Vaphual.net

vaphual.net

daily zomi news, views, opinions

Na Khangno Hun by Daniel Mangpu

NA KHANGNO HUN by Daniel Mangpu

Thuhilhna 11:9

Khangno hun peen suahtaak peen hun, nopsak theih peen hun ahih manin alauhuai peen hun zong hi a, siatna tawh ikinai peen hunzong hipah hi. Lamkhat pan ze-etna hun cileeng zong kikhial lo hi. Adiakdiak-in kineihsiam (actor/actress) teen khangno I suahtaakna, nopna te thei uh ahihmanin Pasal/Zi nei hak mahmah thei uh hi .

(a) NulePa’ thumanna

Gamhoih zawdeuh te-ah kipat-tah daan zong hoihin,atawpna ah amau a hoih kei a leh bel mimanlo taktak hilel ding hi. Gamhoih
ahihmanin nasem zo khat in aneu a kipan amah leh amah kivaak zo hipah lel hi. Eilam-ah bel I seem nuam zong sepding omlo himawk in, NulePa teen I Zineihkhit nangawn a hongvaak akul hi mawk hi. Gamhoih te amau leh amau kivaak zo uh ahihmanin NulePa in tam sai nawnlo hi. Ei lam ahbel NulePa in eileh ei iki vaak zawh dong hongvaak himawkin, enzong amau I vaak kik zawh dikdek mateng phimbil nocia nangawn athu iman akul nahi mawk a, aman huai mahmah thuzong hisa ing.
Zomi Khangno
I tunte hongkhang in, imulte hongkhangin, I awte hong unh ciang….. gamlak a singno akhang nuam mahmah aa adawng mikmek laitak ihi hi. Tua ikhan nop mahmah laitakin ngeek mahmah se a, zong nip mahmah in kitan baih mahmah hi, asih baih nop peen hun, nisa guahtui alelh peen hun leh a deih peen hun hi a, tua hun peen khangno hun tawh kibang hi. Tua hun laitak khangno teen bangbang ahi zongin i leitung pasian ahi NulePa’ thumah mangzo leng khialh omlo peen ding hi.

(b) Lawmhoih (kholhpih hoih) kisam

Mipil tawh kikhawl lecin napil ding a, mihai tawh kikhawl lecin gimna nathuak ding hi.(Paunak 13:20) (La ZBC 289 Mawhna’ zol zui
kei-in).

Gamdang U.S paileng Mikang pau, Malaysia paileng Malay pau, ilawm te Seen(Chinese) nahi leh Seen pau I theih mah bangin I
khangno hun sungin lawm I teelding thupi mahmah hi. Leitung I nuntaak sung I gamtat kampau hong khel thei peen lawm-legual nahi mawk hi. Mihing te-in Zu dawn theisa, Tuibuuk, Khaini muam theisa a kisuak omlo hi. Gamtat kampau hoihlo atheisa aa asuak ki omlo hi.Tua ahihmanin ilawmte hoih leh eizong kihoih ding ahih manin lawmhoih thupi mahmah hi. I it peen lawmnu lawmpa hang mahin lungleen khitui luanna hongpian theih mahbangin, I it peen I lawm nu/pa tungmah panin siatna hoihna hongpai thei hi. Tua ahihmanin I itpeen ilawm tezong akisap leh ipelh(khen) lel ding akisap hun om thei hi. Lawmthak ineih ciangzong kha thum khat vei tabang’ ilawm thakpa hangin ei lawmta sungah bang hongpiang cihzong iki sittel zeel ding kisam hi. (Paunak 22:24-25)

© Munhoih(Leihoih) kisam

Khangluiteen “Ki khua a hawh Ki’ neek ne, Zawng khua a hawh Zawng’ neek ne” ana cih mah bangun I omna mun tawh zong khangnote gamtat kampau ki lamdang thei hi. Tua ahihmanin khangno teen munhoih (leihoih) I zon kul hi. Gamtat kampau peen a ki lawhlawh thei natna khat nahi mawk hi. Malaysia Thongsung katun cil in, midang te daanin Awnghawh(kongkhak omlo,tui kibuaklo), Kisil (bombi sungteen omlo-mitampi kisil khawm), kihon lai( gamkhatle gamkhat kitawng) cih daanin ka-om thei naikei hi. Ahi zong kha 3,4 sung bang tuate tawh ka omkhop ciang katheih loh kaalin tuate’ gamtat daan a, agamta ta kana himawk hi. Khangno teen a hihtheih leh innsaap’na, Saangkahna te-ah kholhpih hoih leh munhoih/venghoih I zon tangtang ding kisam hi.

