СОБРАНИЕ ОТ СВЯТАГО ПИСАНИЯ О АНТИХРИСТЕ

Минимизировать
Бог превечный, не имея ни начала, ни конца, неизреченною своею мудростию, яко восхоте и сотвори, создав бо человека от земныя персти и святым божественным писанием ограничив его. А еже праотец наш Адам из границ, назначенных ему, выступил, за то тлению подпаде: за преступление единыя заповеди 5533 лета пребысть в тлении и в смерти. Егда же восхоте Бог избавити нас от работы диавола и просветити землю своим познанием, посла Бог сына своего единороднаго в 5500 лето. Возсия солнце правды, Христос Бог наш, от пречистыя и пренепорочныя владычицы нашея, Богородицы и приснодевы Марии, и просвети светом познания вся человеки, и паки святым божественным писанием ограничив его, постави седмь столпов вечныя правды, и повеле всякому верующему во имя его созидати храмину свою на оных седми столпех. Аще бо кто в той седми вселенскими соборами утвержденной правде пребудет — спасен будет, а кто отступит или в чем нарушит — погибнет во веки. Егда же по тысяче лет, развязан бысть сатана от темницы своея, изыде и нападе на великую монархию Римскую, поколеба и разруши оное седмистолпное утверждение, и паки на второй Рим прииде по 1600 лет, а в 66 лето и Россия тому же падению поревноваша, и тако исполнися число зверя, 1666 лет. В то время царь Алексей Михайлович с Никоном отступи от святыя православныя веры, и всю церковь божию от всего благолепия обнажи, и бысть вместо царя — мучитель, а вместо владыки — ратник, якоже свидетельствует апостол в зачале 275: «Прежде приидет отступление, потом явится человек греха, сын погибельный, антихрист». Прежде прииде отступление от святыя веры царем Алексеем Михайловичем по числу 1666, а после его в третих на престоле возцарствова сын его первородный, Петр, от втораго, беззаконнаго браку, и той помазася на престол всероссийский законом жидовским, от главы и до ногу, показуя, яко ложный есть мессия и лжехристос, якоже пророчествоваша о нем Сивилла, «якоже имать царствовати царь жидовский». И той лжехристос нача превозношатися паче всех глаголемых богов, сиречь помазанников, и нача величатися и славитися пред всеми, гоня и муча православных христиан, истребляя от земли память их, распространяя свою жидовскую веру и церковь во всей России; в 1700 году возобнови, по совершенном своея злобы совершении, новолетие янусовское, и узаконив от онаго вести летосчисление, а в 1721 году приял на себя титлу патриаршескую, именовася Отец Отечества (якоже свидетельствует книжка «Царство мертвых», лист 115), и глава церкви российстей, и бысть самовластен, не имея никого в равенстве себе, восхитив на себя не точию царскую власть, но и святительскую, божию, бысть самовластный пастырь, едина безглавная глава над всеми. Противник Христов, антихрист, на уготованное ему место, царской престол, прииде по числу своему во свое ему время: на кончину времен; ибо Петр Великий всея злобы и воли сатанины исполнитель, родися по отступлении святыя веры, 1672 году, от царя Алексея Михайловича, не имеющаго уже на себе царскаго достояния, яко бо он преступи закон божий, якоже и Иуда предатель от лика апостольскаго отпаде, тако и той отсечеся от колена царскаго, якоже Кирилл Иерусалимский в знамении 10 пишет: «Ни от царей, ни от царскаго рода воздержит царство, но прелестью восхитит власть»; тако и той несть отча и дедина престола наследник, восхотел престола римскаго, сиречь приемник римския веры, якоже дивия лоза отсечеся от винограда, от святыя православныя веры, и роди сего сына погибельнаго, Петра, от вторыя жены, Наталии Кириловны, якоже свидетельствуют о том «Анекдоты», том 10. Егда бо сочетася царь Алексей Михайлович вторым браком от фамилии Нарышкиных с Натальею Кириловною, 1671 году, августа в 28 день, на память честнаго и славнаго пророка Крестителя Иоанна, и зачат сего сына Петра в ту нощь, небеса же комету в себе показаша, юже волхвы усмотреша, Симеон Полоцкий и Димитрий Ростовский. В день 29 поутру приходят к царю в палату, якоже волсви ко Христу, и поздравляют его с зачатием сына и нарекают имя ему Август, яко от августа месяца прият зачатие, и по образу Августа Кесаря возобладает. И паки Пахомий Великий: «Да будет и Петр камень, той бо скифския народы обладает»; изволяяй, да чтет о том «Анекдоты» том 10. И тако той мучитель, царь Алексей Михайлович, скончася в 1676 году, а после его в третиих воцарися на престоле всероссийском сын беззаконный, антихрист, противник Христов, вознесеся и возвысися паче всякаго глаголемаго Бога, якоже Кирилл святый, в знамении 8 и 9 свидетельствует и паки в знамении первом пишет, яко антихрист, предтечами его, место самодержавное и царское мира сего уготовано будет; и тако по пророчеству Даниилову, гл. 7 и 11: ста на месте святом мерзость запустения (на престоле российском царственном), яко свидетельствует Книга Кирилла Иерусалимскаго, знамение 2, яко различными коварствы прельщати начнет: любовию, дарованием, обещанием, прошением, грозою, казнию, войною, посольством, и слуги своими к своему духовному и святительскому уставу приводит восхищающи, дабы никто не пребывал в прежней православной вере и на его римские новые, полные еретичества уставы преступили, а царства и власти поседающе, силою и коварством под свою власть покаряюще, выше, л. 2, сказует сице: «Ты же зри, что уже было и что еще имать быти, яко святие пророцы прорекоша нам многообразно о противнике».
 
