Уставниот суд плаќа околу 150.000 евра државни пари за наем на простории во Работничкиот дом „Кочо Рацин“, а располага со сопствен објект. Таков податок добил Државниот завод за ревизија од Државниот завод за геодетски работи кога побарал да се утврди дали Уставниот суд има недвижен имот. Според ревизорскиот извештај, тој имот не е евидентиран во сметководството на Уставниот суд, бидејќи тој не знаел дека има свој објект.
Со одлука на Владата, Уставниот суд е сместен во простории на Работничкиот дом на улицата Дванаесетта ударна бригада. За таа намена владината Служба за општи и заеднички работи му плаќа наемнина на Сојузот на синдикатите на Македонија. Ревизијата дошла до податок дека по извршената промена на сопственоста на 22 ноември 2005 година, Работничкиот дом е државна сопственост. За да го провери тоа, државниот ревизор побарал од Државниот завод за геодетски работи да ја утврди сопственоста врз недвижниот имот со кој располага Уставниот суд. Од таму стасал одговор дека Уставниот суд располага со објект на улицата Крсте Мисирков. Објектот не е евидентиран во сметководствената евиденција на Судот, бидејќи тамошните одговорни лица тврделе дека судот нема имот.
Ревизијата извршена од први до 15 јуни годинава за финансиското работење на Уставниот суд утврдила дека Судот потрошил 102 илјади денари за паркинг-простор за возила на судии и вработени, иако, според Законот за извршување на буџетот, е предвидено тие да добиваат месечен надомест за превоз до и од работното место од 900 денари. Уставниот суд потрошил и 172 илјади денари за курсеви по странски јазици што ги посетувале судии и вработени во Судот, а не одредил критериуми за тоа кој треба да посетува курсеви. На ревизорите не им биле презентирани ни договорите за регулирање на обврските на посетителите на курсевите. Во ревизорскиот извештај е посоено и дека, спротивно на законот за извршување на буџетот, на судиите и вработените во Судот им биле исплаќани надоместоци за храна и превоз и за деновите кога биле на службени патувања.