SNORRA-EDDA: GYLFAGINNING
TEXTI UPPSALABÓKAR : 17-21

[ 17 ] Hér segir frá Álf[heimum].  Þá mælir Gangleri:  "Mikil tíðindi kanntu segja af honum. Hvat er þar fleira höfuðstaða en at Urðarbrunni?" 

Hár segir: "Margir staðir eru þar göfugligir.  Sá er þar staðr er kallaðr er Álfheimar.  Þar byggvir fólk þat er Ljósálfar heita, en Døkkálfar búa niðri undir jörðu,  ok eru þeir ólíkir sýnum ok enn ólíkari reyndum.  Ljósálfar eru hvítari en sól sýnum, en Døkkálfar svartari en bik. 

Þar er ok sá staðr er Breiðablik heitir, ok engi er þar fegri staðr.  Þar er ok sá staðr er Glitnir heitir, ok eru veggir hans ok steðr allar af rauðu gulli,  ok þak hans er af gulli. Þar er sá staðr er Himinbjörg heita.  Sá stendr á himins enda við brúarsporð, þar er Bifröst kemr til himins.  Þar er enn mikill staðr er Valaskjálf heitir, þann gerðu <guðin> ok þökðu skíru silfri.  Þar er ok Hliðskjálf í þeim sal, þat hásæti er svá heitir.  Þá er Alföðr sitr í því hásæti, sér hann um heim allan. 

Á sunnanverðum heims enda er sá staðr er allra er fegrstr ok bjartari en sólin,  er Gimlé heitir.  Hann skal standa þá er himinn ok jörð fyrir farask,  ok byggva þann stað réttlátir menn um aldir alda.  Svá segir í Völuspá: 
26. Sal veit ek standa 
sólu fegra, 
gulli þaktan 
á Gimlé. 
Þar skulu dyggv[ar 
d]róttir byggja 
ok um aldrdaga 
ynðis njóta." 
Sal veit ek standa 
solv fegra 
gvlli þaktan 
a gimle 
þar skvlo dyggv[ar 
d]rottir byggia. 
ok vm alldr daga 
ynþis niota. 
Þá mælti Gangleri:  "Hverr gætir þess staðar þá er Svartalogi brennir himin ok jörð?" 

Hár segir:  "Svá er sagt at annarr himinn sé suðr ok upp frá þessum, ok heitir sá heimr Víðbláinn,  en hinn þriði sé upp frá þeim, ok heitir sá Öndlangr,  ok á þeim himni hyggju vér þenna stað vera.  En Ljósálfar einir hyggju vér at nú byggi þá staði." 

[ 18 ] [ 41 ]

[ 19 ] Hér segir frá nöfnum Óðins ok ríki.  Þá mælti Gangleri: "Hverir eru æsir þeir er mönnum er skylt at trúa á?" 

Hár svarar: "[T]ólf eru æsir goðkunnigir."

Þá mælti Jafnhár: "Eigi eru ásynjur óhelgari ok eigi megu þær minna." 

Þá mælti Þriði: "Óðinn er œztr ok elztr ásanna.  Hann ræðr öllum hlutum, ok svá sem önnur goðin eru máttug, þá þjóna honum öll svá sem börn föður.  En Frigg kona h[ans] veit ok ørlög manna þótt hon segi engar spár,  sem sagt er at Óðinn sjálfr mælti við þann ás er Loki er nefndr: 
28. Œrr ertu nú orðinn 
ok ørviti, 
hví floptir þú, Loptr, 
ørlög manna. 
Frigg hygg ek at þ[au] viti, 
því at henni sjálfgi segir. 
ÆR ertv nv orþinn 
ok avrviti 
hvi floptir þv loptr 
orlog manna. 
frigg hygg ek at þ[au] viti 
þvi at henni sialfgi segir. 
Óðinn heitir Alfaðir, því at hann er faðir allra goðanna.  Hann heitir ok Valföðr, því at hans óskasynir eru allir þeir er í val falla.  Þeim skipar hann Valhöll ok Vingólf, ok heita þeir þá Einherjar.  Hann heitir ok Hangaguð ok Happaguð ok Farmaguð,  ok enn nefnisk hann á fleira vega, þá er hann var kominn til Geirraðar konungs.  Segir hann svá: 
29. Hétumsk Grímr 
ok Gangleri, 
Herjann, Hjálmberi, 
Þekkr, Þriði, 
Þuðruðr, 
Helblindi, Hár, 

30. Saðr, Svipall, 
Sanngetall, 
Herteitr, Hnikarr, 
Bileygr, Báleygr, 
Bölverkr, Fjölnir, 
Grímnir, Glapsviðr, Fjölsviðr, 

31. Síðhöttr, Síðskeggr, 
Sigföðr, Atríðr, 
Hnikuðr, Alföðr, Farmatýr, 
Óski, Ómi, 
Jafnhár, Biblindi, 
Geldnir, Hárbarðr, 
Sviðurr, Sviðrir, 
Jálkr, Kjalarr, Viðurr, 
Þrór, Gautr, 
Jálkr, Veratýr." 

hetvmz Grimr. 
ok gangleri. 
heriann. hialmberi. 
þeckr. þriþi. 
þvþrvþr. 
helblindi. hár. 

saþr. Svipall. 
sanngetall. 
herteitr. hnikarr. 
bileygr. baleygr. 
bolverkr. fiolnir. 
grimnir. glapsviþr. fiolsviþr. 