Мы же, смотряюще недремательным оком, познаваем, яко от лет по числу 1666, конец прияша проречение их, а совершенное же всея злобы исполнение исполнися на Петре. Якоже Даниил в главе 7 глаголет: «Зверь 4 горд и страшен и ни единому неподобный, всю божию и святых его истину восхощет превратити злыми делы и всех первых превзыдет, и святая вышняго смирит, и помыслит пременити времена и закон».
 
И тако обновися и укрепися новая вера жидовская, новым помазанником ложным мессиею, противником Христовым, Петром, его же злобы и хуления на Бога вышняго не достанет ми времени вся подробну поведати. И Даниилово пророчество исполнися на нем: «Отверзе уста своя зверь той в хулениих на Бога вышняго» — нача себе величати и славити, возвышаяся над всякаго. О возобновлении в 1700 году собра весь свой поганский синклит, в 1 день генваря месяца, и постави храм идолу ветхоримскому, Янусу, и пред всем народом нача творити чудеса чрез диавола, под видом фармазии, и вси воскликнуша ему единогласно: «Виват, виват Новый год!» И от того дни разосла своя указы во всю Россию праздновати Новое лето, якоже Господь наш Иисус Христос во осьмый день по рождестве обрезание прием, лет по плоти исполняя таинство. Якоже свидетельствует канон (песнь 1, ст. 2): «Сице обрезание приемлешь, Христе, своего рождества ветхую сень опрятая, свет возсия новыя благодати»; тако и той лукавый льстец, в той же день, по исполнении всея злобы, возвещая им яко новую благодать. И паки ст. 6 песни: «Прият кончину закон, отнележе Христос младенствовах исполнитель закону сый, обрезание прият, разреши законную клятву». Такожде и той льстец, исполня свой весь погибельный закон и разрушая законную святых отец клятву, иже на первом вселенском соборе положенную, праздновати Новое лето в первый день септемврия месяца: «Аще кто инако начнет творити, да будет проклят». Он же, змий лукавый, разрушая сию законную клятву, исполняя свой пагубный закон, во осмый таинства Христова день и той, исполняя свое таинство, нача праздновати Новое лето. И паки песни 8 ст. 1: «Во 8 день обрезываешься, владыка, Иисусово именование приемлешь, яко миру есть Спас и Господь»; тако и той сын погибельный, Петр, при том своем янусовском собрании, поздравлен и принят за императора августейшаго, сиречь надо всеми обладателя. Якоже свидетельствует Ипполит: «По всему хощет льстец уподобитися Сыну божию».
 
Оле беды жизни нашея! О благоразумная чада! Вонмите зде, кому ежегодно празднуется Новый год? То несть ли сим сущим идолом, храму со вседержителем ратующему, Петром устроенному, со идолом Янусом и старинным осмотысячным Сатурном? И како зрим на сей день идолопоклонения с поздравлением Новаго лета? И мы вси в сих летех жительствуем! Не всяко ли производство письменных делах, а наипаче таковаго года, свободно путь провождаем, по данным трекозням именем сатаниным? Оле беда! В таковой силе от духовенства, при открытии янусовскаго сего года, проповеди? Ибо все господни лета истреблены, а сатанины извещены. Воистину, исполнися зде тайнозрительное откровение и власть перваго зверя всю творити пред ним, и творяше землю, и вся живущия на ней до поклонения первому зверю, сатане, глаголя: «Реши мое дело, покорно прошу пожаловать паспорт!», он отвещает: «Отдай подушное с Новаго года, и еще нет ли иных недоимок, ибо на моей земли живешь». Оле, яма глубока погибели рода человеча! <…>
 
