ആരാണ് ബ്ലാക്ക് മാന്‍ ?

പുനലൂര്‍ : ആരാണ് ബ്ലാക്ക് മാന്‍ ?  അയാളുടെ ഉദ്ദേശം എന്ത് ? ഇത്തരം ചോദ്യങ്ങള്‍ക്കൊന്നും ഉത്തരമില്ല. ബ്ലാക്ക്മാനെ കണ്ടവരും ആക്രമണത്തിന് ഇരയായവരും ഇല്ല. എന്നാലും കിഴക്കന്‍ മേഖല കഴിഞ്ഞ കുറേ ദിവസങ്ങളായി ബ്ലാക്കമാന്‍ ഭീതിയിലാണ്. രാത്രിയില്‍ ആളുകളെ ( പ്രത്യേകിച്ച് സ്ത്രീകളെ ) ആക്രമിക്കുന്ന ബ്ലക്ക്മാന്‍ സംഘമുണ്ടെന്നാണ് പ്രചാരം. വായ്‌മൊഴിയായി വന്ന ഇത്തരം വാര്‍ത്തകളുടെ ഉറവിടം ഏതാണെന്നും ആര്‍ക്കും അറിയില്ല.

 

പൊടിപ്പും തൊങ്ങലും വെച്ച ബ്ലാക്ക്മാന്‍ കഥകള്‍ ഇപ്പോള്‍ കാട്ടുതീ പോലെ പ്രചരിക്കുന്നുണ്ട്. ബ്ലാക്ക്മാനെ പിടികൂടാനായി ഉറക്കമിളച്ച് കാത്തിരിക്കുകയാണ് ചെറുപ്പക്കാര്‍. ബ്ലാക്ക്മാനു വേണ്ടിയുള്ള തെരച്ചിലില്‍ ചടയമംഗലത്തുനിന്നും ഒരു മോഷ്ടാവിനെ പിടികൂടാന്‍ കഴിഞ്ഞതാണ് വലിയ കാര്യം. ശനിയാഴ്ച രാത്രി പോരേടം ഭാഗത്തുനിന്നാണ് റോയ് എബ്രഹാം എന്ന മോഷ്ടാവിനെ നാട്ടുകാര്‍ പിടികൂടി പോലീസില്‍ ഏല്‍പ്പിച്ചത്. ഇയാള്‍ ജില്ലയിലെ നിരവധി മോഷണക്കേസുകളില്‍ പ്രതിയാണെന്നാണ് പോലീസ് പറയുന്നത്.

 

ബ്ലാക്ക്മാനെക്കുറിച്ചുള്ള യാതൊരു പരാതിയും ഇതുവരെ ഒരു പോലീസ് സ്‌റ്റേഷനിലും ലഭിച്ചിട്ടില്ല. ജനങ്ങളെ തെറ്റിദ്ധരിപ്പിക്കാനും ഭയപ്പെടുത്താനുമുള്ള നുണ പ്രചരണം മാത്രമാണ് ബ്ലാക്ക്മാനെന്നാണ് അധികൃതരുടെ അഭിപ്രായം. ഇത് ഒരു പരിധി വരെ സത്യമാകാനും വഴിയുണ്ട്. കാരണം ബ്ലാക്ക്മാനെ പേടിച്ച് രാത്രി ആളുകള്‍ പുറത്തിറങ്ങാത്തതിനാല്‍ സാമുഹിക വിരുദ്ധര്‍ക്ക് സൈ്വര്യ വിഹാരം നടത്താന്‍ കഴിയും. ഇത്തരം കഥകള്‍ നാട്ടുകാരില്‍ ഭയപ്പാടുണ്ടാക്കുമ്പോള്‍ അതിന്റെ മറവില്‍ മോഷണം നടത്തുന്ന സംഘങ്ങളും വ്യാപകമാവുന്നുണ്ട്.