Perfektu (Ielmennyhaigu)

Perfektu merkiččöy teguo, kudai on olluh konzutah ennepäi: Minä olen ruadanuh kaikenualastu ruaduo. Sinä terväh olet suannuh kai ruavot loppuh. Häi hätken on vuottanuh poiguadah kodih. Myö jo olemmo kirjutannuh sanelun. Työ puaksuh oletto käynnyh linnah. Rahvas sit kyläs kaikin ollah lähtietty iäre.

Perfektu roih abuverbis olla, mi taibuu persounis, da piäverbis aktiivan II partisiipas, monikon kolmandes persounas passiivan II partisiipas.

Taivutammo perfektas verbit ruadua (rua-, ruada-), lähtie (lähte-), tuvva (tuo-), mennä (mene-, men-):

y.1	olen ruadanuh	lähtenyh	tuonnuh	mennyh
y.2	olet ruadanuh	lähtenyh	tuonnuh	mennyh
y.3	on ruadanuh	lähtenyh	tuonnuh	mennyh
m.l	olemmo ruadanuh	lähtenyh	tuonnuh	mennyh
m.2	oletto ruadanuh	lähtenyh	tuonnuh	mennyh
m.3	ollah ruattu	lähtietty	tuodu	mendy

Perfektan kieldomuodo

Perfektan kieldomuvvos taibuu kieldosana ei. yksikön dai monikon 3:ndes persounas käytetäh muoduo ei. Abuverbi olla on muvvos ole, a monikon 3:ndes persounas - muvvos olla. Piäverbi ei muutu. Taivutammo ielmainitut verbit perfektan kieldomuvvos:

y.1	en ole ruadanuh	lähtenyh	tuonnuh	mennyh
y.2	et ole ruadanuh	lähtenyh	tuonnuh	mennyh
y.3	ei ole ruadanuh	lähtenyh	tuonnuh	mennyh
m.1	emmo ole ruadanuh	lähtenyh	tuonnuh	mennyh
m.2	etto ole ruadanuh	lähtenyh	tuonnuh	mennyh
m.3	ei olla ruattu	lähtietty	tuodu	mendy

Perfektua käytetäh, konzu ilmoitetah:

teguo libo šeikkua, kudai on jo loppiettu: Olen lugenuh sen kniigan loppussah. Konzubo sinä olet loppenuh universitietan? Tuatto on pyydänyh kalua eläkkehele lähtendäh suate. Tytöt hyvin paistah karjalakse, ku ollah opastuttu sidä kieldy.
teguo libo šeikkua, kudai on allettu ennepäi, no jatkuu nygözeh aigah suate libo vie iellehgi: Linnas olen elänyh jo kymmenii vuozii. Myö olemmo opastunnuh karjalan kieldy jo viizi vuottuu. Minä kogo ijän olen suolannuh siendy talvekse. En ole nähnyh nikonzu nengomua karjua garbaluo.