Господи Исусе Христе, сыне божий, помилуй нас, верующих в тя, и помози нам, грешным, соответствовати вопрощающим нас! Во имя Господа нашего Исуса Христа, объявляем вам, председящии вопросители или судители сих времен. Днесь сице убо есмы христиане, веруем в Господа нашего Исуса Христа, спасителя миру, единомысленно и единодушно со святыми отцы седми вселенских соборов и девяти поместных, и со святыми отцы Соловецкия обители, пострадавшими за древнее благочестие и за исповедание православныя веры при царе Алексее Михайловиче и при патриархе Никоне, в лето 7177. Того исповедания и мы держимся и Христа Спаса нашего закон и повеление соблюдаем, того ради и в книги законопреступнаго повеления писатися не хощем, и в силу указа вашего императора и его законоположения о ревизии не пишемся, да и писатися никогда не хощем, понеже видим во святом писании, яко прежде бывшии в России благочестивии царие Иван Васильевич, и Феодор Иванович, и Михаило Федорович, и Алексей Михайлович, бывший во благочестии до никонова патриаршества, яко сии вси народнаго изчисления от мала и до велика, мужеска пола и женска, живых и мертвых, и всего общечеловечества описании не творили, и оставляли то в судьбы правительства всемогущаго Бога. Егда же, по пророчеству Ездрину, отломися от винограда Христова лоза, сиречь от царскаго благочестиваго племени и от веры православныя, юже содержаще вси царие благовернии, Алексей Михайлович отступи и всю церковь Христову от благолепия обнажи, и вся предания отеческая разруши, и бысть вместо царя — мучитель, вместо владыки — ратник, на самаго царя небеснаго рать воздвиже и на православных христиан велие гонение, и тако томя многих, и муча, и смерти предая, истребляя в России православную веру, и тако зле скончая свой мало временный живот. (Изволяяй, да чтет о том Историю Соловецкую). А после того, в третиих возцарствова сын его первородный от втораго, беззаконнаго, браку, Петр, и помазася на престол всероссийский от Рима, жидовски, по закону римскому, от главы и до ног, и егда же, по пророчеству Даниилову, возвысися и возвеличися над всякаго глаголемаго Бога или чтилища, сиречь помазанника (царие бо, иереи и архиереи, по Евангелию, христи именовахуся), и той лжехрист и помазанник, жидовский царь прииде на престол российский 1721 года, принял на себя титлу патриаршескую, назвася Отцом Отечества и императорства августейшаго и обладателя многих стран и народов. И тако нача паче меры возвышатися той лжепомазанник, и восхити на ся, не точию царскую власть, но и святительскую и божию; якоже папа в Риме, тако и сей лжехристос нача гонити и льстити и искореняти останок в России православныя веры, и свои новыя умыслы уставляя и нова законоположения полагая по духовному и по гражданскому расположению, состави многие регламенты и разосла многие указы во всю Россию с великим угрожением о непременном исполнении оных, и устави Сенат и Синод, и сам бысть над ними главою и судиею главнейшим. И тако нача той глаголемый Бог паче меры возвышатися. Тойже лжехристос содела от гордости живущаго в нем духа, учини описание народное, исчисляя вся мужеска пола и женска, старых и младенцов, живых и мертвых, возвышаяся на ними и изыскуя всех, дабы ни един мог скрытися руки его, и облагая их даньми велиими, не точию на живых, но и на мертвых. Таково тиранство учини: и с мертвых дани востребова! Сего и в древния времена бывшии мучители не творили! И тако по писанию Мефодия Патрскаго, сбысться: «В последнее бо время вопросят лжехристы дани от мертвых, яко и от живых». Егда же той император, или монарх, сиречь единоначальник или единовластитель, народное описание учини, называя то ревизиею или исчислением душ человеческих, которыя приняли его за императора или повелителя, за единовластнаго правителя и пастыря (якоже свидетельствует книжка «Дополнения его деяний»; изволяяй, да чтет тамо). Мы от Христа Спаса научихомся закон и заповеди его сохраняти и веру святую блюсти, и таковому лжехристу в послушество отдатися не хощем, и в книги его законопреступныя писатися с нечестивыми никогда не будем, да и хотящим спастися никому не советуем. Творите с нами, что хощете, ибо есмы христиане единаго исповедания седми вселенских соборов святых отец и святых страдальцев Соловецкия обители, пострадавших за древнее благочестие, того исповедания и мы держимся и в книги ваши законопреступныя гражданския описи с нечестивыми не пишемся, ибо мы от святаго крещения записаны есмы в книги животныя у царя небеснаго на небесех.
 
Зрите, человецы, и вонмите, и разсмотрите по святому писанию, в киих летех жительствуем и кто ныне обладает вами? ибо дух Петров царствует во всех до скончания века, яко свидетельствует книжка «Кабинет Петра»; ибо дух государей российских есть дух Петра Великаго. Зрим, како дух его богоборной во всех властодержцах действует и действовати будет до скончания века, егда приидет Господь с судом вселенней, и убиет такого гордаго властителя духом уст своих, и упразднит злобу его явлением пришествия своего (якоже пишет о нем святый апостол Павел в зачале 275 сице: «Яко аще приидет отступление, прежде откроется человек греха, сын погибели, противник, и превозносяйся над всякаго глаголемаго Бога, или чтилища». Разумеем по святому писанию, что глаголет: аще приидет отступление прежде, и откроется человек греха, сын погибельный, противник, антихрист. И прежде прииде отступление царем Алексеем Михайловичем в лето 1666, и потом, по отступлении его от веры Христовы, скончася супруга его, Марья Ильинишна, и поя себе в жену Наталью Кириловну, и сочетася браком законопреступным, и роди сего сына погибельнаго, сиречь противника Христова, и всего благоверия нарушителя, и всей злобы погибельной исполнителя (якоже толкует Иоанн Златоустый, святый вселенский учитель: «Кто убо сей есть? Убо ли сатана?» — и разсуждает сице: «...никако же, но человек некий всякое его бо приимет действо, сиречь сатанино действо, восприимет богопротивно, и ополчится на завет святый, якоже и Даниил пророк о четвертом звери в видении пишет: «Зверь четвертый горд и страшен, ни единому не подобный, и ополчится на завет святый, времена и закон пременити размыслит; кто разумеет тайныя его ловитвы?»). Петр Великий, злобы исполнитель, Богом преданный на первом вселенском соборе индикт или Новое лето, преведе с септемвры 1 на генваря 1 число, в славу свою и в честь имени храма Янусова. Оле, велияго несмотрения! Како сей дерзну завет святый нарушити, иже святыми отцы установленный индикт превратити, именова себе монархом августейшим, по образу Августа Кесаря единовластвующаго на земли. И тако сей лжехристос, восхитив на себя царскую и святительскую власть, и вступи на высочайшую степень патриаршескую, яко свидетельствует о том изданная им книга «Регламент Духовный», лист 3, в 9 пунктах, како и для чего уничтожи патриаршее достоинство, дабы ему единому властвовати, не имея равна себе, но вместо того устави синод или синедрию, содержащую в себе правления духовных дел, имея в себе 12 членов, 4 ассесора, 2 президента, 2 вице-президента, утвердив их седмоклятвенною присягою, дабы кроме его единаго никаких дел не творити, но имели бы его единаго превысочайшею главою и судиею всея церкве. И тако, по Ипполиту, совершен собор ученик себе восприят по образу 12 апостолов Христовых, а сам един безглавая глава, превозносяйся надо всеми (якоже и Ефрем святый пишет: «Вси вкупе во единой воли будут») и паки той же лжехристос, восхищая на себя святительскую власть, именовася Отцом Отечества, ибо патриархи именуются (по слову «Правыя Веры», гл. 19), Отец Отцев всего света; тако и той именовася Отец Отечества; и паки: восхищая себе превысочайшую славу Сына божия, первенство Господа нашего Исуса Христа, яко свидетельствует Апокалипсис глава 1: «Аз есмь алфа и омега, первый и последний, не имея ни начала дней, ниже конца веком». И тако той лжехристос, восхищая на себя славу Сына Божия превысочайшую, именовася Петр I, и прочие по нем тако же именуются. И паки именовася божеством России, якоже свидетельствует книжка «Кабинет Петра», лист 2: «Он бог твой, бог твой, о Россия! Он члены взял в тебе плотские, сошед к тебе от горних мест».
 
