2009 елның 10 июлендә Россия Федерациясе Хөкүмәте рәисенең беренче урынбасары – 2013 елда Казанда узачак XXVII Бөтендөнья җәйге Универсиадасының оештыру комитеты рәисе Игорь Шувалов катнашында Универсиада авылына беренче таш салу тантанасы узды. Универсиада авылы проекты баштан ук студентлар шәһәрчеге буларак планлаштырылды.

Универсиада авылының беренче өлеше 2010 елның 30 августында ук студентларны кабул итте. 2 кластерга берләштерелгән 20 торак корпусның гомуми мәйданы – 187 мең кв.м., биредә бер үк вакытта 7 меңнән артык кеше яши ала. Студентларны урнаштырган вакытта FISU тарафыннан тәкъдим ителгән аккредитацияләү программасы сыналды. Нәтиҗәдә, 1142 кеше 8 сәгать эчендә урнаштырылып бетте, һәрберсе турында мәгълүмат бердәм базага кертелде.

• Универсиада авылы төзелеше 2009 елның июлендә башлана;
• Универсиада авылы территориясенең гомуми мәйданы – 53 гектар;
• торак зонасының гомуми мәйданы – 274 мең кв.м.;
• Халыкара мәгълүмат үзәгенең гомуми мәйданы – 52 688 кв.м.;
• комплекс 12 мең кеше яшәүгә исәпләнелгән;
• яшеллек мәйданы – 141 784 кв.м.;
• агачлар утыртылачак мәйдан (планлаштырыла) – 35 298 кв.м.

Универсиада вакытында Авылда спортчылар һәм төрле илләрдән килгән рәсми делегация вәкилләре яшәячәк.

Универсиадада катнашучылар заманча җиһазландырылган бер, ике һәм өч кешелек бүлмәләрдә торачак. Бүлмәләр барлык кирәкле инфраструктура белән тәэмин ителгән. Яшәү өчен каралган бүлмәләрдән тыш, һәр делегация өчен өстәмә офис бүлмәләре һәм медицина кабинетлары да тәкъдим ителә. Универсиада авылы территориясендәге барлык корылмалар да видеокүзәтү, янгын сүндерү системалары һәм кондиционерлар белән тәэмин ителгән.

Команда үзәге, теркәлү һәм аккредитация хезмәтләре, спорт һәм мәгълүмат үзәге, FISU музее Халыкара мәгълүмат үзәгендә урнашачак.

Универсиада авылын рәсми рәвештә ачу тантанасы 2013 елның 29 июненә тәгаенләнгән.