馬蹄露就算受傷都好,仍然堅持拍攝,呢份敬業樂業精神,真係值得鼓掌。咁大家對於馬蹄露嘅認識又有幾多呢?
原名梁穎顏嘅馬蹄露,88年憑住歌唱比賽入行,幾年前網上瘋傳馬蹄露唱《飄雪》嘅片段,令唔少網民like爆,前年佢再以Lady Gaga嘅造型拍MV,成功引起話題。講到最多人熟悉,一定係佢喺《真情》飾演嘅May May,成功喺97年憑呢個角色拎「最厭惡角色獎」。
馬蹄露為咗令自己喺《愛.回家》入面嘅調酒師角色,活靈活現,索性去學花式調酒,考埋個調酒師證書,甚至潛水牌、電單車牌乜都有,KEEP住增值自己。相信大家最深刻,一定要數佢俾網民發現佢買飯俾街邊執紙皮嘅婆婆,以及喺-守護龍尾灘行動入面,勇於發聲。馬蹄露做事一向低調,就連私人事都係一樣,95年同開酒吧嘅Victor結過婚,離婚之後,馬蹄露繼續專心工作。做過唔少好事嘅馬蹄露,希望佢快啲好番,做多啲好戲俾大家睇啦!