Ибо он древний змий, сатана, прелестник, свержен бысть за свою гордыню от горних ангельских чинов, сошед по числу своему 1666, взяв члены себе плотския, якоже святии пишут Ефрем и Ипполит: «Родится сосуд скверный от жены, и сатана в него вселится, и начнет творити волею своею». И Андрей юродивый в 44 пишет: «Сотворит ему Господь Бог сосуд сквернен и скаредия исполнен, и возмужавшуся человеку, его лестию приемшу царство». И тако той, по святых проречению, сквер-ный сосуд, Петр, родився по числу 1666 от беззаконнаго новаго жидовина, царя Алексея Михайловича, а сатана в него вселився сам собою, по онаго воли нача действовати. И паки: той же лжехристос, возвышаяся над покорившимися ему заручною грамотою, присягою и целованием креста, именовася император, сиречь тем, кои приняли его за истиннаго пастыря, <...> яко свидетельствует святый Ефрем: «Истиннаго пастыря образ приимет прелестник», хищный волк скрыся в овчую кожу и скры пагубное свое имя под литтерою М, а прочий слог по азбуце содержит число имени его 666 = император; в оном слове, кроме излишния оныя литеры, замыкается число 666 пагубнаго имени его, якоже свидетельствует Апокалипсис, яко имать писати имя свое тайное, в куплях и продаяниях, его же никто же от земных и мятущихся в вещех житейских не уведает; сими словесы 666 не изволи бо божественная благодать пагубнаго имени его в книгах написаны быти, во образ же обучения может кто обрести по Ипполиту и Иринею имена, число сие обемлющия: «Титин, Лампетис, Маометис, Фармазий, Венедиктос»; время бо открывает и искус целомурдствующих, якоже свидетельствует книга Баронея, слово 150 о антихристе: «Той прелестник сый, наречет свое ему пагубное имя скверное, от века нигде же не слышимо во всех родех». До зде от Барония. Воистину, нигде не слышимо от века именования сего — император: от Рима изыде, да к нам в Россию прииде. И тако той злый сосуд сатанин, император Петр, всея воли сатанины исполнитель, по совершенном злобы своея исполнении, в 1700 году разосла многия указы и законопреступныя повеления, во всей России повеле праздновати новое лето каждогодно, во вся времена, в 1 число генваря месяца, ратуяся со святыми седми вселенскими соборами, иже святии отцы на первом вселенском соборе, при благочестивом царе Константине, узакониша во вся предъидущая времена праздновати святою церковию ежегодно до скончания века в 1 день септемврия месяца Новое лето, яко начаток свободы христианския от тяжкаго ига мучительскаго. Сын же погибельный, ратуяся со святыми, возобнови свое новолетие в честь своего имени. Якоже бо имя Петр в пяти литерах обносится, тако той приведе праздник новолетия в пятый от септемврия месяца и сотворив с ним спраздновати верноподданныя своя рабы. И паки той же злый вождь, ангел неправедный, противник Христов Петр, возвышаяся над человеки, учини народное описание по образу Августа Кесаря, исчисляя вся мужеска пола и женска, облагая их даньми велиими, не точию на живых, но и на мертвых.
 