(d) Alauhuai hun awng

Laigelhsiam Byran in…. “..nasep nei abel te’ ading akap hunding nangawn hun omlo hi….” naci hi. Tua mah bangin khangno teen zong lawm I zonciang amanlua, honghawh munlua te lawm a ineih lohding thupi mahmah ding hi. Hunawng hangin mi pawlkhatte cim lua-in Zu sai tung phekap, kitawng kiseel, nawnsan (kamtam) cih bang- in hunawng kizang khial hi. Nipa khat ki-it mahmah uh hi. Nasep hahkatin a Nupa un ann a neek khop hunzong tamlo phial hi. Ahi zongin nikhat guah hongzu in Lo kuan thei nawnlo uh hi. A Nupa un nikhat inn ah mei hong awi khawm uh hi. Meikha ah apau dingteng lah beita in atawpna ah “sing sawnto ve” ci-in kisawlsawl uh hi. A Zi inzong mangnuam tuanlo-in nidang aa akiteen maa thutengtawh kitawngin kikhenlawh uh hi. Hunawng ii hoihlohna hi. A zenzen in hunawng neikei le uh kikhen hetlo ding hi. Ei khangno teenzong Zu,Za,Khaini, Tuibuuk, Kuunza zat hunding,
kitot kiseel, mi geensiat hunding leh Satan hunding omsak loding hihang. I sepding a om pak keileh zong laibu simding, nasep ding
zongtawm ding hihang. I khangno hun, ihun awng sungin siatna in hong pang gige den, hong ze-et den ahihlam phawkin I hun awng zatsiam ni.

A koikoi ah Seente bang nasepbel uh in a Zudawn a Phekaap hunding, akitot hunding uh a om ngiatlo himawk hi. Natna nangawnin a zuan ngamlo hiam cihhuai phial mawk hi. Amau teen ei Pasian zong umlo napi Paunak 13:4,20:13 na nuntaak pih mahmah uhin bangbang ici zong leitung ah bel anuamsa uh hiphotphot ei….……eibel manlua kisa I Pa I U te’ motor, motorcycle tawh Beer sai niangtuisai khawngah nuamsa mahmah, nungaak/ tangval teen ahau takpi hongsa in hongngai ta
lailai…..

(e) Pumpi tung nate kepna

Nomau pumpi ki-uktawm thei-in pilvang unla, hoihtakin thu a ngen thei-in omta un (1 Peter 4:7)

Mihing a ipian khitciang ut bangbang septheih hilo hi.I khangno lai-in lungsim a ut hang! pumpi ikep hun I omsak mah bangin,
pumpi a ut hang lungsim I kepding akisap hun zong om hi. I lungsim ut khempeuh kizui kimlo a, I pumpi sepnop khempeuh kiseem kim lo-in ngaihsutna khuak izat kul hi.

I khangno lai-in I theih nailoh ahi ahoihlo nate akhumtam a altam, anuamtam anuam keitam cihte sinse keileng hoihpeen hi. Nalawm
pa/nu ding zong buaisuk buaitoh kul lo-in nasep belpeuhin citak lecin nang hongdeih tampi tak omlel ding hi.I khangno lai-in khialkha
pakleng I nuntaakna hong nuamlo suak ek thei hi. I khialh khitciang kibawl kik nading haksa mahmah a, bawltheikik mah lengzong angei hongbat nading haksa hi. Khialhna adang dang te aki puahpha thei, akimaisak thei om napi’n Nulepa vaai-ah nakhialh leh Numei te anunna siasuak’ thei a, Pasal te alungsim peengleen (kiplo) suak thei hi.

Khatvei sukha photleng kizomzom nuam thei a, khatvei nialzo phot lecin abaan hong zawhnop ding hi. Nakhuak tawh nangaihsut
khitciang, na lungsimtawh khentat, napumpi keem, thuak zawhna naneih nang Topa tung nakhangno hun/ na siamsin hun aap ve lawm…… (Kahla 3:27).

Daniel Mangpu @Kai Suan Mang, dmangpu08@gmail.com, Bah.4, Tedim,07050127

Join the forum discussion on this post - (1) Posts

Related posts:

  1. Na Khangno Laitak-in Nang a Hong Piangsak Pa Phawk In
  2. MBSE Result Suakta – Zomi Khangno tampi lawhcing
  3. Zomite’ Zolai Kum 100 Cing Ding Hi Ta
  4. Bang Teng In Zomi Siamsin Kipawlna Thanemsak?
  5. JH Cope leh Zolai

Tagged as: , , , , , ,

Leave a Response

You must be logged in to post a comment.