Siþhottr. Siþskeggr. 
Sigfoðr. atriþr. 
hnikvþr. alfoþr. farma tyr. 
oski. omi. 
iafnhar. biblindi. 
gelldnir. harbarþr. 
Sviþvrr. Sviþrir. 
ialkr kialarr. viþvrr. 
þror. Gavtr. 
ialkr. veratyr. 

Þá mælti Gangleri: "Geysimörg nöfn hafi þér gefit honum!  Ok þat veit trú mín at þat mun vera mikill fróðleikr  sá er kann skyn ok dœmi hverir atburðir orðit hafa til hvers þessa nafns!" 

Hár segir: "Mikil skynsemi er at rifja þat vandliga upp.  En þó er þat skjótast at segja, at flest heiti hafa verit gefin af þeim a<t>burðum  at svá margar eru greinir tungna í veröldinni,  þ[á þ]ykkjask allar þjóðir þurfa at breyta nafni hans til sinnar tungu til bæna f[er]lis sjálfum sér.  En sumir atburðir til þessa heita hafa gerzk í ferðum hans,  ok er þat fœrt í frásagnir, ok muntu eigi mega fróðr maðr heita,  ef þú skalt eigi kunna at segja frá þessum stórtíðindum." 

[ 20 ] Hér segir frá Þór ok ríki hans ok Bilsk[irni].  Gangleri segir:  "Hver eru nöfn annarra goðanna eða ásanna, eða hvat hafa þeir gert til frama?" 

Hár segir:  "Þórr er þeira framarst, sá er kallaðr er Ásaþórr eða Ökuþórr.  Hann er sterkastr ása ok allra guðanna ok manna.  Hann á þar ríki er Þr<úð>vangr heitir, en höll hans heitir Bilskirnir.  Í þeim sal eru fimm hundruð gólfa ok fjórir tigir, þat er hús mest svá at menn viti.  Svá segir í Grímnismálum: 
32. Fimm hundrað gólfa 
ok [fjó]ratugu 
svá hygg ek Bilskirni með bogum. 
Ranna þeira 
er ek ræfr vita 
míns veit ek mest magar. 
Fimm hvndrvþ golfa 
ok [fio]ratvgo 
sva hygg ek bilskirni með bogvm. 
ránna þeira 
er ek ræfr vita 
mins veit ek mest magar. 
Þórr á hafra tvá ok reið eina.  Svá heita hafrarnir: Tanngnjóstr ok Tanngrisnir.  Þórr ekr í reiðinni, þá er hann ferr í Jötunheima, en hafrarnir draga reiðina.  Því heitir hann Ökuþórr. Hann á ok þrjá kostgripi.  Einn er hamarrinn Mjölnir, e[r] hrímþuss[a]r ok bergrisar kenna er á lopt kemr,  ok er þat eigi undarligt, því at þar með hefir hann hefir lamðan margan haus á feðrum þeira ok frændum.  Annan grip á hann beztan, megingjarðir,  ok er hann spennir þeim um sik, vex honum ásmegin hálfu.  Þriðja grip á hann, þann er mikill gripr er í, þat er járngreipr.  Þeira má hann eigi missa við hamarskaptit.  En engi er svá frægr at telja kunni hans stórmerki.  En segja kann ek þér mörg tíðindi at dveljask mun dagr áðr en sagt er allt þat er ek veit." 

[ 21 ] Þá mælti Gangleri:  "Spyrja vil ek at fleirum sonum hans."

Hár svarar:  "Annarr sonr hans er Baldr inn góði, ok er frá honum gott at segja.  Hann er beztr, ok hann lofa allir.  Hann er svá fagr álitum ok svá bjartr at lýsir af honum, ok eitt gras er svá hvítt at jafnat er við brá Baldrs.  Þat er allra grasa hvítast, ok þar eptir máttu marka fegrð hans bæði á hár ok á líkam.  Hann er hvítastr ása ok fegrst talaðr ok líknsamastr.  En sú náttúra fylgir honum at eigi má haldask dómr hans.  Hann byggvir þann stað er Breiðablik heitir ok fyrr er nefndr: hann er á himni.  Í þeim stað má eigi óhreint vera, svá sem hér segir: 
33. Breiðablik heitir 
þar er Baldr hefir 
sér um gerva sali, 
á því landi 
er ek liggja veit 
fæsta feiknstafi. 
breiþa blik heitir 
þar er balldr hevir 
ser vm gerva sali. 
a þvi landi 
er ek liggia veit 
fæsta fæing stavi.