiques.

Relixón: 53% musulmanes sunnís; 46,9% musulmanes xiís; otros, (cristianos, xudíos y hindús) 0,1%.

Enllaces esternos

• Wikimedia Commons tien conteníu multimedia tocante a Yeme.
• Datos sobre Yemen (en castellanu)
• Información de la OMS sobre Yemen (en castellanu)
• Embaxada de Yemen nos Estaos Xuníos (en castellanu)
• Gobiernu de Yemen (n'inglés)
• Información turística de Yemen (n'inglés)
• Diariu "Yemen Times" (n'inglés)
• Yemen Airways (n'inglés)
• Album indir (n'inglés)