環球唱片早排推出慶祝香港回歸15周年嘅新歌《難忘時刻》，無論歌詞同MV片段，都緊跟愛國愛黨嘅洗腦式國民教育路線，畫面不外乎97年回歸慶典，或者領導人訪港嘅歌舞昇平畫面，好多人話喺電視睇到，一係熄機一係轉台，怒插應該改做《淪陷時刻》。
好彩淪陷之後係重光之日，前日YouTube出現《難忘時刻》嘅「良心發現版」MV，加番真正屬於港人嘅集體回憶，打頭陣係六四屠城片段，趙紫陽帶住溫家寶探絕食學生，仲有香港民主歌聲獻中華，當年嘅成龍大哥好熱血，今日就轉口風話中國人唔管唔得變臉速度一流。
網民︰首歌突然好聽咗
MV仲見到前特首董建華同董太，而江澤民就好勞氣鬧香港天真又幼稚；唔少得嘅係中港衝突事件，D&G;拍照事件、雙非孕婦迫爆醫院、自由行旅客寸爆香港要靠阿爺等等，最後梗係遊行示威啦，香港人為李旺陽上街呼冤，呢啲捍衛公義法治嘅行為，先係香港核心嘅核心價值。
網民大讚良心MV令首歌突然好聽咗，仲話「呢啲先係人聽嘅歌」，至於歌詞「Believe in our dreams」，應該係同《自由花》呼應：「但有一個夢/不會死/記着吧」，係香港人記住嘅民主夢。
除咗良心發現版，網上仲有簡體字標題嘅「六四」版，叫「環球群星-《難忘時刻》MV」，但配樂畫面同原版完全無關，全部都係六四片段，希望可以喺強國廣傳。
吳爽