Яко свидетельствует о том преподобный Мефодий Патарский в слове 66: «В последнее бо время антихрист вопросит дани от мертвых, яко от живых»; и паки ниже: «Антихрист весь мир данники сотворит, по записании в своя книги, дани с душ человеческих». От великаго неразсмотрения и крайния погибели человеческия, антихрист, по записании в своя книги, требует со своих верноподданных дани душевныя. Что же есть душа? Душа бо есть невидимаго существа божий образ, дебельством плоти одеяна, невидима и неосязаема, должна есть приносити создателю своему дань душевную, веру правую, надежду несомненную и любовь нелицемерную; сын же погибельный уби сию трисвятую добродетель и насади вместо того неверие, безнадежие, нелюбовь, якоже свидетельствует Ефрем Сирин: «Вложит страх, пренемогание и люто неверование в сердца человеком». И Ипполит святый в слове третием пишет сице: «Омерзит многи души, сотворить бо себе начальник от бесов»; то и святый Ефрем пишет: «Приставники бо поставит творити волю его на всяком месте». А иже на римское начальство, якоже ныне видим, не цари царя избирают или поставляют, но духовные духовных, на монархию римскую, на царскую власть света сего прекладают, иже божию и святительскую власть в Риме на себя восхитив, и по всему миру разширяют, и держат, и предадут оному последнему князю мира сего, антихристу; ниже: «Якоже нынешнии его предтечи, вознесется и возвысится паче всякаго глаголемаго Бога, или чтилища»; и не глаголет напрасно «паче Бога», но «паче всякаго глаголемаго Бога», еже есть паче всех царей земных, иже суть прозвани, а не беху суть бози. Царие бо иереи глаголемии бози и христи именовахуся (яко свидетельствует Максим Грек в книге своей во главе 30). Царь есть ничто же ино, точию жив образ одушевлен самаго царя небеснаго, сиречь жив пред ним. Ниже, статья 24: «Остави бо 99 овец незаблудших, и сниде на землю искати погибшаго овчате человеча рода, и остави по себе пастырей, царие и святители, да отечески и владычески прилежат и пекутся о душах их».
 
А ныне от лет, по числу своему 1666, прииде злый вождь, неправедный, царь жидовский, ложный мессия, лжехристос, одушевлен образ самаго сатаны, якоже Ефрем Сирин свидетельствует: «Яко тать и прелестник есть антихрист, хощет приити во своя времена, хотя украсти, убити и погубити божие стадо избранное, истиннаго пастыря образ приимет, да прельстит овец стада».
 
Ибо Петр Великий, всея злобы и воли сатанины исполнитель, вознесеся и возвысися паче всякаго глаголемаго Бога, или чтилища, по Ефрему Сирину, яко тать лжею говения, прииде на престол всероссийский, якоже и сам о себе велехваляся, глаголет: «Сирым был отец, странствующим — пристанище, бедствующим — помощник, обидимым — избавитель, насилуемым — свободитель, для скорбных и престарелых учредил гошпитали, для малолетных — училища, неполитической народ российский в краткое время сделал политичным и во всех знаниях равной европейским народом, Азию с Европою чрез протекты дальныя пути найкратчайшия соделал, великую коммерцию учредил, государство распространил, восхищенное возставил, уничтожаемое прославил, ветхое обновил, неимущее создал, спящих в неведении возбудил, немощных в силе укрепил, ленивых к труду подвигнул, буих умудрил, чины и степени и порядки благаго жития образы насадил, своим трудом от идолослужений и от богомерзкаго раскола и безумнаго атейскаго мудрования до дву миллионов душ во благочестие обратил, многия суеверия истребил, чин духовный к пастве и проповеди слова божия способнейшим учинил, о должностях издал Духовный Регламент, учредил Сенат — кормило государственное, и уставы, права и законы утвердил крепкими указами о непременном исполнении оных, учредил академии, школы, училища, фабрики, во всем имел умеренность, ни в чем недостатка не имел, ниже в величестве и в великославных делах Петру Великому от начала мира никто подобен не был». (Якоже свидетельствуют о нем святии: «Зверь той горд и страшен, ни единому неподобный», о чем он и сам о своем достоянии сице вопиет: «Зиждитель мира искони положил своими судьбами прославить в ваши дни. Он послал в Россию человека, каков не слышим был от века, сверг все препятства, вознес он главу, победами венчанну, России, варварством попрану, вознес до небес. Стихии сами объявляют, чего все россы ожидают»). Зри, православный читателю, кто он есть! и сам о себе открывает, и вся деяния своя ясно представляет, которому вся Россия, преклоня колена, глаголет: «Кто подобен зверю и кто может ратоватися с ним?» Воистину никто же, иже в мирских вещех мятется и ум свой пригвожден к ним имать. Аще бо кто озверившемуся тому антихристу повинется и злочестивое житие его содержит, оного изобразующе, или словом, или делом Бога его проповедает, се бо и сказует печати его даемое начертание на челе и на десной руце; аще кто приимет печать его, той области не имать знаменатися знамением Христа спасителя своего, но прелестнику приложится и тому единому послужит, всяко погибе той от Бога и от человек. Како нынешнии разнаго вероломства сектари хвалятся иметь и веры своя быти правыми, возносят гласы своя до небес: мир и тишина от антихриста нам даны разныя секты водить, — не ведуще святаго писания, в ересях блудят. За то окаянный льстец уступил им быть в полной свободе, что ни един из них бысть противен воли его, и все последовали в след лукаваго того зверя, и обоготворили его, и приняли с клятвенною присягою богопомазанным, боговенчанным боговенчаннаго Христа, а сущаго антихриста. О бедные бедняки, разных вер сектари! Где вы ум свой потеряли? За таковаго лютаго зверя, антихриста, законопреступно присягали, и крест за него целовали, и в его погибельныя книги верноподданными рабы и слуги себя записали, и тем присяганием и ложным креста целованием обоготворили антихриста и отступили от Господа нашего Исуса Христа и святыя православныя веры? По Ипполиту и по Ефрему Сирину, не имеете области не точию держати правыя веры, но ниже имеете область знаменатися знамением Христа спасителя своего, о чем апостол, вопия, глаголет: «Имуще образ благочестия, силы его отрекошася». Аще бо кто антихристу поклонится или предастся, той царствия небеснаго не наследит. Того ради окаянный льстец умолче, понеже всех в сети своя уловил, широкою дорогою и самовластным житием всех прельстил, якоже сам Господь рече: «Возстанут бо лжехристи и лжепророцы, ложнии христи, помазанники царие, иереи»; ложнии пророцы, по Иоанну Златоустому, являюще на себе вид благоверия, а силы его отрекошася, и мечтанием творяще явления пред очима зрящих, сиречь по привидении показующе и блазненную веру проповедающе: «Зде Христос, он-де Христос», а всем безумным едина глава есть антихрист. А вси разнаго вероломства сектари, по оного воли своя дела творяще, яко уды во едином теле и под единою главою, иже святии, предзряще духом о последнем неистовом роде, ужасающеся последних случаев, болезненно описоваху, глаголюще: «Будет бо скорбь велия, якова же не бывала от начала мира, и потом не будет!» <...>
 
