Calcuta
Coordenadas: 22°34′01″N 88°22′01″L / 22.567, 88.367
Calcuta কলকাতা (en bengalí) |
|
---|---|
Situación xeográfica | |
País | India |
Estado | Bengala Occidental |
Xeografía | |
Altitude | 9 msnm |
Superficie | 185 km² |
Poboación | |
Poboación | 4.486.679 hab. (2011) |
Densidade | 24.000 hab./km² |
Xentilicio | calcutense |
Información | |
Código postal | 7000 xx, 7001 xx |
Alcalde | Sovan Chatterjee |
Páxina web | Páxina oficial |
Calcuta[1][2], de nome oficial Kolkata (কলকাতা), (ata o 1 de xaneiro, de 2001, oficialmente Calcutta), é a capital do estado indio de Bengala Occidental. O seu nome orixinal era Kolikata (en bengalí: কলিকাতা) que aínda se utiliza na literatura culta. É coñecida como "a cidade da ledicia" e "a cidade dos palazos". Tamén se coñece como "Michhil Nagari" (মিছিল নগরী).
No seu día foi a cidade máis poboada da India, aínda que na actualidade é superada por Mumbai. Se se inclúe a súa poboación metropolitana, é unha das dez cidades máis poboadas do mundo, cuns 12 millóns de habitantes.
Índice
Historia[editar | editar a fonte]
A historia de Calcuta comeza en 1690, cando existían tres poboados bengalís na beira leste do río Hugli: Sutanuti, Kalicata e Gobindapur. Nese ano Job Charnock da Compañía Británica das Indias Orientais, estableceu un posto comercial na primeira, e pouco despois nas aforas das outras dúas[3]. Entre 1696 e 1706 construíron unha fortaleza (o vello Fort William) en Kalicata[4].
A primitiva Calcuta articulábase desde o forte, onde se protexían a casa do gobernador e os almacéns da Compañía, con dúas rúas principais: unha norte-sur, antiga vía de peregrinación cara ao templo de Kalighat, e unha oeste-leste ou Avenue, partindo do forte con St. Anne nun lado e o Tank no outro (depósito de auga e parque, actual praza BBD Bagh), ata os lagos e pantanos que protexían a cidade polo nacente. En 1742 acometeuse a cava dunha rede de trincheiras por temor a unha invasión [5] , coñecido como Maratha Ditch que rodea o territorio das tres primeiras poboacións. Ata hoxe, estes elementos persisten configurando as liñas mestras do corazón da metrópole: Chowringhee, rúa principal da cidade, Bow Bazar e Circular Road unha vez recheado o foxo (1804) marcando os límites da vella Calcuta.
En 1756 os bengalís atacaron e destruíron o forte e conquistan brevemente a cidade. Despois de reconquistala, a primeira tarefa dos británicos foi erixir un novo forte, desta vez con todas as garantías defensivas. É ó Fort William levantado en Gobindapur entre 1758 e 1781, para o que se desprazou a toda a poboación nativa, (os antepasados de Rabindranath Tagore incluídos), e cun baleiro ó redor de grandes proporcións que chegou ata a actualidade coma o gran parque de Calcuta, o Maidán.
No 1772 a cidade foi designada capital da India Británica, o que marcou o comezo dunha época de crecemento: drenaxe dos terreos pantanosos, área gobernamental entre dúas rúas, Old Court House e Old Council House, paralelas ao río desde o área do vello forte ata a Esplanade (Maidán) coa Casa do Goberno presidindo o enorme baleiro[6]. Este crecemento alcanzou o seu cumio no mandato do gobernador R. Wellesley (1797-1805), cando a capital recibiu o alcume de Cidade de Pazos. Mais Calcuta estruturábase dende o comezo en dúas áreas ben diferenciadas: a White Town, británica, na metade sur (a dos pazos en torno ao Maidán); e a Black Town, nativa, na metade norte, insalubre e pestilente (foron implementadas medidas para a mellora das condicións entre 1814 e 1836)[7].
A partir de 1854, coa construción do ferrocarril e a Grand Trunk Road (Calcuta-Peshawar) na beira oeste do río (en Howrah, unión por pontóns en 1874 e ponte en 1943, a cidade a través do seu porto converteu a todo o norte da India na súa área de influencia [8]. Mesmo o sector indio de Calcuta converteuse nun activo centro de comercio, masificándose aínda máis. O final do século XIX marcou o apoxeo da metrópole coma capital intelectual do subcontinente.
