Die hervorming van die gesondheidsektor moet wegdoen met die
stelsel waar rykes in private hospitale bedien
word en armes in staatshospitale, maar dit beteken nie dat die private sektor vernietig moet word nie.
Dr. Aaron Motsoaledi, minister van gesondheid, het gister in
Kaapstad op die hospitaalvereniging van Suid-Afrika (Hasa) se jaarlikse
konferensie vir die eerste keer sedert die groenskrif oor nasionale
gesondheidsversekering (NGV) bekend gemaak is, die private hospitaalsektor toegespreek. Motsoaledi het
reguit van ’n vergadering by die Verenigde Nasies in New York teruggevlieg om
dié konferensie by te woon.
“Dit gaan nie daaroor om die private
sektor te vernietig nie, maar die huidige stelsel is onvolhoubaar,” het hy
gesê.
“Daar moet met die tweevlakstelsel weggedoen word, maar wat ek
daarmee bedoel, is dat ’n manier gevind moet word om albei sektore te
gebruik.”
Hy het sy omstrede stelling van vroeër herhaal dat dié stelsel soms
erger is as wat tydens apartheid die geval was toe swart mense nie in wit
hospitale behandeling kon kry nie.
Hy het gesê hy weet hy gaan baie mense omkrap met die hervorming
van die gesondheidsektor en die NGV, soos wat stappe teen rook en nou teen
alkohol mense ontstig.
“Ek is bewus daarvan dat party mense in Hasa die hervorming en NGV
beskou as iets wat dit wat hulle het, sal vernietig.”
Hy het gesê dit sal nodig wees om gemeenskaplike terrein te vind
– soos wat met Kodesa gevind is – tussen die regering en die private sektor se sieninge.
Die gehoor was doodstil terwyl hy amper 20 minute lank oor die
neerslagtige statistieke oor die stand van gesondheid in Suid-Afrika gepraat
het.
Dit sluit in die voorkoms van MIV/vigs wat 23 keer hoër as die
wêreldgemiddelde is en die meeste sterftes veroorsaak. ’n Kwart van al die
antiretrovirale middels wat wêreldwyd vervaardig word, word in Suid-Afrika
gebruik.
“Ons kan dit nie ignoreer in die gesondheidsektor nie, dit gaan ons
op ons knieë dwing as ons dit ignoreer.”
Hy het weer ’n beroep gedoen (soos glo vroeër vanjaar toe
uitvoerende hoofde op ’n vergadering gevra is) om die hulp van die private sektor ten opsigte van MIV/vigs en die opleiding
van personeel.
Die private sektor moet erken dat die
vierledige gesondheidslas van die land hulle ook raak. Die ander probleme is
moeder- en kindersterftes. Dié statistieke het die afgelope dekade
agteruitgegaan. Hy het gesê die probleem met kinder- en moedersterftes is ’n
probleem met die algehele gesondheidstelsel insluitende die private sektor.
“Dit sal verkeerd wees vir iemand om voor te gee dat die siektelas
van Suid-Afrika nie so lyk nie. Suid-Afrika het vier duidelike pandemies wat
opgelos moet word.”
Hy het gesê dit is duidelik dat die gesondheidstelsel in
Suid-Afrika, insluitend die private sektor,
ondoeltreffend is, want anders sou die sterftes onder moeders en kinders nie so
agteruitgegaan het nie.
Motsoaledi het gesê hy het ’n tienpuntplan wat aandag aan al dié
probleme gee en sekere daarvan sal die private
sektor raak. Die NGV is net een van dié planne. Die gehalte van openbare gesondheidsorg is die staat se probleem maar
die res sluit die private sektor in. Vir die
eerste keer is ’n plan vir die ontwikkeling van personeel in die
gesondheidsektor bekend gemaak.
Nog ’n kwessie wat die private sektor
raak, is die medisynebeleid. Dit moet hersien word om seker te maak dat pryse
daal.