Вонмите зде вси, последующии Янусовскому новолетию, поклоняющиися чрез Янусовское новолетие Маозию! Ибо он лютый зверь, всея злобы и воли сатанины исполнитель, Петр, по совершенном всея злобы своея, яко святии отцы тогда на первом вселенском соборе, при царе благочестивом Константине, уложиша и запечатлеша, и сице написаша: «Аще кто дерзнет разрушити, да будет проклят». Великий в злобе Петр и всея воли сатанины исполнитель, дерзну клятву разрушити и уставы святых попрати, разосла свои богопротивныя узаконения, повелевая и по гражданскому производству дел, чтоб писать лета, начиная с 1-го генваря, яко свидетельствует книжка «Дополнение деяний Петра». Сего ради мы, христиане, от Христа спаса научихомся и от святых его ученик и наместник, дабы не приимати ложнаго, яко истиннаго, лжехриста за истиннаго Христа и за богопомазанника, разве за то, что вся уставы святых разрушил и восхитил на ся не точию власть царскую, но святительскую и божию. Царскую восхити, понеже незаконно на престол помазася, именова себя императором, а святительскую восхити, понеже именовася Отцем Отечества и глава церкви российския, восхищая себе суд духовный; а божию власть восхити, сиречь уставы святых разрушит и законы Христовы превращает. И о том святый Стефан Зизаний пишет, что «вознесется и возвысится паче всякаго глаголемаго Бога, или чтилища», еже есть паче всех царей земных, иже суть прозвании, а не бяху суть бози, и заповеди святых сокрушит и своих повелений умышления заповесть держати (изволяяй, да чтет Кирилову книгу о том Знамения о противнике). Сего ради прещения мы святых отец боимся, таковому гордому зверю, обогащенном славою мира самовластному пастырю в послушество отдатися не хощем, и в книги его самоумысленныя и законопреступныя писатися никогда не хощем, да и хотящим спастися никому не советуем. По закону вашему судите нас и творите, что хощете, а мы, в силу указа вашего властодержца и его повеления, не пишемся! Относите ему от нас ответ или представите нас самих к нему на лицо: тогда мы пред ним отвещать не постыдимся и правду глаголати не устрашимся; ибо российские императоры от Петра и до окончания века — вси преемницы престола его и исполнители законов онаго, разных его узаконений, жив образ его пишуще. Известно вам буди, о власти всероссийския, яко вера святая, Христом с небесе снесенная и святыми апостолами преданная, и святыми седмию вселенскими соборами утвержденная, и мученическою кровию свидетельствованная, в России, в лето числа зверева 1666, царем Алексеем Михайловичем, патриархом Никоном истреблена, а римская и латинская возобновлена, а в конец без вести сотворена сыном его, Петром, который, ревнуя римскому и латинскому преданию, гоня и муча в древле отеческом предании староверцев, истребляя от земли и память их, называя их раскольниками, и еретиками, и заблудниками погибшими, а сам сый раскольник, сиречь не единомыслен со святыми, и еретик, сиречь приемник-узаконитель ересей римских, и латинских, и жидовских, и заблудник, понеже праваго истиннаго пути не позна, и погибший, понеже сын погибельный именуется, по святых сказанию.
 