Pola contra, o século XX significou a perda progresiva de poder e influencia a consecuencia dos avatares xeopolíticos. En 1912 perdeu a capitalidade da India británica en favor de Delhi e no 1947 a da Bengala oriental en favor de Dacca, que coa súa independencia posterior coma Bangladesh (1971) deu a puntilla a cidade ao lle arrebatar a maior parte da súa área de influencia natural. Ademais supuxo o agravamento dos problemas sociais pola grande afluencia de refuxiados non musulmáns do leste, o que a levou a fama mundial coma cidade da extrema miseria.
Deportes[editar | editar a fonte]
Os deportes máis populares na cidade son o Críquet, coma no resto da India, e o fútbol, sendo o principal polo deste deporte no país.
A federación local, a Indian Football Federation de fútbol fundouse en 1893, antes que a Federación da India, e dixire este deporte en todo o Estado de Bengala Occidental. Na cidade tamén teñen a súa sede os principais equipos do país, o Mohan Bagan Athletic Club, o Mohammaden Sporting Club e o East Bengal Club. A Calcutta Football League é unha das ligas máis antigas de Asia.
Calcuta é a sede do Calcutta Cricket and Football Club, fundado en 1792 é o segundo club de críquet do mundo. Na actualidade tamén é a sede do Kolkata Knight Riders, que compite na Indian Premier League.
En canto a instalacións a cidade conta con numerosos e importantes centros de deporte, coma o Eden Gardens, ún dos dous únicos estadios de críquet do mundo con 100.000 asentos. O Estadio Multiusos Saltlake é o segundo estadio de fútbol do mundo en canto a capacidade[9].
Calcuta tamén marcou fitos da historia do deporte noutros ámbitos, coma co Royal Calcutta Golf Club, primeiro club de golf fora do Reino Unido[10], ou co Calcutta Polo Club, fundado no 1862 e considerado como o club de Polo máis antigo do mundo[11].
Cidadáns destacados[editar | editar a fonte]
- Categoría principal: Nados en Calcuta
- Rabindranath Tagore (1861-1941). Poeta e filósofo, Premio Nobel de Literatura en 1913.
- Satyendra Nath Bose (1894-1974). Físico especializado en física matemática.
- Satyajit Ray (1921-1992). Director de cine.
Cidades irmandadas[editar | editar a fonte]
- Dacca, Bangladesh.
- Guangzhou, China.
- Macau, China.
- Long Beach, Estados Unidos de América.
- Odesa, Ucraína.
- Nápoles, Italia.
- Tesalónica, Grecia.
Galería de imaxes[editar | editar a fonte]
-
Imaxe do Eden Gardens, estadio de críquet máis grande da India e un dos máis grandes do mundo.
Notas[editar | editar a fonte]
- ↑ Benigno Fernández Salgado, ed. (2004). Dicionario Galaxia de usos e dificultades da lingua galega. Editorial Galaxia. p. 1304. ISBN 9788482887524.
- ↑ Por exemplo en Alonso, Fran. IGADI, ed. "O secuestro dos elefantes". Palabras con Fondo.
- ↑ Mapas vellos de Calcuta
- ↑ Gravados e cadros de Calcuta nos séculos XVII e XVIII
- ↑ "The Maratha Menace" Kalkuta Jornal
- ↑ Cadros e gravados de Calcuta no século XIX
- ↑ Mapa de Calcuta na primeira metade do século XIX
- ↑ Mapa de Calcuta en 1901.
- ↑ http://www.worldstadiums.com/stadium_menu/stadium_list/100000.shtml
- ↑ http://global.britannica.com/EBchecked/topic/511285/Royal-Calcutta-Golf-Club
- ↑ http://www.hpa-polo.co.uk/about/history_polo.asp
Véxase tamén[editar | editar a fonte]
Outros artigos[editar | editar a fonte]
Ligazóns externas[editar | editar a fonte]
- Kolkata Oline (en inglés)
- Calcuttaweb (en inglés)
- Información sobre Calcuta (en castelán)
|