La Vijita del Prezidente Abdullah Gül en Fransya

Durante su estadia en Fransya, a la okazyon de la inogurasyon del maraviyozo proyeto intitulado “De Byzance a Istanbul”,  el Prezidente de Turkia Abdullah Gül tuvo la okazyon de ekspresar sus sentimyentos de amistad  enverso un payis ke tuvo desde la epoka del Imperyo Otomano una enorme influensa intelektual sovre  la Turkia....El avlo de las relasyones diplomatikas entre las dos potensyas desde la epoka de Suleyman el Manyifiko, de la instalasyon (muncho despues) de eskolas Fransezas en varias sivdades del Imperyo Otomano, las kualas  introduzyeron  en la kultura de muestro payis una primera persepsyone del “Pensamyento Evropeo”..

El Prezidente Turko enkontro  Nicolas Sarkozy, François Fillon ansi ke otras personalidades de la diplomasia Franseza kon las kualas diskutyo sovre la amistad entre los dos Estados, del desvelopamyento de las relasyones Turko-Fransezas en el avenir  i de una kooperasyon de mas a mas grande en el avenir.

 Komo se entyende byen, fue abordada tambyen la posibilidad de la admisyon futura de la Turkia al seno de la Unyon Evropea i de los enormes esforsos de evolusyon de muestro payis.

Alhad la tadre en una emisyon de la televizyon Franseza, tuvimos personalmente el immenso plazer de segir una entrevista kon  Abdullah Gül organizada por tres grandes gazeteros Fransezes.... Komo es de uzo sovre todo en Fransya, kestyones insidyozas fueron formuladas  de la parte de los djornalistos, a las kualas muestro prezidente respondyo kon muncha dinyidad, klaredad i un esforso maksimum de transparensya...

Una vez mas, los oditores fueron testigos de la fineza de su esprito diplomatiko i de su dezeo de avyertura a la sivilizasyon oksidental.

La muerte de una persona, ken ke sea, desha detras de eya un sensasyon de vazior... el sentimyento amargo de la instabilidad de las kozas.

La muerte de un ombre de valor desha eya, malgrado  la sertitud ke se trata de un akavamyento, markas mas o menos konstantes de su pasaje, de las kualas mos rememoramos kon dulsor i mizmo  envezes  kon una imperseptible sonriza sovre los mushos.

Es ansi de la disparisyon de Erol Güney, ombre de valor  i de grande kultura, inkontestable humanisto, avyerto a todo modo de refleksyon ke yeva en eya una kualkyer sinyifikasyon  pozitiva.

Nasido en 1914 en Odesa, el tambyen paso un periodo relativamente largo de su vida en Turkia  ke fue ovligado de interromper para ir bivir en Fransya antes de instalarse definitivamente en Israel.

Durante su largo sedjorno en muestro payis, el tuvo aktividades intelektualas muy apresyadas en el espasyo kultural Turko. El fue un buen amigo de grandes intelektuales  komo: “Nurullah Ataç”, “Orhan Veli”, “Necati Cumalı”, “Bedri Rahmi” i “Abidin Dino”.

El fue tambyen, durante 20 anyos, un kolavorador briyante i fidel del Şalom kon sus profundas analizes de la situasyon en Israel ke mos mandava regularmente.

En una e entrevista ke muestra kolavoradora Tuna Saylağ tuvo kon el, eya le demando “ke es la refleksyon ke puditesh retirar de vuestra larga i byen yena vida ?”, Erol Güney  avia respondido: -  “Amar”, porke  esta larga vida ke es la miya sera sin sinyifikasyon sin amar...  ay munchas kozas a admirar en la Natura, el Arte, la Literatura, la Muzika i la Poezia.

 Ke su Alma repoze en paz! Su pasaje sera syempre rememorado kon tristeza mesklada de dulsor.

 Un muevo livro de Rifat Bali intitulado “The Saga of a Friendship”

Kada muevo livro de Rifat Bali es  un akontesimyento kultural no solo en muestra komunidad ma tambyen en varios otros  lugares. Muy apresyado komo historyano en Fransya i diferentes otros payizes , por sus grandes kualidades de rektitud, metikulozidad, i fidelidad a la otentisidad, a las kualas se adjunta su ardor irrepresivle por la bushkida, el es uno de los mijores investigadores de lo ke fueron, en sus multiples  detalyos, algunos eventos de la vida de muestra komunidad. No tuve ainda la okazyon de meldar su muevo livro “The Saga of a friendship” , amigos ke lo izyeron me komunikaron sus apresyasyon i el grande interes ke el kontyene.. Tengo la esperansa de pueder darvos en poko  una chika idea de su kontenido i de todo lo kel autor mos ambeza de muevo...