Сице мы веруем и исповедуем, якоже свидетельствует сия хартия, и по Христе Спасителе называемся христиане, понеже новыя веры римския и латинския не приемлем; и есмы не раскольницы или сектоводцы, якоже сын погибельный глашает, ибо мы расколу в вере со святыми никакова не сотворихом и творить весьма ужасаемся; и не сектоводители, понеже отсекания от святыя церкве не сотворихом, и не буди нам, православным христианом, не помыслити, чтоб похулити Христово данное нам святое наименование, еже зватися нам по Христе христиане. Ибо Христос работающим ему правою верою обеща дати новое имя, новым работником новое имя, еже зватися христианы. Сего ради мы не приемлем на ся от отца лживаго вашего именования раскольническаго, и лживаго вашего Бога, осьмотысящнаго Иисуса, и его помазанника, лживаго Христа, за истиннаго не приемлем, и законов его богопротивных не слушаем, в книги отступническия с беззаконными не пишемся, понеже видим по святому писанию и изъяснению Соловецких страдальцев, что у вас от рождества Христова осмь лет убавлено. О россияне! Почто у Христа украли лета и пишите сице леточисление 1819 год, а по числу святых от рождества Христова 1829 год? Сего ради лживыми подписками весь род человечь в погибель свели, а мы под лживыя ваши лета не подписуемся. И почто паки вы лета превратили: индикт от септемврия 1 числа на генварь 1 число в честь имени храма Янусова превели и называете то новым летом? И тако со онаго лета, иже сын погибельный Петр вам предаде, а вы держите, и нас, грешных, в ту же погибель влечете. Того ради мы под ложныя ваши лета осмотысячнаго князя тьмы не подписуемся, и не проповедуем с вами купно ложное исповедание ваше и прелестное Христовых лет утаение; ибо таковое ложное исповедание святии отцы проклятию предаша, и мы, последующии их учению и преданию, проклинаем же и законопреступное утвержение сына сатанина, Петра, Великаго в злобе, иже Даниил пророк рече о нем: «Зверь той страшен, ни единому неподобный, иже времена и закон пременити размыслит». Ибо Петр, первый и последний воли сатаниной исполнитель, ревнуя еллинскому преданию, в честь идола ветхоримскаго, устави лета числити 1 генваря, и называя то Новым летом, и утверди его ежегодно праздновати, и торжественный молебен приносити за его, и утвердя строгими указы о непременном исполнении оном, разрушая завет вечный, предания святых отец, иже положиша святии на первом вселенском соборе, при благочестивом царе Константине, ежегодно праздновати Новое лето септемврия 1 дня, такоже свидетельствует Минея-Четья. Сего ради мы, смиреннии, гордому оному зверю, обогащенному властию самовластнаго правительства, и его янусовскому новолетию не последуем, и не подписуемся под ложное янусовское числение лет, и Бога вашего, Иисуса ложнаго, не приемлем, и всего предания его душегубнаго отметаемся, и в церковь его римскую и всех ересей приемницу, не последуем. Творите с нами, что хощете, а мы предания святых отец держимся, и настоящаго града, ни села не имеем, но грядущаго взыскуем вечно, и гордому, властию обогащенному князю вашему, властодержцу, в подданство не отдаемся и в книги беззаконныя не пишемся. Того ради, понеже преждебывшии в России благочестивии царие наши таковаго тиранства над человеки не творили, с мертвых дани не искали, мужеска и женска пола, и всего общечеловечества описания не творили. Якоже случися таково дерзнутие сотворитися при Давиде царе израильском, яко свидетельствует Библия, 2 книги Паралипоменовы главы 21 сице писано есть: «И воста диавол на Давида, и научи Давида, да счислит, иже под властию его всего Израиля, и посла князя своего Иоава по всей земли, да счислит Израиля; и за то прогневася Господь Бог на Давида за таковое законопреступление, и посла на него три язвы великия» (якоже свидетельствует Библия; изволяяй, да чтет тамо). Того ради мы в книги ваши беззаконныя под ложныя лета не пишемся и не проповедуем с вами янусовскаго новолетия, установленнаго сыном погибельным, Петром, Великим в злобе.
 
О россияне! Вонмите, кто царствует и кто обладает вами от лет 1666. По списателю книги «Правыя веры» (гл. 30), при слугах, и господина указует вашего, властителя, царствующаго над вами. Еще паки пишем: мы есмы саном христиане, веруем во отца и сына и святаго духа, в три лица, а во едино божество Господа Бога и Спаса нашего Исуса Христа, сына Божия, спасителя миру, мы веруем в него. 1) Мы веруем в него и исповедуем его первенца всея твари; 2) первенца, из мертвых воскресшаго в третий день; 3) исповедуем его первенца, вознесшагося на небеса со обоженною плотию и седящаго одесную отца, и показавшаго на небеса путь всем право верующим в него. А в первенца осмотысящнаго мы не веруем, и не исповедуем его перваго, и не приемлем, и не исполняем никоего его законопреступнаго повеления, и рабы и слуги его быти не обещаемся, зане писано есть во многих святых книгах, в апокалипсисе, и в Кириловой о вере в книгах, и в Ипполитове и Ефремове словах: « Аще кто обожившагося и треми властьми высящего антихриста послушает или покорится, и поклонится, и послужит, начертание его приемлет, и законопреступное его повеление не охулит, — таковый небеснаго царствия не наследит, но с ним вкупе осудится вечным судом божиим». Аминь.
 
КОММЕНТАРИИ
Подготовка текста и комментарии С. И. Николаева
 
Анонимный памятник старообрядческой полемической литературы конца XVIII в., в котором наиболее полно выражены старообрядческие представления о Петре — антихристе, печатается по изданию: Чтения в Обществе истории и древностей российских. 1863. Кн. 1. Смесь. С. 52—71. В «Собрании...» много повторов одних и тех же аргументов, некоторые из них в настоящей публикации выпущены, что отмечается знаком <...>.
 
