Македонија е република со повеќепартиска парламентарна демократија и политички систем поделен на законодавна, извршна и судска власт. По 1945 година, Македонија станува суверена република во рамките на Југословенската Федерација, а на 8 септември 1991 година, по референдумот на граѓаните, Македонија станува суверена и независна држава. Уставот на Република Македонија е усвоен на 17 ноември 1991 година од страна на првиот повеќепартиски парламент. Главната цел е Македонија да се формира како суверена и независна, граѓанска и демократска држава и да се создаде институционална рамка за развој на парламентарната демократија, во која ќе се гарантираат човековите права, граѓанските слободи и националната еднаквост.
Собранието е централната и најзначајна институција на државната власт (www.sobranie.mk). Според Уставот, Собранието е претставничко тело на граѓаните и нему му е доверена законодавната власт на Републиката. Собранието е составено од 120 места.
Претседателот на Република Македонија ја претставува Републиката и е Врховен командант на Вооружените сили на Македонија. Претседателот се избира на општи и непосредни избори за мандат од пет години и може да служи најмногу два мандата. (www.president.gov.mk)
Извршната власт на Република Македонија е поделена меѓу Владата и Претседателот на Републиката. Владата ја избира Собранието на Република Македонија со мнозинство гласови од вкупниот број на пратеници и за својата работа одговара пред Собранието. Организацијата и работата на владата е дефинирана со закон за влада.
|
Согласно своите уставни надлежности, извршната власт ѝ е доверена на Владата на Република Македонија (www.vlada.mk). Таа е највисоката институција на државата администрација и, меѓу другото, ги има следните одговорности: да предлага закони, буџетот на Републиката и други регулативи коишто се усвојуваат во Собранието; да ги определува политиките за извршување на законите и другите регулативи на Собранието и е одговорна за нивното спроведување; да носи одлуки за признавање држави и влади; да воспоставува дипломатски и конзуларни односи со други држави; го предлага Јавниот обвинител; да предлага назначување на амбасадори и претставници на Република Македонија во странство и да назначува шефови на конзуларни канцеларии; и извршува други должности предвидени со Уставот и законите. |