| |
D Ü N Y A
“Yaponçik” dəfn olundu 
16:42 13-10-2009
Yüksək təhlükəsizlik şəraitində keçən tədbirə “ded Xasan” rəhbərlik edib
Rusiya kriminal dünyasının ən məşhur ismi olan “Yaponçik” ləqəbli kriminal avtoritet Vyaçeslav İvankov oktyabrın 13-də Moskvadakı Vaqankovsk qəbiristanlığında dəfn edilib. Lent.az-ın “RİA Novosti” agentliyinə istinadən verdiyi məlumata görə, dəfnin təşkilatçısı rolunda digər kriminal avtoritet – “ded Xasan” ləqəbli Aslan Usoyan çıxış edib.
Hüquq-mühafizə orqanlarındakı mənbə Rusiyanın əsas mafiya başçılarından sayılan Aslan Usoyanın həqiqətən də qəbiristanlıqda olduğunu və dəfn mərasiminə rəhbərlik etdiyini təsdiqləyib: “Onu dəfnin təhlükəsizliyini təmin edən əməliyyatçılar görüblər”. Bundan əlavə, qəbirin üstündəki əklillərdən birinin üzərində “Əziz qardaşıma Xasan babadan” yazılıb.
“Yaponçik”in dəfni yüksək təhlükəsizlik şəraitində keçirilib. Dəfn mərasimindən öncə mina axtaranlar bütün qəbiristanlığı yoxlayıblar. Mühafizəçilər qəbiristanlığa dəqiqədə 5-6 adam buraxırmışlar. Jurnalistlər isə dəfn mərasiminə buraxılmayıb. Bundan əlavə, dəfnə “gələnlər” arasında xeyli əməliyyatçı olub.
Xatırladaq ki, 69 yaşlı Vyaçeslav İvankova iyulun 28-də axşam “Tayskiy slon” restoranının qarşısında sui-qəsd olub. “Qazel” avtomobilində gizlənən killer təxminən 70 metrdən “Draqunov” tipli snayper tüfəngi ilə onun qarnından vurub. Bir neçə mürəkkəb cərrahiyyə əməliyyatına baxmayaraq, kriminal avtoriteti xilas etmək mümkün olmayıb. “Yaponçik” oktyabrın 9-da səhər tezdən vəfat edib.
LENT.AZ
Xəbərin oxunma sayı:
1239
|
|