5533 лета — согласно летосчислению от сотворения мира.
...постави седмь столпов вечныя правды... — т. е. семь вселенских соборов высших иерархов христианской церкви (IV—VIII вв.), на которых определялись основы христианского вероучения и осуждались ереси. Православная церковь признает только эти соборы, прошедшие до разделения западного и восточного христианства в 1054 г.
...на второй Рим прииде... — т. е. в Константинополь, столицу Византии.
...царь Алексей Михайлович с Никоном отступи от святыя православныя веры... — Речь идет о реформе русской церкви, проводившейся патриархом Никоном (1605—1681) с 1653 г. и исправлении церковных книг и обрядов по греческим образцам.
...в 1700 году возобнови... новолетие янусовское... — Указом Петра I 19 декабря 1699 г. в России было предписано начинать год с 1 января, и с 1700 г. официально введен счет лет от Рождества Христова (ранее летосчисление велось от сотворения мира и год начинался с сентября). Упоминание Януса связано с тем, что в римской мифологии он считался богом всякого начала, в том числе года.
...от царя Алексея Михайловича, не имеющаго уже на себе царскаго достояния... — Старообрядцы считали, что после начала церковной реформы царь Алексей Михайлович уже не являлся законным царем, соответственно не являлся таковым и его сын, Петр I.
...Кирилл Иерусалимский в знамении 10 пишет... — Кирилл, епископ Иерусалимский (315—386), один из отцов церкви. Здесь имеется в виду очень авторитетная в среде старообрядцев «Кириллова книга» (М., 1644).
...якоже свидетельствуют о том «Анекдоты», том 10. — Имеется в виду книга: Голиков И. И. Анекдоты, касающиеся до государя имп. Петра Великого. 2-е изд. СПб., 1798. (1-е издание вышло в 1796 г. как т. 17 «Дополнений к Деяниям Петра Великого» И. И. Голикова, см. ниже).
...небеса же комету в себе показаша, юже волхвы усмотреша, Симеон Полоцкий и Димитрий Ростовский. — Симеон Полоцкий и Димитрий Ростовский написали стихи на рождение Петра, что дало основание современникам и позднейшим исследователям считать, что оба были астрологами, для чего нет оснований.
...на первом вселенском соборе... — Первый вселенский собор состоялся в 325 г.
Ипполит — христианский богослов, римский епископ III в.
...и со святыми отцы Соловецкия обители, пострадавшими... в лето 7177. — Монахи Соловецкого монастыря не приняли реформу патриарха Никона, и в 1669 г. началось восстание, а затем осада монастыря, длившаяся до 1674 г.
Изволяяй, да чтет о том Историю Соловецкую. — Имеется в виду книга: «История об отцах и страдальцах соловецких» Семена Денисова (1682—1740), повествующая об осаде монастыря в 1669—1674 гг.
...по писанию Мефодия Патрскаго... — Епископ Мефодий Патарский (ум. 312), один из отцов церкви.
...книжка «Дополнение его деяний»... — Имеется в виду книга: Голиков И. И. Деяния Петра Великого, мудрого преобразителя России, собранные из достоверных источников и расположенные по годам. Ч. 1—12. М., 1788—1789. — Дополнения к Деяниям Петра Великого. Т. 1-18. М., 1790-1797.
...яко свидетельствует книжка «Кабинет Петра»... — Имеется в виду книга: Беляев О. П. Кабинет Петра Великого, или Подробное и обстоятельное описание воскового его величества изображения, военной и гражданской одежды, собственноручных его изделий и прочих достопамятных вещей, лично великому сему монарху принадлежавших. Ч. 1—2. СПб., 1793.
...книга «Регламент Духовный»... — «Духовный регламент» (СПб., 1721) был составлен Феофаном Прокоповичем и отредактирован Петром I. B регламенте обосновывались отмена патриаршества и учреждение Духовной коллегии для управления церковными делами.
...Ефрем святый... — Ефрем Сирин, один из отцов церкви IV в.
«Он бог твой, бог твой, о Россия!.. сошед к тебе от горних мест». — Несколько измененная цитата из «Оды на день тезоименитства... Петра Феодоровича...» М. В. Ломоносова.
...книга Баронея... — Имеется в виду книга католического историка Цезаря Барония (1538—1607) «Церковная история», изданная при Петре I в русском переводе: Деяния церковная и гражданская от рождества Господа нашего Иисуса Христа из летописаний Кесаря Барониа собранная, преведеная с полскаго языка на славенский. Т. 1—2. М., 1719; широко использовалась старообрядцами в их полемических сочинениях.
...имя Петр в пяти литерах обносится... — Имеется в виду написание с конечным ером — Петръ.
...учини народное описание... исчисляя вся мужеска пола и женска... — Имеется в виду подушная подать, введенная Петром I в 1724 г., ей предшествовала перепись населения.
Максим Грек (ок. 1470—1555) — писатель, публицист и переводчик, пользовался большим почтением у старообрядческих писателей.
...яко тать лжею говения... — Как вор обманчивым благочестием.
...святый Стефан Зизаний пишет... — Имеется в виду книга учителя Виленской братской школы Стефана Зизания «Казанье святаго Кирилла патриарха Иерусалимскаго о антихристе и знаках его» (Вильно, 1596).
Минея-Четья — имеется в виду свод житийных и церковно-учительных памятников «Великие Минеи Четии» митрополита Макария (XVI в.), который пользовался большой популярностью у старообрядцев (известны выписки из него в старообрядческих сборниках).