Noyabrın 11-də Təzəpir məscidində prezident İlham Əliyevin adından şəhid hərbçilər - Milli Qəhrəman Mübariz İbrahimov və “İgidliyə görə” medalıyla təltif olunnmuş baş leytenant Fərid Əhmədovun xatirəsinə ehsan mərasimi keçirilib.
Dövlət başçısının adından təşkil olunan mərasimdə şəhidlərin valideynləri, yaxınları, qohumları, Qafqaz Müsəlmanları İdarəsinin sədri şeyxülislam Allahşükür Paşazadə, Daxili İşlər, Müdafiə nazirliklərinin rəhbərliyi və şəxsi heyətləri, Bakı Şəhər İcra Hakimiyyətinin rəhbərliyi, ictimai-siyasi xadimlər, ziyalılar və ictimaiyyət nümayəndələri iştirak ediblər.
Məlumat “Media forum” saytına Qafqaz Müsəlmanları İdarəsinin mətbuat xidmətindən verilib.
Mübariz İbrahimov bu il iyunun 18-də, Fərid Əhmədov isə sentyabrın 4-də cəbhənin Tərtər istiqamətində düşmənin hücumunu dəf edərkən qəhrəmancasına şəhid olublar. Erməni tərəfi şəhidlərin meyitlərini noyabrın 6-da qaytarıb. Noyabrın 7-də Bakıda, Müdafiə Nazirliyinin Təlim-Tədris Mərkəzində Azərbaycan prezidenti, Silahlı Qüvvələrin ali baş komandanı İlham Əliyevin iştirakı ilə şəhidlərlə vida mərasimi keçirilib. Sonra şəhidlər İkinci Fəxri xiyabanda (“Qurd qapısı” qəbiristanlığı) dəfn olunublar.
