Comissom volta a contar com doze membros

PGL - No passado 30 de Maio, na reuniom ordinária do Plenário da Comissom Lingüística da AGAL correspondente ao segundo quadrimestre do ano em curso, o Prof. Valentim Rodrigues Fagim foi designado novo membro da Comissom.
[+...]

Valentim R. Fagim (Vigo, 1971), licenciado em Filologia Galego-Portuguesa e diplomado em Geografia e História pola Universidade de Santiago de Compostela, é professor de português na Escola Oficial de Línguas de Ourense e desenvolve desde há anos umha intensa actividade como publicista e divulgador da unidade lingüística galego-portuguesa, com frutos tam relevantes como a fundaçom da livraria compostelana "A Palavra Perduda" e a do centro sócio-cultural "A Esmorga" de Ourense, umha assídua colaboraçom sobre temas lingüísticos com o Portal Galego da Língua e com o periódico Novas da Galiza e a publicaçom do livro de divulgaçom O Galego (Im)possível. Radiografia de umha Regeneraçom Inconclusa (Laiovento, 2001).

Com esta incorporaçom, que se tornará efectiva na reuniom ordinária da Comissom prevista para o derradeiro quadrimestre de 2008, a Comissom Lingüística da AGAL, que tem como projecto imediato a publicaçom de umha colectánea de ensaios que versam diversos aspectos gerais e particulares da língua da Galiza, volta a contar no seu seio com doze membros, após a renúncia do Prof. João Guisan Seixas, produzida, por razons pessoais, no passado mês de Março.